Kuɛ̈n 14 - JAM DE NHIALIC 2011

Kɔc Adokkï

¹ Ago akutnɔm de kɔc ruu ke ke kïïu në dhiën ë jiɛthëpiɔ̈u në wɛ̈ɛ̈ric ëbɛ̈n abï piny ruu.

² Aake dok në Mothe kekë Aron, go akutnɔm ëbɛ̈n lueel an, “Aŋuän na ë wo cï thou piny ë Rip, ku nɔn thouku në ee jɔ̈ɔ̈r manë yic eenë!

³ Eeŋö leer ë Bɛ̈nydït wook ee pinyë? Wok bï lɔ nɔ̈k tɔŋ, ku diëërkuɔ, ayï mïthkuɔ abï keek peec. Cïï ŋuɛn pukku röt Rip?

⁴ Agokï lɛ̈k röt kapäc an, “Kuënyku röt bɛ̈ny, ku pukku röt Rip.

⁵ Ago Mothe yenɔm guöt piny kekë Aron në akutnɔm de kɔc ke Yithriɛl nïïm kedhie, kɔc cï guëër.

⁶ Ago Jocua wën ë Nun gɔ̈th ku ret lupɔɔke yiic, ku ret Kalep wën ë Jepuna lupɔɔke yiic ayadäŋ. Ku keek kaarou ayek nëëm ë cï piny lɔ caath në nëëm.

⁷ Gokï lɛ̈k akutnɔm de kɔc ke Yithriɛl cï guëër an, “Yen ee piny wään ciɛɛthku yicë, ee piny piɛth arëët.

⁸ Na mit Bɛ̈nydït piɔ̈u ke wook, abï gäm wook, ee piny ë kuɛth piny ŋic luɔk.

⁹ Duökï göth në Bɛ̈nydït, ku duökï riɔ̈c në kɔc cieŋ piny. Abuk keek rum ëthiäu, Bɛ̈nydït atɔ̈u ke wook, ku ë yiëth tiaam, yiëth wään ee keek kuɔny. Ka week duökï riɔ̈c.

¹⁰ Go akutnɔm de kɔc mat ëbɛ̈n nɔn bïï kek keek biöök në kur abïk thou. Ku ee tëthiinë, ke kɔc kedhie ë ke tïŋ riau de dhuëëŋ ë Bɛ̈nydït atul ëthiäu në paany de mat nɔm.

Mothe Aläŋ Në Biäk de Kɔc

¹¹ Go Bɛ̈nydït lɛ̈k Mothe an, “Kɔckë bïk jɔ cieŋ ë ke biɔn Ɛn guöp agut cï nɛn? Bïk Ɛn jɔ gam nɛn? Yɛn ë göök gɛ̈ɛ̈iyë ke juëc looi në keyiic, ku aŋootkï ke ke cïï ya gam.

¹² Abä keek thöl në jɔɔk tuc thook, ku riääk keek. Ku yɛn bï jur dït arëët gɔl në yïn, jur riil wär keek.

¹³ Go Mothe lɛ̈k Bɛ̈nydït an, “Bɛ̈nydït, yïn aa bïï ee kɔckë bei Rip në riɛldu. Të le kɔc ke Rip kë cïï luöi kɔcku piŋ,

¹⁴ abïk guiëër kɔc cieŋ ee pinyë. Ku kɔckë yiëthken aŋickï nɔn tɔ̈u yïn wekë wook, Bɛ̈nydït. Në luɔi yïn wo wat në mën de piööl ë luätic aköl, ku wat wook në mën de biöl ë macic wakɔ̈u.

¹⁵ Ku ënɔɔnë, na jɔ kɔcku nɔ̈k kedhie raan tök, abïï juöör wään cï täudu piŋ lueel an,

¹⁶ “Bɛ̈nydït ë thueet ke cïï kɔcke be lɛɛr piny wään cï yen kuëëŋ, nɔn bï yen ke lɛɛr thïn, ka acï keek nɔ̈k ë jɔ̈ɔ̈ric.

¹⁷ Ku ënɔɔnë, Yïn läŋ Bɛ̈nydït nɔn nyuth yïn wook riɛldu, ku loi kë wään bä than an,

¹⁸ “Ee Yɛn Bɛ̈nydït, yɛn cïï piɔ̈u ee dap diu. Ku yɛn tɔ̈u wokë nhiëër agɔk, ku päl de awɛ̈ɛ̈c. Ku këdï acïï nɔm ee lööny piny, yɛn ee mïth luöi këtuc, ayï mïthken në awäny ë wärken ayï kuarken!

¹⁹ Ku ënɔɔnë Bɛ̈nydït, në biäk de nhiëërduön cïï rɔt ee waar, yïn läŋ në biäk de nhiëër agɔk, nɔn pɛ̈l yïn kɔckë awänyden, cït man wään yïn cool pɛ̈l yïn awɛ̈ɛ̈c ë cieŋ ë jël kek Rip.

²⁰ Go Bɛ̈nydït puk nɔm an, “Abä keek päl awɛ̈ɛ̈cken cït man cïn ë lueel.

²¹ Ku ë yic, cït man täu Ɛn në ee pinyë nɔm, ku cït man bï kɔc ke piny nɔm thiäŋ në dhuëëŋdï kedhie,

²² acïn raan tök në ee kɔckë yiic bï tɔ̈u abï ɣet piny cä than. Acïk riaudïït lɔ wic tïŋ, riau de dhuëëŋdï, ku tïŋkï göökdït ke gäi ɣɔn bä looi Rip, ayï jɔ̈ɔ̈ric ayadäŋ, ku ŋootkï ke ke ye ya them ë cieŋ, ku reeckï këdï gam.

²³ Acïkï duëër kɔn lɔ piny wään thɔ̈n kuarken ananden. Acïn raan töŋ de ee kɔc reec Ɛn bï kɔn lɔ thïn ë tɔt.

²⁴ Ku në biäk nu Kalep, awundï ke wuöc ke keek, ku ŋoot ke riëëu Ɛn, abä bɛ̈ɛ̈i piny wään cï lɔ caath, ku piny abï lɔ̈ɔ̈k aa piny de mïthke.

²⁵ Yen ee bäny man rëër ë kɔc ke Amalek thïn, ayï kɔc ke Kanaan. Puɔ̈kkï röt ë jɔ̈ɔ̈ric miäk aduduur, thuöörkï wenïïm Wɛ̈ɛ̈r Thith.

Bɛ̈nydït Alui Kɔc Këtuc në Biäk de Dok.

²⁶ Go Bɛ̈nydït lɛ̈k Mothe kekë Aron an,

²⁷ “Ee nɛn yen bïï akutnɔm cï thiäŋ në awɛ̈ɛ̈cë dok puɔ̈l në yɛn? Yɛn ë dok kithic piŋ tëde kɔc ke Yithriɛl.

²⁸ Ka week lɛ̈kkï keek an, “Acïï Bɛ̈nydït lueel an, ‘Yɛn ë kuëëŋ në rëërdï yic ëbɛ̈n nɔn bän ke cäk lueel ke piɛŋ looi cït man ë kë kaarkï. Ee yɛn aa luel ee kënë yɛn Bɛ̈nydït.

²⁹ Wek bï thou në ee jɔ̈ɔ̈rë yic wedhie wek kɔc cï ya jääm guöp, gɔl në raan ee run thiërrou ku le nhial.

³⁰ Ku acïn raan tök në weyiic, bï bɛ̈n piny ɣɔn cän kuëëŋ nɔn gäm Ɛn en week. Ee Kalep wën ë Jepuna, kekë Jocua wën ë Nun kaarou, kek abï lɔ.

³¹ Ku mïthkuön wään cak lueel an bï ke lɔ peec, kek abä lɔ tɔ yök piny wään rɛɛckï miɛt.

³² Na week, wek bï thou në jɔ̈ɔ̈ric ee në.

³³ Ku mïthkun abïk tai në jɔ̈ɔ̈ric në run kathiërŋuan ke ke gum abï raan töŋ thïk wecök kɔn thou. Në baŋ cä wek Ɛn dhɔ̈ŋ röl.

³⁴ Wek bï gum në biäk de awänydun në runiic kathiërŋuan. Kööl tök, në akööl ɣɔn caath wek piny kathiërŋuan, abï nɔm aa ruöön tök. Yen abä wek en jɔ ŋic ëgɔk nɔn cän piɔ̈u diu.

³⁵ Acä lueel yɛn Bɛ̈nydït, nɔn bän week luöi ee kake kedhie, wek akutnɔm de kɔc cï thiäŋ në awäc, kɔc mät agɔ̈th ku pukkï röt Ɛn wedhie. Wek bï thou në jɔ̈ɔ̈ric ee në wedhie. Acä lueel yɛn Bɛ̈nydït.

³⁶ Ku nëëm ɣɔn tooc ë Mothe lek piny caath, nëëm wään lɔ kɔc yiɛ̈n thoŋ rac, ku tɔkï akutnɔm de kɔc jiëëm Bɛ̈nydït guöp,

³⁷ kek ee nëëm ë bïï thoŋ rɛɛcë, acïï Bɛ̈nydït keek bɛ̈n nɔ̈k në jɔŋ tuc thok, agokï thou në cökiic ëtɛ̈ɛ̈n.

³⁸ Ee Jocua kekë Kalep kek ë bɛ̈n döŋ ke ke kën thou në nëëmiic kathiëër ku rou.

Tɔŋ Tueŋ Them ë Pɛ̈c de Piny.

³⁹ Na wën, aa lëk ë Mothe kɔc ke Yithriɛl kedhie ke cïï Bɛ̈nydït lueel, ke ke dhiau piɔ̈ɔ̈th arëët.

⁴⁰ Na ɣɔn amiäk aduduur, ke ke riɛɛl tɔŋ nhial në wuöt nu piny ë kuur luelkï an, “Ënɔɔnë, wok lɔ piny cïï Bɛ̈nydït thɔ̈n wook. Acuk gam nɔn cïï wok wööc.

⁴¹ Go Mothe ke jɔ̈ɔ̈ny lueel an, “Tiëŋkï, wek be ŋoot ke we reec Bɛ̈nydït thok ënɔɔnë, ka bäk tiam adï?

⁴² Duökï lɔ, Bɛ̈nydït acïï tɔ̈u ke week. Kɔc ka ater abïk week lɔ tiaam.

⁴³ Të la wek rɔ̈m në kɔc ke Amalek, ku kɔc ke Kanaan, abïk week nɔ̈k tɔɔŋ wedhie, Bɛ̈nydït acïï bï tɔ̈u ke week, në biäk cä wek jaai ke cäkkï kuany cök.

⁴⁴ Gokï nɔm riɛl ŋak, ku leerkï tɔŋ piny ë kuur, ku dɔ̈ŋ athänduŋ de män ë Bɛ̈nydït kekë Mothe wut.

⁴⁵ Ago kɔc ke Amalek mat në kɔc ke Kanaan rɛ̈ɛ̈r ëtɛ̈ɛ̈n piny ë kuur, gokï ke tiaam ku copkï keek abïk ɣet të cɔl Ɣorma.