Kuɛ̈n 21 - JAM DE NHIALIC 2011

Tiëm cïï Kɔc Ke Kanaan Tiaam

¹ Na ɣɔn, apiŋ ë bɛ̈ny de Kanaan en, melik de Arad rɛɛr në jɔ̈ɔ̈ric, nɔn tëëk ë Yithriɛl në kueer de Atharim, ke yïn Yithriɛl tɔŋ, ku le kɔc kɔ̈k peec në keyiic.

² Go kɔc ke Yithriɛl kuëëŋ në Bɛ̈nydït luelkï, an, “Të le yïn wo tɔ tiam ee kɔckë, pɛ̈ɛ̈nydïtken abuk keek riɔ̈ɔ̈k taitai.

³ Go Bɛ̈nydït ke piŋ thook, ku tɔ keek tiam kɔc ke Kanaan. Gokï keek riɔ̈ɔ̈r nyïïn taitai, ku riäkkï pɛ̈ɛ̈nydïtken. Go tɛ̈ɛ̈n cäk an Ɣorma.

Kërɛɛc de Maläŋ

⁴ Go kɔc ke Yithriɛl jäl në kuur ë Ɣor, tëkkï në kueer de Wɛ̈ɛ̈r Thith. Wilkï piny de Edom thok, na wën, ke kɔc ë ke bäp kueer.

⁵ Gokï Nhialic jääm guöp, ku jiëëmkï Mothe guöp aya, luelkï an, “Eeŋö bɛ̈ɛ̈i wek wo bei Rip, bäk wook bɛ̈n tɔ thou në jɔ̈ɔ̈ric? Acïn këcam ku acïn pïïu dek. Wok ë bäp në këcam rɛɛcë.

⁶ Go Bɛ̈nydït keek tuöc karɛc de thook wurïï, gokï kɔc juëc nɔ̈k në Yithriɛlic.

⁷ Go kɔc ke Yithriɛl bɛ̈n tëde Mothe, ku luelkï an, “Wok cï wööc, në biäk cïï wok yï jääm guöp, ku jiëëmku Bɛ̈nydït guöp. Ku ënɔɔnë, läŋ Bɛ̈nydït bïï karɛc nyaai në woyiic. Go Mothe lɔ̈ŋ në biäk de kɔc.

⁸ Na wën, ke lëk ë Bɛ̈nydït Mothe nɔn thɛ̈ɛ̈th en karɛc de maläŋ, ku tɛ̈ɛ̈u në wai nɔm. Na de raan cïï kërac kac, ke bï kërac de maläŋ aa woi, go guöp waar.

⁹ Go Mothe kërɛɛc ë maläŋ thɔ̈ɔ̈th, ku tɛ̈ɛ̈u në wai nɔm. Go raan cïï kërac kac en aa woi go ŋuɛ̈ɛ̈n.

Yithriɛl Akuɛɛth Mowap

¹⁰ Go kɔc ke Yithriɛl kuëëth, ku lek piɔ̈ɔ̈t në Oboth.

¹¹ Ku bekï kuëëth ë Oboth, ku lek piɔ̈ɔ̈t në Abarim ë jɔ̈ɔ̈ric, në Mowap baŋ të lɔ aköl amiäk.

¹² Ku bekï kuëëth ëtɛ̈ɛ̈n, ku lek piɔ̈ɔ̈t në wak de Dhered.

¹³ Ku bekï jäl ëtɛ̈ɛ̈n, ku lek piɔ̈ɔ̈t në lil de Arnon baŋtui, në jɔ̈ɔ̈r ee rɔt gɔl në aken de kɔc ke Amor nɔm. Arnon yen aye aken de Mowap kekë kɔc ke Amor.

¹⁴ Yen kë lueel ë Këcïgɔ̈ɔ̈r de Tɔɔŋ ke Bɛ̈nydït ka an, pänydït de Waɣep anu piny de Thupa, ku wëk ke lil de Arnon.

¹⁵ Ku liööŋ ke wëk ee ɣet në pänydïït de Ar ku ɣeet në aken ë Mowap nɔm.

¹⁶ Ku barkï yic ëtɛ̈ɛ̈n ɣetkï në yith nɔm. Yen yinh ë lëk ë Bɛ̈nydït Mothe ka an, “Määtë kɔciic kedhie tëtök ku abä keek gäm pïïu.

¹⁷ Go kɔc ke Yithriɛl ee dinë ket an, “Gapë rɔt nhial yïn nyin ë pïïu! Ku ket dit!

¹⁸ Ee yinh ɣɔn wec ë bäny, Ku në bäny ke kɔc, yinh cïï adhuëŋ kiëët. Aa wec në riɛl ë bäny ë thieecken. Agokï jäl në jɔ̈ɔ̈ric ɣetkï Matana.

¹⁹ Ku jëlkï Matana lekkï Naɣaliel. Ku jëlkï Naɣaliel lekkï Bamoth.

²⁰ Ku jëlkï Bamoth lekkï në wakic piny de Mowap në kuur de Pithga thar piny ke ke wel kenïïm ë jɔ̈ɔ̈ric.

Yithriɛl Atiam Thiɣon kekë Og

²¹ Go kɔc ke Yithriɛl kɔc tuöc Thiɣon, meliŋ de kɔc ke Amor, lëkkï yen an,

²² “Pälkï wook, takï wo tëk pinydun. Wok cï bï tëëk në duumkuniic, ayï duumkuön ke tiim. Ayï pïïukun acuku ke bï dek në yïthiic. Ee kueer yen buk kuanyic abuk pinydun winy thok.

²³ Go Thiɣon jai ke cïï kɔc ke Yithriɛl tɔ tëk pinyde. Go remdɛn ë tɔŋ määtic, ku yïnkï Yithriɛl tɔŋ në jɔ̈ɔ̈ric. Agokï ɣet Jaɣadh lek gɔ̈m në Yithriɛl ëtɛ̈ɛ̈n.

²⁴ Go kɔc ke Yithriɛl kɔc juëc nɔ̈k në keyiic, ku rumkï pinyden gɔl në lil de Arnon agut cï Jabok, ku le guööt aken de kɔc ke Ammon nɔm. Jadher yen aaye aken de kɔc ke Ammon.

²⁵ Go kɔc ke Yithriɛl pɛ̈ɛ̈nydït ke kɔc ke Amor peec kedhie, alɔ pëk Ɣecbon kekë bɛ̈i thiääk në yen, ku piɔ̈ɔ̈tkï thïn.

²⁶ Ɣecbon yen aye Pänydït de melik Thiɣon, meliŋ de kɔc ke Amor. Ku ee yen guöpde yen ë kɔn gɔ̈m ɣɔn kekë meliŋ de Mowap, ku peec pinyde ëbɛ̈n alɔ gut Arnon.

²⁷ Yen kë ye ciëk kiit ka an, “Bä Ɣecbon Pänydïït de melik Thiɣon! Akɔɔrku buk tïŋ ke cï bɛ yïk ku cï puk nɔm.

²⁸ Ɣɔn në Ɣecbon eenë, rem de tɔŋ de melik Thiɣon ë bɛ̈n jäl cït man ë mac. Ku le Ar riɔ̈ɔ̈k päny de Mowap ku riëëk Kur ke Arnon.

²⁹ Amawoou në week, wek kɔc ke Mowap! Wek kɔc ee yanh cɔl Cemoc lam, wek cïï riääk yök! Yanhdun acï röör tɔ peec, ku diäär acï meliŋ de kɔc ke Amor keek peec.

³⁰ Ku ënɔɔnë, käuden acï keek lɔ̈ɔ̈k riɔ̈ɔ̈k, Gɔl në Ɣecbon leer në Dibon, ku gɔl në Nacim leer në Nopa në Medeba lɔ̈ɔ̈m.

³¹ Go kɔc ke Yithriɛl piɔ̈ɔ̈t piny de kɔc ke Amor.

³² Go Mothe kɔc tuɔɔc Yadher, lek neem në kueer duëërë ye rum. Go Yithriɛl wut rum, ku peec bɛ̈i thiääk në yen ku copkï kɔc ke Amor wei.

³³ Go Yithriɛl jäl, dɔm kueer de Bacanic. Go melik Og keek kaaŋ nïïm, meliŋ de Bacan, ke cath kekë rem de tɔŋde. Agokï lɔ rɔ̈m në Ederi.

³⁴ Go Bɛ̈nydït lɛ̈k Mothe an, “Duk riɔ̈c në yen. Abä tɔ luöikï kë cït kë wään bäk kɔn luöi Thiɣon, meliŋ de kɔc ke Amor, ɣɔn cieŋ Ɣecbon.

³⁵ Go kɔc ke Yithriɛl Og nɔ̈k, kekë wɛ̈ɛ̈tke, ku nɛ̈kkï kɔcke abï cïn raan töŋ dɔ̈ŋ. Ku nömkï pinyden.