Kuɛ̈n 32 - JAM DE NHIALIC 2011

Dhiën cï Piɔ̈ɔ̈t ë Jordan të lɔ Aköl Amiäk

¹ Ënɔɔnë wɛ̈ɛ̈t ke dhiën ë Ruben, kekë dhiën ë Gad, ye kɔc de ɣɔ̈k ku thök juëc. Na ɣɔn aa cïk ye tïŋ ke piny de Jadher kekë Giliyad ee piny piɛɛth de ɣɔ̈k,

² gokï lɔ tëde Mothe, ku Eleyadhar, ku lɔ bäny kɔ̈k wat akutnɔm, ku luelkï an,

³ Ataroth, ku Dibon, ku Jadher ku Nimra, ku Ɣecbon, ku Eliɛla, ku Thibima, ku Nebo ku Bion,

⁴ Yen tɔ̈ɔ̈r cïï Bɛ̈nydït akutnɔm de Yithriɛl kuɔny bïk wuöt yak ee piiny piɛth ke ɣɔ̈k.

⁵ Yïn jɔ wo gäm ee pinyë ke ye këda, ku du wo be tɔ tem wɛ̈ɛ̈r de Jordan buk lɔ ɣap ëtɛ̈ɛ̈n.

⁶ Go Mothe bɛ̈ɛ̈r an, “Kaarkï bäk rëër ee tënë, ku jɔ kɔckuön ke Yithriɛl lɔ tɔŋ?

⁷ Ee ŋö ya wek e cät aya, bäk kɔc ke Yithriɛl tɔ diɛɛr në luɔi bï kek wɛ̈ɛ̈r de Jordan teem ke ke lɔ piny cïï Bɛ̈nydït gäm keek?

⁸ Yen kë ɣɔn cïï wärkun kɔn looi ka, ɣɔn cän ke tuɔɔc Kadec Barniya, bïk piny lɔ caath.

⁹ Acïk bɛ̈n lɔ abïk ɣet në wak de Ecekol, ku tïŋkï piny, na wën alek kenïïm dɔ̈k ciëën, acïk kɔc bɛ̈n tɔ diɛɛr abïk riɔ̈ɔ̈c në lɔ le kek piny cï Bɛ̈nydït gäm keek.

¹⁰ Bɛ̈nydït acï piɔ̈u bɛ̈n riääk në ee köölë ku yöök keek an,

¹¹ ‘Yɛn cï kuëŋ nɔn cïn en raan ee run thiërrou le tueŋ në kɔc ɣɔn luäk bei pinyde Rip, bï ɣet piny ɣɔn cä thɔ̈n Abraɣam, kekë Yithaak, ku Jakop në luɔi cï kek Ɛn ee riëëu taitai.

¹² Kënë aa cuup kɔc kedhie, ee Kalep wën de Jepuna e kɔc ke Kenidhita, ku Jocua wën de Nun kek aa dɔ̈ŋ në biäk riëëu kek Bɛ̈nydït arëët.

¹³ Bɛ̈nydït acï bɛ̈n gɔ̈th ke kɔc, go keek tɔ tai në jɔ̈ɔ̈ric në run kathiërŋuan agut të cïï rem ë cï Yen gɔ̈ɔ̈i piɔ̈u ëbɛ̈n thök në thuɔɔu.

¹⁴ Ku ënɔɔnë wek cï tëde wärkun nööm, rem ë piɛc bɛ̈n de kɔc ee karɛc looi, rɛm cï röt coc kɔɔr bï agöny de Bɛ̈nydït bɛ yiɛ̈n kɔc ke Yithriɛl.

¹⁵ Na cäk jai wek dhiën ë Ruben wekë Gad ke cäkkï kuany cök ënɔɔnë, ke Yen, abï ee kɔc tɔ̈u ë jɔ̈ɔ̈ric ë bɛ̈në bɛ nyääŋ piny, ku riäŋden abï tɔ̈u në we yiëth.

¹⁶ Acïk jam de Mothe piŋ ku limkï an, “Kë tueŋ pälë wook buk thökkuɔ yiëk ɣööt në kur, ku yïkku diäärkuɔ në mïthkuɔ pɛ̈ɛ̈nydït bï keek gël në kɔc ceŋ ee pinyë.

¹⁷ Ë tɛ̈ɛ̈n wok bï jɔ lɔ tɔŋ në kɔckuɔn ke Yithriɛl, ku jɔku tɔŋ wat agut të bïï wok keek lɔ tɔ nyuc piny ee yen bï aa pinyden, ku mïthkuɔ abuk ke nyääŋ ë pɛ̈ɛ̈nydït cï gël yiic, në biäk de kɔc ceŋ ëtɛ̈ɛ̈n.

¹⁸ Wok cïï röt bï kɔn dak në wuötkuɔ yiic, agut të bï kɔc ke Yithriɛl kɔ̈k kedhie pinydɛn cï gäm keek nööm.

¹⁹ Ku wok cïn piny töŋ kɔɔrku në wɛ̈ɛ̈r de Jordan lɔŋtui, në biäk cïï wok biäkda nööm lɔɔk ee tënë në biäk të lɔ aköl amiäk

²⁰ Go Mothe bɛ̈ɛ̈r an, “Të yen kë luelë yen kɔɔr bä looi ë yic, ee tënë në Bɛ̈nydït nɔm cuɔckï röt ke we bï lɔ tɔŋ.

²¹ Ku remduön ë tɔŋ ëbɛ̈n, abïk wɛ̈ɛ̈r de Jordan teem në riɛl ë Bɛ̈nydït abïk kɔc ke aterda mak agut të bï ke tiaam në Bɛ̈nydït.

²² Ku Nämkï piny, ku ëtɛ̈ɛ̈n wek duëër röt jɔ puk në biäk cä wek këduön wään cäk mac an bäk luöi Bɛ̈nydït kekë kɔckuön ke Yithriɛl thöl në luɔi. Ku ëtɛ̈ɛ̈n abï Bɛ̈nydït jɔ ŋic nɔn ye wɛ̈ɛ̈r de Jordan lɔŋ të lɔ aköl amiäk këduön.

²³ Na cäkkï këduön cak lueel e looi, ke wek bï ya kɔc cï kërac luöi Bɛ̈nydït, duökï awɛ̈ɛ̈c loi në biäk de ë kënë, ke we cïï bï kuööm në awänydun.

²⁴ Ka week lak tueŋ, yiëkkï pɛ̈ɛ̈nydïtkun ku ɣööt bïï thökkun aa tääu thïn ku luɔikï kë wään cäk than an bäk looi

²⁵ Kɔc ke Gad ku Ruben acïk lueel an bɛ̈ny abuk looi cït man cïï yïn e lɛ̈k wook.

²⁶ Mïthkuɔ ku diäärkuɔ ku ɣɔ̈kkuɔ, ku thökkuɔ abïk döŋ në pɛ̈ɛ̈nydït ë Giliyad yic ee tënë.

²⁷ Ku wook wodhie wok cï röt guiir ke wo lɔ tɔŋ, riɛl ë Bɛ̈nydït. Wok bï wɛ̈ɛ̈r de Jordan teem ku rɔ̈mku ke wo thäär cït man cïï yïn e lueel.

²⁸ Go Mothe wëlkë lɛ̈k Eleyadhar, ku Jocua ku jɔ aa bäny kɔ̈k ke dhiëën ke Yithriɛl an,

²⁹ “Të le wɛ̈ɛ̈t ke Gad ku Ruben wɛ̈ɛ̈r de Jordan teem ke ke cï röt coc lek tɔŋ në riɛl ë Bɛ̈nydït ku cïk we kuɔny agut të bä wek piny lëu në döm, abä keek jɔ gäm piny de Giliyad ke ye këden.

³⁰ Ku na kënkï wɛ̈ɛ̈r de Jordan teem ku lekï tɔŋ në week ëtök, abï ke miɔɔc në piny de Kanaan cït man ë wek.

³¹ Go kɔc ke dhiën ë Gad ku Ruben bɛ̈ɛ̈r an, “Bɛ̈ny, abuk looi cït man cïï Bɛ̈nydït e lɛ̈k wook

³² Në riɛl de, wok bï wɛ̈ɛ̈r de Jordan teem ke wo lɔ Kanaan, lok tɔŋ, ke wo bï piny nu ee lɔŋë mɛ̈k röt në wɛ̈ɛ̈r de Jordan kɔ̈u biäk të lɔ aköl amiäk.

³³ Go Mothe dhiën de Gad kekë Ruben, ku biäk thiin de dhiën ë Manatha wën ë Jothep, ciɛɛŋ de Thiɣon melik de Amor, ku ciɛɛŋ de Og melik de Bacan ku lɔ piiny ëbɛ̈n kekë pɛ̈ɛ̈nydïtkɛn tɔ̈u thïn, ku pɛ̈ɛ̈nydït kɔ̈k tɔ̈u në akeu nɔm.

³⁴ Kɔc ke dhiën ë Gad acïk wuöt bɛ̈n yïk, Dibon, Ataroth, Aroyer

³⁵ Ateroth Copan Jaɣeɣa,

³⁶ Beth Nimra, ku Beth Ɣaran, ee pɛ̈ɛ̈nydït cï gël, ku ee tëde thök.

³⁷ Ku yïk kɔc ke dhiën ë Ruben Ɣecbon, ku Eliɛla, ku Kiriathaim.

³⁸ Nebo, Baalmion, ku Thibima. Acïk pɛ̈ɛ̈nydït bɛ̈n waar rin ku nyɔkï keek në yïk.

³⁹ Dhiën de Makir wën de Manatha acï piny de Giliyad bɛ̈n mak ku peec, ku copkï kɔc ke Amor ɣɔn rɛ̈ɛ̈r ëtɛ̈ɛ̈n.

⁴⁰ Go Mothe Giliyad gäm dhiën de Makir, ku rëërkï ë tɛ̈ɛ̈n.

⁴¹ Jayir raan dhiën de Manatha ë bɛ̈i thii kɔ̈k peec ku ciëk keek në rin an, “Bɛ̈i ke Jayir.

⁴² Go Noba wun cɔl Kenath ke bɛ̈ike peec ku nyɔk ë të ciëk en keek në rinke, en Noba.