Kuɛ̈n 3 - JAM DE NHIALIC 2011

Wɛ̈ɛ̈t ke Aron

¹ Kënë ee baai de Aron kekë Mothe ɣɔn jiɛɛm ë Bɛ̈nydït kekë Mothe në kuur ë Thinai.

² Aron ade nɔm wɛ̈ɛ̈t kaŋuan: Nadap yen aye kɛ̈ɛ̈i, ku Abiɣu, ku Eleyadhar, ku Yithamar.

³ Acïk keek bɛ̈n thany nïïm tɔ keek ee bäny ke kake Nhialic.

⁴ Ku Nadap kekë Abiɣu acïk bɛ̈n thou në Bɛ̈nydït nɔm në jɔ̈ɔ̈r ë Thinai të ɣɔn gɛm kek miɔ̈c në many kënë gäm keek. Aake thou ke ke cïn nïïm mïth. Ka Eleyadhar kekë Yithamar kek aa löök luui ke ke ye bäny ke kakë Nhialic në akööl ke Aron.

Lebai Aluuikï Bäny ke kake Nhialic

⁵ Go Bɛ̈nydït lɛ̈k Mothe an,

⁶ “Bɛ̈ɛ̈iyë dhiën de Lebai, ku tɔ keek kony Aron bɛ̈ny de kake Nhialic.

⁷ Abïk luɔi kɔɔr rɔt në paany de mätic aa looi, ku loikï luɔi de bäny ke kake Nhialic në baŋ de akutnɔm ëbɛ̈n.

⁸ Abïk këriëëc tɔ̈u në paanyic aa döt ëbɛ̈n, ku loikï luɔi de kɔc ke Yithriɛl ëbɛ̈n në paany de mätic.

⁹ Gäm Lebai Aron kekë wɛ̈ɛ̈tke bïk keek aa luööi.

¹⁰ Ku tɔ Aron kekë wɛ̈ɛ̈tke ee bäny ke kake Nhialic. Ku raan däŋ pei lɔ luɔiden looi abï thou.

¹¹ Go Bɛ̈nydït lɛ̈k Mothe an,

^12-13 “Lebai kedhie ayek kakï. Acä keek nööm ɣɔn tëde Yithriɛl në nyin de kɛ̈i de Yithriɛl ëbɛ̈n. Ka kɛ̈i ke Yithriɛl kedhie ayek kakï. Të ɣɔn näk Ɛn kɛ̈i ke Rip kedhie, yen aa nɔ̈ɔ̈m Ɛn kɛ̈i ke Yithriɛl kedhie, nɔn ee yen kɛ̈i de raan, ku nɔn ee yen kɛ̈i de läi. Ka ayek kakï yɛn Bɛ̈nydït.

Kuɛ̈n de Lebai.

¹⁴ Go Bɛ̈nydït lɛ̈k Mothe në jɔ̈ɔ̈r de Thinai yic an,

¹⁵ “Kuen Lebai kedhie në dhiën ku në ɣöötken thook ëbɛ̈n. Ku röör kedhie, gɔl në mɛwä de pɛɛi tök ku lee tueŋ.

¹⁶ Go Mothe ke kueen cït man cïï Bɛ̈nydït ye lɛ̈k en.

¹⁷ Ku kakë ayek wɛ̈ɛ̈t ke Lebai në rinken: Gercon ku Koɣath ku Merari.

¹⁸ Ku kakë ayek rin ke wɛ̈ɛ̈t ke Gercon në ɣöötken: Libni kekë Cimei.

¹⁹ Ku dhiëën ke Koɣath kï: Amiram kekë Yidhar, ku Ɣebron, ku Yudhiɛl.

²⁰ Ku dhiëën ke Merari kï: Maɣali kekë Muci. Kek dhiëën ke Lebai kï në ɣöötken thook.

²¹ Ku dhiën ë Gercon ade yic bɛ̈i kaarou, baai de Libni kekë baai de Cimei.

²² Ku kuën ë röör ë kuen thïn, gɔl në mɛwä ee pɛɛi tök ku le tueŋ, aaye aguum kadhorou ku bot kadhïc.

²³ Ku ee kek ë ye piɔ̈ɔ̈t në paany de mät kɔ̈u ciëën në biäk të lɔ aköl athɛ̈i.

²⁴ Ku bɛ̈nyden aaye Eliathap wën ë Liɛl.

²⁵ Ku wɛ̈ɛ̈t ke Gercon kek ë ye paany de mät döt ëbɛ̈n kekë akum de biäk biic ku biäk thïn, ku gëlgël de yethok biic.

²⁶ Ku gëlgël de kal thok, ku yïk kekë këriëëcde ëbɛ̈n, ku luɔidɛn kɔɔr rɔt ëbɛ̈n.

²⁷ Ku dhiën ë Koɣath ade yic bɛ̈i kaŋuan, baai de Amiram, ku baai de Yidhar, ku baai de Ɣebron, ku baai de Yudhiɛl.

²⁸ Ku kuën de röör ë kuen keek kedhie, gɔl në mɛwä ee pɛɛi tök ku lee tueŋ, aaye aguum kabɛ̈t ku thiërdhetem, kek bï lui tëɣeric.

²⁹ Ku bɛ̈i ke wɛ̈ɛ̈t ke Koɣath ye piɔ̈ɔ̈t në paany de mät lɔ̈ɔ̈m baŋ lɔ wöuwic.

³⁰ Ku bɛ̈nyden aaye Elidhapan wën ë Yudhiɛl.

³¹ Ku ee kek ë ye athänduŋ de mät döt, ku paam, ku cök ke manyalath, ku yïk, ku aduuk ye bäny ke kake Nhialic luui tëɣeric, ku gëlgël de tëɣeric thok. Ee kek ë ye nïïm luɔi de ee kakë kedhie.

³² Ku bɛ̈ny de Lebai ëbɛ̈n aaye Eleyadhar wën ë Aron. Ee yen ë nu në kɔc nïïm kedhie, kɔc ë ye luɔi tëɣeric në paanyic thïn.

³³ Ku baai de Merari ade yic bɛ̈i kaarou, Mali kekë Muci.

³⁴ Ku kuën de röör ë kuen thïn, gɔl në mɛwä ee pɛɛi tök ku lee tueŋ, aaye aguum kadhetem, ku bot kaarou.

³⁵ Ku ee kek ë ye piɔ̈ɔ̈t në paany de mät lɔ̈ɔ̈m baŋ të lɔ rut. Ku Dhuriel wën ë Abiɣail yen aaye bɛ̈nyden.

³⁶ Ku ee kek ë ye nïïm luɔi de këŋ de paany ku këŋke, ku rïurïuke, ku ka ye këŋ dhɔ̈ɔ̈r thäär, ku këriëëcden ëbɛ̈n, ayï luɔiden ëbɛ̈n.

³⁷ Ku ee kek ë ye nïïm këŋ ke kal, ayï këŋ, ayï lɔ̈cke, ayï awiɛɛthke.

³⁸ Ku Mothe kekë Aron ku wɛ̈ɛ̈t ke Aron kek aaye piɔ̈ɔ̈t në paany de mät thok tueŋ të lɔ aköl amiäk. Ee kek ë ye nïïm luɔi de tëɣeric në biäk de Yithriɛl. Ku raan ëbɛ̈n, raan them en bï luɔiden looi, aaye nɔ̈k.

³⁹ Ku kuën de Lebai ëbɛ̈n ɣɔn kueen ë Mothe keek aaye aguum kathiërrou ku rou, kek röör ëbɛ̈n gɔl në mɛwä ee pɛɛi tök të ɣɔn lëk ë Bɛ̈nydït Mothe nɔn kueen en keek.

Lebai Anömkï Tëde Kɛ̈ɛ̈i.

⁴⁰ Go Bɛ̈nydït lɛ̈k Mothe an, “Kuen wɛ̈ɛ̈t kɛ̈i ke Yithriɛl kedhie, gɔl në mɛwä ee pɛɛi tök ku lee tueŋ. Gɔ̈ɔ̈r ke rin kedhie, ŋɛk në ŋɛk cök.

⁴¹ Ku tääuwë Lebai në nyin de kɛ̈i ke Yithriɛl kedhie. Ku tääuwë ɣɔ̈k ke Lebai në nyin de ɣɔ̈k kɛ̈i ke Yithriɛl yiic kedhie ayadäŋ. Ee Yɛn Bɛ̈nydït.

⁴² Go Mothe kɛ̈i ke Yithriɛl kueen cït man cïï Bɛ̈nydït ye lɛ̈k en.

⁴³ Ku kuen ë wɛ̈ɛ̈t kɛ̈i ke Yithriɛl ëbɛ̈n gɔl në mɛwä ee pɛɛi tök ku lee tueŋ, kɛ̈i ë kueen ë Mothe ye aguum kathiërrou ku diäk.

⁴⁴ Go Bɛ̈nydït bɛ lɛ̈k Mothe an,

⁴⁵ “Nöm Lebai në nyin de kɛ̈i ke Yithriɛl ëbɛ̈n, ku nöm ke Lebai në nyin de kɛ̈i ke ɣɔ̈k ke Yithriɛl ëbɛ̈n. Lebai abïk aa kakï. Ee Yɛn Bɛ̈nydït.

⁴⁶ Ku në biäk cïï kuën de kɛ̈i ke Yithriɛl Lebai wöör nyïïn në bot kaarou ku thiërdhorou ku diäk, Yithriɛl ë waar ee kuënë kɔ̈u.

⁴⁷ Ku kɛ̈ɛ̈i tök ë ye waar kɔ̈u në cekel kadhïc, cekel cï them ë gɔk në thëm de tëɣeric. Ku ye thëm tök në keyiic gera kathiërrou.

⁴⁸ Ku gämë wëu ë wɛɛr ë kɛ̈i ë kekɔ̈ɔ̈th Aron kekë wɛ̈ɛ̈tke.

⁴⁹ Go Mothe wëu wɛɛr ë kɛ̈ɛ̈i kɔ̈ɔ̈th kut.

⁵⁰ Ago wëu nööm tëde mïth kɛ̈i ke kɔc ke Yithriɛl, agum ku bot kadiäk ku thiërdhetem ku dhïc de cekel kut në thëm de tëɣeric.

⁵¹ Ku gëmë ë Mothe wëu cï kut Aron kekë wɛ̈ɛ̈tke cït man cïï Bɛ̈nydït ye lɛ̈k en.