Kuɛ̈n 17 - JAM DE NHIALIC 2011

Thieny de Aron

¹ Go Bɛ̈nydït lɛ̈k Mothe an,

² “lɛ̈kë kɔc ke Yithriɛl, tɔ keek gëm yïn thieec kathiëër ku rou, bɛ̈ny de dhiën ke thieny tök. Ku gäär rin ke bɛ̈ny ë dhiën në thienyde kɔ̈u.

³ Ku gäär rin ke Aron në thieny de Lebai kɔ̈u. Bɛ̈ny de dhiën ëbɛ̈n abï nɔm dhiɛl dɛ thieny tök.

⁴ Nöm keek, ku lɔ tɔ̈u keek në paany de mätic në Athänduŋ de Löŋ cï Mac nɔm tueŋ, të ye wok mat thïn wokë yïn.

⁵ Ku thieny de raan cä lɔc abï nyok. Yen kueer bän dok de kɔc ke Yithriɛl në yïn jɔ tɔ kääc ka.

⁶ Go Mothe jam kekë kɔc ke Yithriɛl, go raan ëbɛ̈n në bänyiic thienyde bɛ̈ɛ̈i, ku gëm Mothe. Thieec acïk bɛ̈n aa thiëër ku rou cït kuën de dhiënken kathiëër ku rou. Ku thieny de Aron aa nu ke keek ëtök.

⁷ Go Mothe thieec tɔ̈ɔ̈u kedhie në Paany de Mätic thïn në Athänduŋ de Löŋ cï Math nɔm tueŋ.

⁸ Na ɣɔn amiäk, ke Mothe ë lɔ në Paanyic. Go thieny de Aron lɔ yök acï nyok, thieny de Lebai. Yök acï nyok, ku moc gaak, ku ŋol, ku mïth kɔ̈k ke almon acïk buɔ̈ny.

⁹ Go Mothe thieec jɔt kedhie, le keek nyuöth kɔc ke Yithriɛl. Agokï ke cï rɔt looi tïŋ, go ŋɛk në bänyiic thienyde aa nööm.

¹⁰ Go Bɛ̈nydït lɛ̈k Mothe an, “Puɔ̈kë thieny de Aron nɔm ë Paanyic në Athänduŋ de Löŋ cï Mac nɔm tueŋ ë tëdɛnë. Ku päl ëtɛ̈ɛ̈n, ke bï Yithriɛl aa jɔ̈ɔ̈ny ke ke bï dokden puɔ̈l të cï kek thuɔɔu kɔɔr.

¹¹ Go Mothe ke cïï Bɛ̈nydït lueel looi.

¹² Go kɔc ke Yithriɛl lɛ̈k Mothe an, “Yen thökda ka!

¹³ Na ye luɔi bï raan ëbɛ̈n ee thou ka, raan cï bɛ̈n në Paany lɔ̈ɔ̈m, ke wok rɛɛr ke wo ye kɔc cï thou!