Kuɛ̈n 29 - JAM DE NHIALIC 2011

Miɔ̈c de dhuëëŋ de Göl ë Ruöön

¹ Në kööl tueŋ në ruöön ee kek dhorou wek bï we nïïm mat në lɔ̈ŋ ɣeric yic, ku acïn luɔi bï nu në ee köölë. Kɛŋ abïï ke kooth.

² Ku miɔ̈c ye nyop ëbɛ̈n, miɔ̈c ye awäude Bɛ̈nydït miëët piɔ̈u abï gäm En ke ye: miɔɔr atiëëk tök, ku nyɔɔŋ amääl dïït tök, ku nyök amɛ̈l kor ee ruöön tök kadhorou ke ke cïn gup tëdak.

³ Ku gɛmë miɔ̈c de rɛɛp ë piac luɔk ke ye aɣar lɔ mot cï liääp kekë miök de olip, kilɔɔ kadiäk ke aɣaar në miɔɔr tök, ku kilɔ kaarou në nyɔɔŋ amääl,

⁴ ku kilɔ tök në nyɔɔŋ amäl thiin tök agut keek kedhie.

⁵ Ku ayadäŋ wek bï nyɔɔŋ bou gam ke ye miɔ̈c de kërac bïï ë kɔc teem gup.

⁶ Miɔ̈ckë abïk keek mat në miɔ̈c de kööl tueŋ de pɛɛi ë piac wil, ku miɔ̈c ë rap, ku miɔ̈c ye nyop ëbɛ̈n aköölnyïïn kekë miɔ̈cdɛn ye dek Kek miɔ̈c de kacaam kë aye awäuden ke Bɛ̈nydït miëët piɔ̈u.

Miɔ̈c de Kööl ë Wɛ̈ɛ̈r

⁷ Matkï we nïïm në lɔ̈ŋ ɣeric yic në kööl ye nïn thiëër në pɛɛi de dhorouwic ke cïn raan cäm ku cïn raan lui.

⁸ Gämkï miɔ̈c ye nyop ëbɛ̈n Bɛ̈nydït, miɔ̈c ee Ye miëët piɔ̈u: miɔɔr atiëëk tök, ku nyɔɔŋ amäl dïït tök, ku nyök amɛ̈lkor kadhorou de ruöön tök, ke ke cïn gup tëdak kedhie.

⁹ Gamkï miɔ̈c ë rap rɔ̈ŋ ke ye aɣar piɛth lɔ mot cï liääp ke miök de olip, kilɔ kadiäk de aɣaar në miɔɔr tök, ku kilɔ kaarou në nyɔɔŋ amääl,

¹⁰ ku kilɔ tök në nyɔɔŋ tök në nyök amɛ̈l kor kë.

¹¹ Ayadäŋ gamkï nyɔɔŋ bou ke ye miɔ̈c de kërac, matkï në miɔ̈c de awäc bïï ë kɔc teem gup, ku miɔ̈c ye nyop ëbɛ̈n de aköölnyïïn ku miɔ̈cdɛn ë rap ku lɔ miɔ̈cdɛn ye dek.

Miɔ̈c de Dhuëëŋ ë Kɛ̈ɛ̈t

¹² Matkï we nïïm në lɔ̈ŋ ɣeric yic në kööl ye pɛɛi de dhorou thok thiëër ku dhïc. Luöikï Bɛ̈nydït dhuëëŋ në nïn kadhorouwiic kë cïn raan lui.

¹³ Gɔl në kööl tueŋ de ee köölë, wek bï Bɛ̈nydït gäm miɔ̈c ye nyop ëbɛ̈n, miɔ̈c ye awäude Ye miëët piɔ̈u: Miöör kathiëër ku diäk ku nyök ke amɛ̈ldït kaarou, ku nyök ke amɛ̈lkor ee ruöön tök, kathiëër ku ŋuan, ke ke cïn gup tëdak kedhie.

¹⁴ Gamkï miɔ̈c ë rap rɔ̈ŋ kekë aɣar piɛth lɔ mot cï liääp ke miök de olip, kilɔ kadiäk de aɣaar në miɔɔr tök, ku kilɔ kaarou në nyɔɔŋ amääl tök,

¹⁵ ku kilɔ tök në nyɔɔŋ tök në nyök amɛ̈l korkë, ku lɔ miɔ̈c ye dek kɔɔr rɔt.

¹⁶ Ayadäŋ gamkï nyɔɔŋ bou tök ke ye miɔ̈c de kërac, matkï në miɔ̈c de aköölnyïïn ye nyop, ku miɔ̈cdɛn ë rap, ku miɔ̈c ye dek.

¹⁷ Në kööl ë rou gamkï miöör kathiëër ku rou ke ke ye miɔ̈c, ku nyök ke amɛ̈ldït kaarou, ku nyök ke amɛ̈lkor ee ruöön tök kathiëër ku ŋuan ke ke cïn gup tëdak kedhie.

¹⁸ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

¹⁹ Gamkï nyɔɔŋ bou tök ke ye miɔ̈c de kërac, matkï miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

²⁰ Në kööl ë diäk gamkï miöör kathiëër ku tök ke ke ye miɔ̈c, ku nyök ke amɛ̈ldït kaarou, ku nyök ke amɛ̈lkor ee ruöön tök kathiëër ku ŋuan, ke ke cïn gup tëdak kedhie.

²¹ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

²² Gamkï nyɔɔŋ bou tök ke ye miɔ̈c de kërac, matkï në miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

²³ Në kööl ë ŋuan gamkï miöör kathiëër ke ke ye miɔ̈c, nyök ke amɛ̈ldït kaarou, ku nyök ke amɛ̈l kor ee ruöön tök, kathiëër ku ŋuan ke ke cïn gup tëdak kedhie,

²⁴ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

²⁵ Gamkï nyɔɔŋ bou tök ke ye miɔ̈c de kërac, matkï miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

²⁶ Në kööl ë dhïc gamkï miöör ka dhoŋuan ke ke ye miɔ̈c, ku nyök ke amɛ̈ldït kaarou, ku nyök ke amɛ̈lkor ee ruöön tök kathiëër ku ŋuan, ke ke cïn gup tëdak kedhie,

²⁷ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

²⁸ Gamkï nyɔɔŋ bou tök ke ye miɔ̈c de kërac, matkï miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

²⁹ Në kööl ë dhetem gamkï miöör kabɛ̈t ke ke ye miɔ̈c, ku nyök ke ke amɛ̈ldït kaarou, ku nyök ke amɛ̈lkor ee ruöön tök kathiëër ku ŋuan, ke ke cïn gup tëdak kedhie,

³⁰ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

³¹ Gamkï nyɔɔŋ bou tök ke ye miɔ̈c de kërac, matkï miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

³² Në kööl ë dhorou gamkï miöör kadhorou ke ke ye miɔ̈c, ku nyök ke amɛ̈ldït kaarou, ku nyök ke amɛ̈lkor ee ruöön tök kathiëër ku ŋuan, ke ke cïn gup tëdak kedhie,

³³ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

³⁴ Gamkï nyɔɔŋ bou tök ke ye miɔ̈c de kërac, matkï miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

³⁵ Në kööl ë bɛ̈t we bï amatnɔm de lɔ̈ŋ looi, ku cïn raan lui.

³⁶ Wek bï Bɛ̈nydït gäm miɔ̈c ye nyop ëbɛ̈n, ye awäude Ye miëët piɔ̈u: miɔɔr tök ku nyɔɔŋ amääl tök, ku nyök ke amɛ̈lkor ee ruöön tök kadhorou, ke ke cïn gup tëdak kedhie.

³⁷ Në miɔ̈c ë rap, ku miɔ̈c ye dek në miöör, ku nyök ke amɛ̈ldït, ku nyök ke amɛ̈lkor kedhie, në miɔ̈c kɔ̈kë ee röt kɔɔr cït miɔ̈c ë kööl tueŋ.

³⁸ Gamkï nyɔɔŋ bou tök ke ye miɔ̈c de kërac, matkï në miɔ̈c de aköölnyïïn ye nyop, ku miɔ̈c ë rap, ku miɔ̈c ye dek.

³⁹ Kakë ayek lööŋ cï mac në biäk de miɔ̈c bäk aa gäm Bɛ̈nydït, miɔ̈c ye nyop ëbɛ̈n ku miɔ̈c ë rap ku miɔ̈c ye dek ku miɔ̈c de mät bäk aa gam në akööl ke dhuëŋ ke ruöön thok ëbɛ̈n. Kakë abïk mɛt në miɔ̈c yak gam nyïïn: miɔ̈c de kuëŋ ku miɔ̈c de miɛtëpiɔ̈u.

⁴⁰ Go Mothe kɔc ke Yithriɛl lɛ̈k ka cïï Bɛ̈nydït ke ye yɔ̈ɔ̈k ëbɛ̈n.