Kuɛ̈n 30 - JAM DE NHIALIC 2011

Lööŋ në biäk de kuëŋ

¹ Mothe ë bäny ke dhiëën ke Yithriɛl lɛ̈k an, “Lööŋ cïï Bɛ̈nydït tääu piny kï.

² Të cï raan gutguut lueel an, de kë bï gäm Bɛ̈nydït, ku nɔn kuëëŋ në luɔi bï yen mɔ̈l në kë däŋ, ë cïï löŋdɛn cï lueel dhoŋ kɔ̈u, ku abï kë cï lueel ëbɛ̈n an bï looi, dhiil në luɔi.

³ Të cïï tiiŋ koor ŋoot ke rɛ̈ɛ̈r baai ë wun gutguut lueel, an de kë bï gäm Bɛ̈nydït, ku nɔn kuëëŋ në luɔi bï yen mɔ̈l në këdäŋ,

⁴ abï kë riëëc ëbɛ̈n dhil looi, kë cï yen kuëŋ ku nɔn ee kë cï lueel an, bïï gam, ee të cïï wun jaai, të cï yen e guɔ piŋ ëtɛ̈ɛ̈n.

⁵ Ku na cï wun ë pɛ̈n luɔi bï yen ë tääu në ye yeth, yen kë cï yen kuëëŋ, të wën piŋ yen en, acï bï bɛ tɔ tɔ̈u në ye yeth. Abï Bɛ̈nydït päl awäc, në luɔi cïï wun ë pɛ̈n luɔi duëër ë ye tääu në ye yeth.

⁶ Na cï tiiŋ kën ë thiaak gutguut lueel, të ciɛk en e looi ke ŋic ku nɔn kuc, ku nɔn kuëëŋ në luɔi bï yen mɔ̈l në këdäŋ, ku jɔ thiaak,

⁷ abï këriëëc ëbɛ̈n dhil looi, kë cï yen kuëëŋ, ku nɔn ee kë cï lueel an bï gam, ee të cïï monyde jaai të cï yen ye guɔ piŋ ëtɛ̈ɛ̈n.

⁸ Ku na cïï monyde ë pɛ̈n luɔi bï yen ë tääu në yeyeth, yen kë cï yen kuëëŋ, të wën piŋ yen en, ka cïï bïï tɔ tɔ̈u në yeyeth. Abï Bɛ̈nydït päl awäc.

⁹ Tiiŋ abaar ku nɔn ee tiiŋ cï pɔ̈l, të cïï yen löŋdɛn cï lueel dhoŋ kɔ̈u, na de luɔi cï yen gutguut lueel an de kë bï gäm Bɛ̈nydït, ku nɔn kuëëŋ në luɔi bï yen mɔ̈l në këdäŋ.

¹⁰ Na cï tiiŋ de moc gutguut lueel, an de kë bï gäm Bɛ̈nydït, ku nɔn kuëëŋ an de luɔi bï yen mɔ̈l në këdäŋ,

¹¹ abï këriëëc ëbɛ̈n dhil looi, kë cï yen kuëëŋ, ku nɔn ee kë cï lueel an bï gam, ee të cïï monyde jaai të cï yen ye guɔ piŋ ëtɛ̈ɛ̈n.

¹² Ku na cï wun ye pɛ̈n luɔi bï yen ë tääu në yeyeth, yen kë cï yen kuëëŋ, të wën piŋ yen en, acï bïï tɔ tɔ̈u në yeyeth. Abï Bɛ̈nydït päl awäc, në luɔi cïï wun ye pɛ̈n luɔi duëër ë ye tääu në yeyeth.

¹³ Mony de tik, ade nɔm yic në luɔi duëër en kuëŋ de tik ku nɔn ee gutguut cï lueel tɔ kääc ë kë bïï looi, ku nɔn tɔ cïn naamde.

¹⁴ Ku në kööl, cïï monyde ye piŋ röl ke kuëëŋ, ku kën pɛ̈n en, ke tik abï këriëëc ëbɛ̈n dhil looi, kë cï yen kuëëŋ, ku nɔn ee kë cï yen gutguut lueel an bïï gam. Moc ë kuëëŋ tɔ kääc tëde, në kë kën en jaai në kööl ɣɔn piŋ yen en.

¹⁵ Ku na jɔ moc kuëëŋ de tiiŋde tɔ cïn naamde ke nïn ë ke cï wan, abï ariöp de awäny ë luɔi kënë gutguut looi gam.

¹⁶ Kakë ayek lööŋ cïï Bɛ̈nydït ke gäm Mothe në biäk de kuëëŋ ë moc kekë tiiŋde, ku nyandɛn ŋoot baai ke kënë thiaak.