Kuɛ̈n 27 - JAM DE NHIALIC 2011

Duet ke Dhelopad

¹ Duet ke Dhelopad wën ë Ɣeper, Ɣeper wën ë Giliyad, Giliyad wën de Makir, Makir wën de Manatha, Manatha wën de Jothep. Ayek duet dhiën ë Manatha. Ku duetkë acɔl keek Mala, ku Nowa, ku Ɣogla, ku Milka, ku Tirdha.

² Acïk bɛ̈n lɔ kɔ̈ɔ̈c në Mothe nɔm kekë Eleyadhar bɛ̈ny de kake ke Nhialic, ku bäny ke Yithriɛl kedhie, ku akutnɔm de kɔc në paany de mät thok ku luelkï an,

³ “Wääda acï thou në jɔ̈ɔ̈ric. Acïï thou kekë kɔc ɣɔn cï mat në Kɔra ku göthkï në Bɛ̈nydït. Ee kë lɛɛn ë thou në kërɛɛcde pei yetök. Ku aa thou ke cïn nɔm mïthwät.

⁴ Eeŋö bïï ë rin ke wääda bei në dhiëndenic, ee luɔi kën en dhiëth në mïthwät? Gämkï wook biäkda në kɔc ke wää lɔ̈m.

⁵ Go Mothe jamden yiɛ̈n Bɛ̈nydït.

⁶ Go Bɛ̈nydït lɛ̈k Mothe an,

⁷ “Duet ke Dhelopad adekï nïïm yic. Gämë keek piny në kɔc ke wuönden lɔ̈m. Tɔ keek lak piny ë wuönden.

⁸ Ku lɛ̈k ë kɔc ke Yithriɛl an, “Të cïï raan thou ke cïn nɔm mɛwä, ke kake ë ke gëmë nyande.

⁹ Ku na cïn nɔm duet, ke kake ë ke gëmë wɛ̈ɛ̈takɛcken.

¹⁰ Na cïn nɔm wɛ̈ɛ̈takɛcken, ke kake ë ke gëmë wälɛ̈ɛ̈nken.

¹¹ Na cïn nɔm wälɛ̈ɛ̈nken, ke kake ë ke gëmë raandɛn thiääk ke yen, nööm ke ye kake. Ku kënë yen abï tɔ̈u ke ye löŋ de Yithriɛl cït man cän ë lɛ̈k Mothe.

Jocua Agëmë Bääny de Mothe

¹² Go Bɛ̈nydït lɛ̈k Mothe an, “Lɔ nhial në kuur de Abarim nɔm, lɔ woi piny gäm kɔc ke Yithriɛl.

¹³ Na cï tïŋ, ke yïn bï thou cït man wään kɔn Aron wänmuuth thou,

¹⁴ në baŋ wään cä wek löŋdï dhɔ̈ŋic në jɔ̈ɔ̈r de Dhinic. Të ɣɔn bïï akutnɔm de Yithriɛl dok në yɛn ke ke kɔɔr pïïu në Meriba, wek kën riɛldï bɛ̈n nyuöth kɔc. (Meriba awaŋ ë pïïu nu në Kadec në jɔ̈ɔ̈r ë Dhinic).

¹⁵ Go Mothe Bɛ̈nydït lɔ̈ŋ lëk en an,

¹⁶ “Yïn läŋ Bɛ̈nydït Nhialic muk wëi ke raan ëbɛ̈n, nɔn kuëny yïn akutnɔm raan bï keek wat.

¹⁷ Raan bï keek aa wat tɔŋ, ku wɛt keek ciëën tɔŋ. Ke akutnɔm de kɔckun ë cï bï cït thök cïn nïïm tïït.

¹⁸ Go Bɛ̈nydït lɛ̈k Mothe an, “Jɔt Jocua wën ë Nun, raan thiäŋ ke wëi, raan lëu luɔi, ku thanyë yïcin në yenɔm.

¹⁹ Ku lɔ tɔ kääc në Eleyadhar nɔm, bɛ̈ny de kake ke Nhialic, ku akutnɔm de Yithriɛl, ku guiëërë keek kedhie nɔn cï yïn en kuɛ̈ny ke ye bɛ̈ny në nyindu yic.

²⁰ Ku gämë biäk de bäänydu, ke bï akutnɔm de kɔc ke Yithriɛl en gam thok.

²¹ Ku ë ye këde Eleyadhar piŋ, bɛ̈ny de kake ke Nhialic, raan bï yen aa lɔ yïn jam tëde Yurim ku Thumimnë Bɛ̈nydït nɔm. Ku Jocua kedhie kekë akutnɔm de kɔc ke Yithriɛl ëbɛ̈n, abïk aa cath në kë cïï Eleyadhar lueel.

²² Go Mothe kë cïï Bɛ̈nydït lɛ̈k en looi ëbɛ̈n. Go Jocua tɔ kääc në Eleyadhar nɔm, bɛ̈ny de kake ke Nhialic, ku jɔ ya akutnɔm ëbɛ̈n.

²³ Ku thɛny Jocua nɔm, ku ciɛɛl nɔn yen bɛ̈ny në nyinde yic cït man cïï Bɛ̈nydït ye lɛ̈k en.