Kuɛ̈n 15 - JAM DE NHIALIC 2011

Lööŋ Ke Miɔ̈c.

¹ Go Bɛ̈nydït lɛ̈k Mothe an,

² “Jam wekë Yithriɛl, lɛ̈kë keek an, Të cä wek ɣet piny gäm week,

³ Ku kaarkï nɔn miɔɔc wek Bɛ̈nydït në miɔ̈c ye nyop ëbɛ̈n, nɔn ee thɔ̈k yen gamkï, ku nɔn ee weŋ ke ye miɔ̈c de miɛtëpiɔ̈u, nɔn yen miɔ̈c ye nyop ëbɛ̈n, ku nɔn yen miɔ̈c cïï raan kuëëŋ bï gam, ku nɔn yen miɔ̈c ë tɛk këde yetök, ku nɔn yen miɔ̈c de dhuëëŋ.

⁴ Në ee miɔ̈ckë yiic kedhie, raan abï Bɛ̈nydït aa gäm aɣar lɔ mot ke ye biäk töŋ de löth cï tɛ̈ɛ̈kiic nathiëër, ku cï liääp kekë miök bur abïny thar ke ye miɔ̈c ë rap.

⁵ Ku gɛm abïny abuɔ̈ɔ̈ric në mɔ̈u, ke ye miɔ̈c ye dek. Abï ya luöi miɔ̈c ye nyop ëbɛ̈n, ku nɔn yen miɔ̈c näk.

⁶ Na ye nyɔɔŋ amääl yen gɛmë, ke wek kiëët miɔ̈c ë rap ke ye biäk kaarou ke löth cï tɛ̈ɛ̈kiic nathiëër, në aɣar lɔ mot, ku liëëpë në abïny ë miök atɛɛm thar.

⁷ Ku gamkï miɔ̈c ye dek ke ye abïny ë mɔ̈u atɛɛm thar. Ku ee kënë abï Bɛ̈nydït miët piɔ̈u.

⁸ Ku të gam wek miɔɔr ke ye miɔ̈c ye nyop ëbɛ̈n, ku nɔn yen miɔ̈c de kuëëŋ cïï raan kuëëŋ, ku nɔn ee yen miɔ̈c de mät,

⁹ ke we gɛm miɔ̈c ë rap në miɔɔr ëtök, ke ye biäk kadiäk ke löth cï tɛ̈ɛ̈kiic nathiëër në aɣar lɔ mot, ku liëëpë në abïny atɛɛm kɔ̈u në miök.

¹⁰ Ku gamkï abïny atɛɛm kɔ̈u në mɔ̈u ke ye miɔ̈c ye dek. Atuöm de miɔ̈cë abï Bɛ̈nydït miët piɔ̈u.

¹¹ Kek ka bï ya gam ka në miɔ̈c de miɔɔr, ku miɔ̈c de nyɔɔŋ amääl, ku miɔ̈c de nyɔɔŋ bou.

¹² Të cï ke gɛmë yenyin ŋuan, ke këriëëcde ë ŋuak ke kït ayadäŋ.

¹³ Ku raan ë Yithriɛl ëbɛ̈n, abï kënë dhiɛl aa looi ëbɛ̈n të gɛm en miɔ̈c de këcam, ku atuɔ̈mde abï Bɛ̈nydït jɔ miët piɔ̈u.

¹⁴ Ku të de yen raan lɛɛn rɛɛr ke week, raan cï cieŋ ku nɔn yen raan ë piɛc bɛ̈n, ku kɔɔr nɔn bï yen miɔ̈c de këcam gäm Bɛ̈nydït, këcam bï atuɔ̈mde Bɛ̈nydït miët piɔ̈u, ke kuany ee lööŋkë cök ë gɔk.

¹⁵ Kek ee lööŋkë abïk tɔ̈u në week, ku tɔ̈ukï në kɔc alɛi rɛ̈ɛ̈r në week anande. Week në keek wek thööŋ wedhie në Bɛ̈nydït nɔm.

¹⁶ Ka ee lööŋkë ee lööŋkun ku ee lööŋken aya.

¹⁷ Go Bɛ̈nydït lɛ̈k Mothe an,

¹⁸ “lɛ̈kë kɔc ke Yithriɛl an të la wek lɔ ɣet piny gäm week,

¹⁹ Ku lak cam në kuïïnkë, ke we miɔc Ɛn.

²⁰ Kuïn töŋ cï pam ë kɔn ë thaal tueŋ ëbɛ̈n, ë gɛmë Yɛn ke ye miɔ̈c, cït miɔ̈c de ka yak kɔ̈ɔ̈m.

²¹ Yen ee miɔ̈c mɛɛnë abï ya gäm Bɛ̈nydït anande ke ye kuïn cï pam yak thaal.

²² “Ku të la wek wööc, ku cäkï lööŋ lëk ë Bɛ̈nydït Mothe lɔ döt,

²³ lööŋ cïï Bɛ̈nydït tɔ lëk ë Mothe week kedhie.

²⁴ Na ye awäny ë wööc kuc akutnɔm de kɔc, ke ke gɛm miɔɔr atiëëk ke ye miɔ̈c ye nyop ëbɛ̈n ye atuɔ̈mde Bɛ̈nydït miët piɔ̈u. Ku gɛmë kekë miɔ̈c ë rap, ku miɔ̈c ye dek ëtök. Ku ë ke gɛm nyɔɔŋ bou ke ye miɔ̈c de kërac.

²⁵ Ku bɛ̈ny de kake Nhialic abï atɛɛm looi në biäk de akutnɔm de kɔc ke Yithriɛl kedhie, ku abï Bɛ̈nydït ke päl awänyden, në luɔi cï kek ke kuckï, ku në biäk cï kek miɔ̈cden gam, miɔ̈c ye nyop ëbɛ̈n, ku miɔ̈c de kërac, teem kek awäc.

²⁶ Ku ëtɛ̈ɛ̈n, akutnɔm de kɔc ke Yithriɛl kedhie mɛtkï në kamaan rɛɛr në keek abï päl awänyden, në baŋ ë cï kek awäc rɔm kedhie.

²⁷ Na de raan töŋ cï wäc ke kuc në yepiɔ̈u, ke gɛm ŋuɛn bou ee run tök ke ye miɔ̈c de kërac.

²⁸ Ku bɛ̈ny de kake Nhialic abï atɛɛm looi në biäk de raan cï wäc ku abï ja päl awɛ̈ɛ̈c.

²⁹ Ku yen ee löŋë, yen abï ya löŋ de raan cï wäc ëbɛ̈n ke kuc në yepiɔ̈u, nɔn yen raan de Yithriɛl ku nɔn yen raanlɛn rɛ̈ɛ̈r ke keek.

³⁰ Ku na cï raan wäc looi ke ŋic, nɔn yen raan ë Yithriɛl ku nɔn ee raan lei, ka ade guöp gääk cï yen Bɛ̈nydït rɛɛc, ku dhoŋ löŋ kɔ̈u adɛɛi yen abïï nɔ̈k.

³¹ Në biäk cï yen kë cï Bɛ̈nydït lueel rɛɛc, ku dhoŋ löŋ tök në lööŋ ke Bɛ̈nydït yiic, thonde anu në yeyeth.

Raan Dhoŋ Löŋ de Thabath Kɔ̈u

³² Të ɣɔn, tɔ̈u ë Yithriɛl në jɔ̈ɔ̈ric, ade raan ë yök ke kuany tiim ke thät në kööl ë Thabath.

³³ Go yiɛ̈n Mothe kekë Aron, ku akutnɔm de Yithriɛl ëbɛ̈n.

³⁴ Agokï tääu aloocic, në luɔi ë kuc kek ke ye luöi raan cï löŋ ë Thabath dhoŋ kɔ̈u.

³⁵ Go Bɛ̈nydït lɛ̈k Mothe an, “Näkkï ee raanë, abïï akutnɔm yen lɛɛr ë wut këc ku biöökë në kur kedhie abïï thou.

³⁶ Go akutnɔm de kɔc ke wut ye lɛɛr ë wut këc ku biöökë abï thou, cït man cïï Bɛ̈nydït ë lɛ̈k Mothe.

Lööŋ ke Buɔn

³⁷ Go Bɛ̈nydït lɛ̈k Mothe an,

³⁸ “lɛ̈kë kɔc ke Yithriɛl ë ke roop buɔn në lupɔɔken thook ënɔɔnë alɔ gut në mïthkɛn bï lɔ̈ɔ̈k tɔ̈u. Ku ë ke yïk buɔn thok guëër kän aräu ëbɛ̈n.

³⁹ Yen ee buɔnë yen abï week aa täk nïïm në lööŋkï, ku dɔ̈tkï keek. Yen acä wek Ɛn bï puɔ̈l ku luɔikï këde piɔ̈ndun.

⁴⁰ Buɔn abï week aa täk nïïm në lööŋkï kedhie, ka wek bï jɔ aa kɔckiën ɣeriic.

⁴¹ Ee yɛn Bɛ̈nydït Nhialicdun, wek aa bɛ̈ɛ̈i keek bei Rip në baŋ bän bɛ̈n aa Nhialicdun. Ee Yɛn Bɛ̈nydït.