Kuɛ̈n 18 - JAM DE NHIALIC 2011

Luɔi de Lebai.

¹ Go Bɛ̈nydït lɛ̈k Aron an, “Yïn wekë wɛ̈ɛ̈tku, ku Lebai, wek bï këtuc aa guum wedhie tëde yen awäny cï rɔt wööc në luɔi de tëɣeric yic. Ku na awäny wäc rɔt në luɔi de kake Nhialic, ee yïn wekë wɛ̈ɛ̈tku wapäc wek abï këtuc guum.

² Cɔl wɛ̈ɛ̈takɛckun, dhiën ë Lebai, ku tɔ keek lui në yïn, bïk week aa kuɔny në luɔi de Paanyic wekë wɛ̈ɛ̈tku.

³ Ë ke ye yï kuɔny në luɔi de Paany, ku ë ke cï kaɣeriic jak, kake tëɣeric, ayï kake yïk. Të le kek keek jak, wek bï thou wedhie arëk cï yïn.

⁴ Abïk yïn aa kuɔny në luɔi de paany de mät, ku cïn raan cïï rɔ̈ŋ ke looi tɔ lui ke yïn.

⁵ Ee yïn wekë wɛ̈ɛ̈tku wapäc, wek abï luɔi de tëɣeric aa looi, ku luɔi de Yïk. Ke Yɛn cï bï gɔ̈th wokë kɔc ke Yithriɛl.

⁶ Ee Yɛn ë lɔc wɛ̈ɛ̈takɛckun Lebai në kɔc ke Yithriɛliic ëbɛ̈n ke ye miɔ̈cdu. Acï keek gäm Ɛn, bïk aa luui në paany de mätic.

⁷ Ee yïn wekë wɛ̈ɛ̈tku wapäc, wek abï luɔi de kake Nhialic aa looi në Yïk nɔm, ku luɔikï këriëëc ë gëlgëlic aläl. Yen luɔidu ka ëbɛ̈n, në biäk cän yï gäm luɔi de kake Nhialic ke ye miɔ̈c. Raan ëbɛ̈n, raan cïï rɔ̈ŋ ke luɔi, ku le bɛ̈n në ka ɣeriic lɔ̈m, abï thou.

Biäk de Bäny ke Kake Nhialic.

⁸ Go Bɛ̈nydït lɛ̈k Aron an, “Cït man ŋic yïn en nɔn cän yïn gäm miɔ̈c kënë nyop ye gäm Ɛn ëbɛ̈n. Acä keek gäm yïn wekë mïthkuön bï lɔ̈ɔ̈k tɔ̈u në yïcök aɣet athɛɛr.

⁹ Ku biäkdu kï në miɔ̈c ɣeric ye gam në yïk nɔm, miɔ̈c ë rap, ku miɔ̈c de awäc, ku miɔ̈c de kërac. Miɔ̈c ɣeric ëbɛ̈n, miɔ̈c cï gäm Ɛn, ee këdu wekë wɛ̈ɛ̈tku.

¹⁰ Ku ee miɔ̈ckë abäk keek aa cuet në paanyic tëɣeric aläl, ku në biäk ɣeer kek yiic, ee röör kapäc kek bï keek aa cuet.

¹¹ Ku na de miɔ̈c däŋ pei, miɔ̈c cïï kɔc ke Yithriɛl gäm Ɛn ka ye këdun ayadäŋ. Acä ke gäm yïn wekë Wɛ̈ɛ̈tku, ku duetku anande. Ku raan de baaidu ëbɛ̈n, raan ɣer guöp, aduëër cam në yen.

¹² “Wek gäm miɔ̈c piɛɛth de ka cï kɔn luɔk tëde Yithriɛl, miɔ̈c yek gäm Ɛn në ruöön thok ëbɛ̈n. Miɔ̈c de miök de Olip, kekë mɔ̈u, ku rap.

¹³ Kedhie ayek kaku. Ku raan de baaidu ëbɛ̈n, raan ɣer guöp aduëër cam në yen.

¹⁴ “Ku këriëëc cïï Yithriɛl gäm Ɛn ëbɛ̈n, ee këdun.

¹⁵ Mïth kɛ̈i, ayï kɛ̈i ke läi cïï Yithriɛl gäm Ɛn ëbɛ̈n, ayek kakun. Ye kuën wɛɛr ë kɛ̈ɛ̈i kɔ̈u dɔm, ayï kuën wɛɛr ë läi cïï piɛth kɔ̈ɔ̈th ayadäŋ.

¹⁶ Kuën ye mïth waar kɔ̈ɔ̈th abï nɔm aa tök, abï ya atek lɔgɔk kadhïc, cït man de kuën de tëɣeric. Ku meth ë ye waar kɔ̈u ke ye pɛɛi tök, të ë dhiëëthë ë ye.

¹⁷ Ku kɛ̈i ke ɣɔ̈k, ku thök ë ke cï ye waar kɔ̈ɔ̈th. Ayek kakï kedhie, ayek kaɣeriic, ku abïï ke aa miaac. Yak riɛmden wiɛ̈ɛ̈th në yïk nɔm, ku nyuɔpkï kɔlden ke ye miɔ̈c de këcam, miɔ̈c ye atuɔ̈mde ya miët piɔ̈u.

¹⁸ Ku rïïŋden ee këdun cït man ye aguöt nɔm këdun kekë ɣäm cuëc.

¹⁹ Miɔ̈c ɣeriic ye kɔc ke Yithriɛl yiɛ̈n Ɛn ëbɛ̈n, agäm ke yïn wekë wɛ̈ɛ̈tku, ku duetku ananden. Yen ee kënë, ee löŋ cä mac wokë yïn ku mïthkuön bï lɔ̈ɔ̈k tɔ̈u.

²⁰ Ku lëk ë Bɛ̈nydït Aron an, “Acïn kë bï gäm yïn në ka bï Yithriɛl lɔ̈ɔ̈k lak, ku acïn piny bï gäm yïn. Yɛn Bɛ̈nydït, Yɛn aye këduön bäk lak.

Biäk de Lebai.

²¹ Go Bɛ̈nydït lueel an, “Miɔ̈c de ke thiëër ë käŋ ye Yithriɛl gäm Ɛn, acä gäm Lebai ke ye kë bïk lak. Yen ariöpden ka në biäk de luɔidɛn yek looi në paany de mätic.

²² Ë cïn raan däŋ de Yithriɛl ee lɔ në paany de mät lɔ̈ɔ̈m, ke ke cïï kërac bï looi ku yïnkï röt thuɔɔu kapäc.

²³ Lebai kek abï luɔi de paany de mät aa looi ëbɛ̈n kapäc, ku ee kek ee nïïm këriëëcde ëbɛ̈n. Yen löŋ bï tɔ̈u ka anande agut cï mïthkun wadäŋ. Ku Lebai abïk nïïm ciɛ̈n kë bïk lak në Yithriɛl.

²⁴ Në baŋ cän keek gäm miɔ̈c de ke thiëër ë käŋ ye Yithriɛl gäm Ɛn ke ye kë bïk lak. Yen kë luɛɛl Ɛn ka nɔn cïn kek nïïm kë bïk lɔ̈ɔ̈k lak në Yithriɛl.

Töŋ de Thiëër ë Lebai

²⁵ Go Bɛ̈nydït Mothe yɔ̈ɔ̈k an,

²⁶ lɛ̈kë Lebai ayadäŋ, an të cä wek miɔ̈c de ke thiëër ë käŋ nööm tëde Yithriɛl, miɔ̈c cïï Bɛ̈nydït gäm week bäk lak, ke we gëm Bɛ̈nydït kë thiëër ë käŋ në keyiic ëbɛ̈n.

²⁷ Yen ee miɔ̈cë, yen abï cït miɔ̈c ye kɔc ee pur gam ke ye miɔ̈c de rɛɛpkɛn cï luɔk tueŋ, ku cït mɔ̈u ye gam të ye mɔ̈u dhiim.

²⁸ Yen kueer bä wek Bɛ̈nydït aa miɔ̈c ka, në ke thiëër ë käŋ ëbɛ̈n ye Yithriɛl gam. Miɔ̈cë abäk aa gäm Aron, bɛ̈ny de kake Nhialic.

²⁹ Biäk piɛth de ka cï gäm week, yen abäk aa gäm Bɛ̈nydït.

³⁰ Ku të cä wek biäk piɛth gam, ke wek nöm ee biäk cï döŋ piny, cït man ye kɔc ee pur kakɛn cï döŋ ë nööm, cït kak ë dɔ̈ŋ të ye mɔ̈u dhiim.

³¹ Ku biäk cï döŋë aa ariöpduön de luɔi ë paany de mätic, abäk këdun aa cam në bɛ̈ikun, alɔ të kaarkï bä wek en cam thïn.

³² Acïn kërɛɛc bï nu ë we yiëth të la wek biäk cï döŋ cam, ku cäk Bɛ̈nydït gäm baŋ piɛɛthde. Ku duökï löŋ bï wööc bäk miɔ̈c ɣeric de Yithriɛl cam ke wek kën Bɛ̈nydït gäm baŋ piɛɛthde. Të la wek en looi aya, wek bï thou.