Kuɛ̈n 25 - JAM DE NHIALIC 2011

Kɔc ke Yithriɛl në Peyor

¹ Të ɣɔn cïï kɔc ke Yithriɛl piɔ̈ɔ̈t në wak de Akacia, röör acïk duet ke Mowap bɛ̈n kɔɔr.

² Ago duet keek aa caal në miɔ̈c de yiëthkeniic. Agokï aa lɔ cam ku lamkï yiëthken.

³ Ago kɔc ke Yithriɛl mɛt në läm de Baal de Peyor yic. Go Bɛ̈nydït piɔ̈u diu ke keek arëët.

⁴ Go Bɛ̈nydït lɛ̈k Mothe an, “Math bäny ke Yithriɛl nïïm kedhie, ku nɛ̈k keek aköl në yanɔm, ku päl keek adhɔt piny ëtɛ̈ɛ̈n, ke agönhdï abï thök wokë kɔc ke Yithriɛl.

⁵ Go Mothe lɛ̈k bäny ke luk ke Yithriɛl an, “Raan ëbɛ̈n ë weyiic ë näk kɔckɛn cï mɛt në lam ë Baal de Peyor yic ëbɛ̈n.

⁶ Ku ëtɛ̈ɛ̈n, raan de Yithriɛl tök acï nyan ë kɔc ke Midian bɛ̈ɛ̈i baaide aköl ke woi ë Mothe, ku woi ë akutnɔm de kɔc ke Yithriɛl kedhie, ke ke dhiau në paany de mät thok.

⁷ Na wën, atïŋ ë Pineɣath wën Eleyadhar de Aron bɛ̈ny de kake Nhialic, ke jɔt rɔt ku nyiëëŋ akutnɔm piny, ku kuɛ̈ny tɔŋ.

⁸ Ku biɔɔth raan cï duet bɛ̈ɛ̈i ɣönde, ku thɛɛr keek kaarou abï tɔŋ paal në keyiic kaarou. Ku ëtɛ̈ɛ̈n, jɔŋ ë näk kɔc ke Yithriɛl ë bɛ̈n kɔ̈ɔ̈c.

⁹ Ku ëtɛ̈ɛ̈n, jɔk aa yök acï aguum kathiërrou ku ŋuan nɔ̈k në kɔc ke Yithriɛl yiic.

¹⁰ Go Bɛ̈nydït lɛ̈k Mothe an,

¹¹ “Ke cïï Pineɣath wën de Eleyadhar looi yë, acï ya tɔ päl agönhdï wokë kɔcke Yithriɛl. Akën gam nɔn bï kɔc yiëth kɔ̈k lam pei të cïn Ɛn, yen ke kɛn Ɛn keek bɛ riɔ̈ɔ̈k ka.

¹² Ka yïn, lɛ̈kë yen nɔn luɔi Ɛn män de rëër lɔ dïu wokë yɛn.

¹³ Yen kekë mïthke kedhie abïk aa bäny ke kake Nhialic ananden. Në biäk cï yen kɔc ke Yithriɛl teem gup në jai cï yen jai nɔn lɛm ë kɔc yanh däŋ pei të cïn Ɛn.

¹⁴ Ku raan de Yithriɛl ë näk kekë tiiŋ de kɔc ke Midian aa cɔl Dhimri de Thalu, bɛ̈ny de dhiën ë Thimion.

¹⁵ Ku tiiŋ de kɔc ke Midian ë näk, acɔl Kodhbi de Dhur. Wun yen aye bɛ̈ny de dhiëën ke kɔc ke Midian.

¹⁶ Go Bɛ̈nydït lɛ̈k Mothe an,

¹⁷ “Yiɛ̈në kɔc ke Midian tɔŋ, lak riäkkï keek.

¹⁸ Në biäk wään cï kek we math në Peyor, ku në biäk de Kodhbi cï nɔ̈k në akööl ke jɔŋ wään cï lëu në kɔc yiic, nɛ̈k keek në Peyor.