Kuɛ̈n 24 - JAM DE NHIALIC 2011

¹ Ku ëtɛ̈ɛ̈n, aa ŋic ë Balaam nɔn kɔɔr ë Bɛ̈nydït en nɔn thieei yen kɔc ke Yithriɛl, ka aken bɛ̈n bɛ lɔ tëde Bɛ̈nydït cït man yen lɔ. Ë yenyin bɛ̈n wɛl ë jɔ̈ɔ̈ric.

² Go kɔc ke Yithriɛl tïŋ acï piɔ̈ɔ̈t në dhiën. Go wëi ke Nhialic bɛ̈n në yeguöp,

³ go jam gɔl an, “Kënë ee jam de Balaam wën ë Beyor, ee jam de raan daai nyin ë gɔk.

⁴ Raan lëu bï kë lueel ë Nhialic piŋ ë gɔk, raan ee nyuuth tïŋ tëde Nhialic Awärjäŋ, ago wïïk piny, ku ŋoot ke daai nyin.

⁵ Pɛɛnykun alɛ̈kkï wek baai de Jakop tëduön ë rëër apiɛth yïn Yithriɛl.

⁶ Acïk ciët bäny dïït lääuwic, ku cïtkï tiim ke thidar nu në wɛ̈ɛ̈r yɔu. Ku cïtkï tiim ke aloyeth ë com ë Bɛ̈nydït, ku cït tiim ke thidar nu në pïïu thook.

⁷ Duumken abïk aa lel në pïïu, ku cumkï në tiɔɔp de piny. Meliŋden abï dït awär Agak, ku ciɛɛŋden abï ya gök ë ciɛɛŋ.

⁸ Acïï Nhialic ke bɛ̈ɛ̈i bei Rip, ku ee tɔŋden thɔ̈ɔ̈r cït thɔn cï jök. Ayek juöör ka ater riɔ̈ɔ̈k, ku dhuuŋkï yomken abïk lɔ mot, ku muuckï keek në dhaŋ.

⁹ Yithriɛl acït köör ril cï tɔ̈c, acït ŋun ë köör, eeŋa duëër en pɔ̈ɔ̈c ë nïnic? Raan cï Yithriɛl thieei, abï thieei. Ku raan cï Yithriɛl läm aciɛɛn, abï cieen.

¹⁰ Go Balak piɔ̈u diu arëët kekë Balaam. Ku biɔ̈ɔ̈k ë cïn në gäi ku lëk en an, “Yïn aa caal bä kɔc de wok ater bɛ̈n lam, ku bä, bä keek bɛ̈n thieei nadiäk!

¹¹ Jäl ënɔɔnë, puɔ̈kë rɔt wundun! Acä lueel wään aa bä yï riɔp, ku ënɔɔnë, Bɛ̈nydït ë yï pɛ̈n ariöp.

¹² Go Balaam bɛ̈ɛ̈r an, “Acä lɛ̈k kɔckuön wään bä tooc,

¹³ nɔn cän löŋ de Bɛ̈nydït duëër kɔn dhɔ̈ŋic, na ë yï cak Ɛn gäm adhɛ̈p ku atek ke ɣönduön ë bääny kedhie. Ee ke cïï Bɛ̈nydït lueel yen abä looi yetök.

Cäär Ciëën de Balaam

¹⁴ Go Balaam lɛ̈k Balak an, “Yɛn puk a nɔm kɔckï, ku të kɛn Ɛn kɔn jäl, ë yï lɛ̈k ke bïï kɔc ke Yithriɛl luöi kɔcku në akööl bɔ̈ tueŋ.

¹⁵ Ku jɔ ee jamë bɛ̈n lueel an: “Kënë ee jam de Balaam wën ë Beyor, jam de raan daai nyin ëgɔk.

¹⁶ Raan ee jam lueel ë Nhialic piŋ, Ku yök yic tëde Nhialic Awärjäŋ. Raan ee nyuuth yök tëde Awärjäŋ, ago wïïk, ku ŋoot ke daai nyin.

¹⁷ Yɛn ë ke bɔ̈ tueŋ tïŋ, aguɔ Yithriɛl tïŋ. Melik riäu cït man ë kuel abï tïc paan ë Jakop, Ku tiëc thieny ë baai de Yithriɛl. Abï bäny ke Mowap riɔ̈ɔ̈k, ku nɛ̈k kɔc ke Theth kedhie.

¹⁸ Abï kɔckɛn ka ater peec Edom kedhie, ku tɔ pinyden ee këde, ku ŋoot Yithriɛl ke tiam kɔc.

¹⁹ Abï Yithriɛl keek duöm piny, ku riëëk pɛ̈ɛ̈nydït ke kɔc cï döŋ ke ke pïr.

²⁰ Ku në nyuuthic, Balaam acï kɔc ke Amalek tïŋ ayadäŋ, go lueel an, “Kɔc ke Amalek aake ye wundïït ril në juöör ëbɛ̈n, ku ënɔɔnë, abï nyin riäär taitai.

²¹ Ku në nyuuthic, acï kɔc ke Keni tïŋ ayadäŋ, go lueel an: “Na cakaa nɔn rɛ̈ɛ̈r wek në rëër lɔ läŋ ku cak ɣöötkun yïk në kur nïïm nhial.

²² Ku wek kɔc ke Keni, wek bï riɔ̈ɔ̈k. Të bï Acuur week peec ke we mac.

²³ Go Balaam nyuuthë lueel an, Ee yï ŋa ee kakë, kɔc cï kenïïm mat të lɔ rutë?

²⁴ Kɔc rum baai abïk bɛ̈n në Kitim, Abïk Acuur kekë Eber peec, ku keek aya, abïk thou aɣet athɛɛr.”

²⁵ Ku jɔ Balaam rɔt jɔt, ku jël ke puk enɔm wunden. Ku jäl Balak në jälde.