Kuɛ̈n 19 - JAM DE NHIALIC 2011

Ŋenh de Weŋ Aluɛɛl

¹ Go Bɛ̈nydït lɛ̈k Mothe kekë Aron an,

² “Löŋ cïï Bɛ̈nydït lueel kï: an yɔ̈ɔ̈kë kɔc ke Yithriɛl ë kë bïï weŋ aluɛɛl ke cïn ke dak në yeguöp, ku kënë kɔn tɔ lui.

³ Abïk gäm Eleyadhar, bɛ̈ny de kake Nhialic. Ku abï lɛɛr biic në wut këc, ku näk ke nu yen.

⁴ Ku ëtɛ̈ɛ̈n, Eleyadhar abï yeriöp juɔɔl në riɛm, ku yoor të lɔ paany de mät raan dhorou.

⁵ Ku weŋ ë nyop në mac ëbɛ̈n, kekë dɛ̈lde, ku rïïŋde, ku riɛmde, ku cïïnke ke bɛ̈ny de kake Nhialic ë nu.

⁶ Ku ëtɛ̈ɛ̈n, bɛ̈ny de kake Nhialic ë nöm tim ë thidar, ku ɣathop, ku alanh thith, ku cuɛt keek mɛɛc.

⁷ Ku ëtɛ̈ɛ̈n, abï lupɔɔke waak, ku wɛɛk ë pïïu ku jɔ bɛ̈n lɔ wut. Ku abï rëër ke de guöp acuɔl agut cï thëën.

⁸ Ku raan wën ë ɣɔɔk weŋ abï lupɔɔke waak ayadäŋ, ku wɛ̈l e guöp pïïu. Ku abï rëër ke cïï guöp ɣer agut cï thëën.

⁹ Ku raan ɣer guöp yen abï ŋenh ë weŋ jok, ku le tɔ̈ɔ̈u tëɣeric ë wut këc bïï akutnɔm de kɔc ke Yithriɛl pïïu ka aɣɛɛr aa looi wɛɛkë acuɔl wei, në biäk bïï ë kërac nyaai.

¹⁰ Ku raan ë jok ŋeth abï lupɔɔke waak, ku abï tɔ̈u ke cïï guöp ɣer agut cï thëën. Kek ee lööŋkë abïk tɔ̈u ananden, ke ke ye lööŋ ke Yithriɛl, ku yek lööŋ ke kɔclɛn rɛɛr në keek.

Jäŋ de Guöp de Raan cï Thou

¹¹ Raan ëbɛ̈n, raan cï guöp de raan cï thou jak, abï rëër ke de guöp acuɔl në nïn kadhorou.

¹² Ku abï yeyic tɔ ɣer në wɛ̈k wɛɛk en në pïïu ee kɔc tɔ ɣer në kööl de diäk, ku kööl de dhorou, ku abï yic jɔ ɣɛɛr. Ku na cïï rɔt lɔ waak në kööl ë diäk ku kööl ë dhorou, ka acïï guöp piɛth.

¹³ Raan ëbɛ̈n, raan cï guöp de raan cï thou jak, ku rëër ke cïï waak, abï rëër ke cïï yic ɣer. Në baŋ kënë ye wäl guöp pïïu ka aɣɛɛr. Abï paany de Bɛ̈nydït riɔ̈ɔ̈k, ku acï bï bɛ kuɛɛn në kɔc ke Bɛ̈nydït yiic.

¹⁴ Të thou ë raan në Paanyic ke de raan nu thïn, ku nɔn ee raan ë bɔ̈ ɣöt ke raan ë cï thou, raanë abï tɔ̈u ke cïï yic ɣer në nïn kadhorou.

¹⁵ Ku töny nu ɣööt, ayï thɛ̈k kënë kum nïïm, acïkï yiic bï ɣɛɛr ayadäŋ.

¹⁶ Ku të cïï raan raan cï nɔ̈k jak roor, ku nɔn ee raan ë thou, ku nɔn cï yuɔɔm de raan jak, ku nɔn ë jak raŋ, raanë abï guöp dɛ acuɔl në nïn kadhorou.

¹⁷ Ku në luɔi bï raan cïï yic ɣer tɔ ɣeric, ŋenh thiinakäŋ ë nöm në ŋenh ë weŋ de miɔ̈c de kërac yic, ku tɛ̈ɛ̈uwë në gul yic, ku wɛ̈lë kɔ̈u pïïu piɛth.

¹⁸ Ku ëtɛ̈ɛ̈n, raan ɣeric ë nöm ɣathop, ku jool në pïïu, ku yoor paany, ku këriëëc tɔ̈u thïn ëbɛ̈n, ayï kɔc tɔ̈u thïn. Ku nɔn ee raan ë jak yuɔɔm ë raan, ku nɔn ë jak raŋ.

¹⁹ Raan ɣeric abï raan de guöp acuɔl yuöör pïïu në kööl ë diäk, ku kööl ë dhorou. Ku në kööl ë dhorou abïï keek tɔ ɣeriic. Abïk lupɔɔken waak, ku yuur keek pïïu, ku abïk gup piɛth thëën të le akɔ̈l piny.

²⁰ Ku raan de guöp acuɔl na kën waak, ka abï rëër ke cïï yic ɣer, në baŋ kënë ë pïïu ka aɣɛɛr wäl në yeguöp. Abï tëɣeric de Bɛ̈nydït riɔ̈ɔ̈k, ku acïï bï bɛ kuɛɛn në amatnɔm de Bɛ̈nydït yic.

²¹ Löŋë abäk döt anandun. Ku raan ee kɔc yuöör pïïu ka aɣɛɛr, abï lupɔɔke waak ayadäŋ. Ku raan cï pïïu ka aɣɛɛr jak, abï rëër ke cïï guöp piɛth agut cï thëën.

²² Ku këriëëc cï raan de guöp acuɔl jak, acïï yic bï ɣɛɛr ayadäŋ. Ku raan däŋ lɔ ee kënë jak, abï rëër ke cïï guöp piɛth agut cï thëën.