Kuɛ̈n 11 - JAM DE NHIALIC 2011

Të Cɔl Tabera

¹ Go kɔc ke Yithriɛl dok ke piŋ ë Bɛ̈nydït në biäk de katuc cïk yök. Na wën, apiŋ ë Bɛ̈nydït keek, ke göth arëët, go many agönhde dëp në keyiic, go ɣööt nu në wut këc nyuɔp piny.

² Go kɔc Mothe kiiu luɛ̈k keek. Go Mothe Bɛ̈nydït lɔ̈ŋ, go mac liu.

³ Go ëtɛ̈ɛ̈n cäk an Tabera (aluel nyop), në baŋ ë cïï many ë Bɛ̈nydït dëp në keyiic.

Mothe Akuany Bäny Kathiërdhorou.

⁴ Ku aa de alɛi rac ë nu ë keyiic, kɔc nhiaar cuën ë rïŋ, acïï mïnh ë kacaam kɔ̈k keek bɛ̈n guɔ dɔm. Arëk abï kɔc ke Yithriɛl bɛ tɔ dok aya luelkï an, “Ka jɔku rïïŋ cuetku yök ënou!

⁵ Wok ë rec ke Rip tak, rec wään yok cuet baaŋ tei të cïn ɣɔ̈ɔ̈c, ku camku ajuur, ayï apëët, ayï apët dït, ayï abathɔɔl, ayï abathɔɔl tum kedhie acuk keek tak.

⁶ Ku ënɔɔnë, wok ë nïïm tiëk. Acïn këcam däŋ liŋliŋ ee mana yetök gilïŋ yen yok cool ë ciɛm wok en aköölnyïïn ëbɛ̈n acïn pëk.

⁷ Ku mana aaye këthiin cït mɛnh ë wɛ̈ɛ̈l cɔl kedhbera ke ye nyin kän lɔu.

^8-9 Aa ye kɔc en lɔ jok, ku bïk bɛ̈n tiɔ̈p në kuur, ku nɔn ɣɛ̈ɛ̈l kek en në doŋ. Ku ciëpkï në töny, ku nɔn thalkï ke ye keek. Ku keek ë thal në yen, ee ciët kuïn cï pam cï yiɛ̈k yic miök. Ku mana aaye löny kekë thäc wakɔ̈u të cïï thäc bɛ̈n.

¹⁰ Go Mothe kɔc piŋ ke ke kïïu në ɣööt thook kedhie, ŋɛk ɣönde kekë baaide. Go Bɛ̈nydït piɔ̈u diu arëët, ku gɔ̈th Mothe.

¹¹ Go Mothe Bɛ̈nydït luɔp an, “Eeŋö looi yïn Ɛn arac aya, Bɛ̈nydït? Eeŋö cä wäc yïn, ke tɛ̈ɛ̈u yïn nuan de ee kɔckë ëbɛ̈n në yayeth?

¹² Ee yɛn ë cak keek? Ee yɛn ë dhiëth keek? Ka eeŋö tɔ yïn ke guööc cït man ye awut meth boom në yeyɔu, abïk ɣet piny ɣɔn bï yïn kuëëŋ an bä gäm kuarken?

¹³ Bä rïïŋ dïït bï ke lëu kedhie jɔ yök ënou ënɔɔnë? Ayek cool ë kïïu ke ke kɔɔr rïïŋ cuetkï.

¹⁴ Kɔckë kedhie acä keek bï lëu në guöc yatök. Nuanden adït arëët acä bï lëu.

¹⁵ Na ee luɔi bï yïn Ɛn looi ka, ke yï kok piɔ̈u wekë yɛn, ku näk Ɛn ënɔnthiinë, ke ya cïï riääkdï bï tïŋ.

¹⁶ Go Bɛ̈nydït lɛ̈k Mothe an, “Yiɛ̈në ya kɔc kathiërdhorou në röördït ke Yithriɛliic, kɔc lëu bääny në keyiic. Bɛ̈ɛ̈iyë keek në paany de mät thok, ku kääcë wekë keek ëtɛ̈ɛ̈n.

¹⁷ Yɛn bï bɛ̈n piny bä bɛ̈n jam wokë week ëtɛ̈ɛ̈n. Ku Yɛn bï wëi kɔ̈k nööm në wëi wään cä gäm yïn, ku gäm ke keek. Ku abïk yïn kuɔny në nuanden, ke yï cï bï bɛ nuan yïtök.

¹⁸ “Ku lɛ̈kë kɔc an, ‘Wakkï abäk gup lɔgɔk, në baŋ bä wek cuet në rïŋ miäk. Bɛ̈nydït ë dhiëndun piŋ, ayï luɔi kaar wek rïŋ, ayï luɔi cä wek ë lueel an ë we cï lɔ̈ŋ ɣɔn tɔ̈u wek Rip. Ku ënɔɔnë, Bɛ̈nydït abï we gäm rïŋ bäk cuet.

¹⁹ Ku acie rïïŋ bäk cuet në kööl tök tei, ku nɔn yen kööl kaarou, ku nɔn yen kööl kadhïc, ku nɔn yen kööl kathiëër,

²⁰ abäk cuet në pɛɛi yic ëbɛ̈n, man abäk nïïm tiëk në yen, ku thiɛkkï yïth në ye. Ku abï tɔ̈u aya, në biäk cä wek Bɛ̈nydït rɛɛc ke tɔ̈u në weyiic, ku eeŋa në we yiic, raan ee dok në Yen an adï kɛ̈nkï jäl ë Rip taitai.”

²¹ Go Mothe lɛ̈k Bɛ̈nydït an, “Tïŋ da, wok ee 600,000 wodhie, ku luel an bä wook gäm rïŋ buk cuet në pɛɛi yic ëbɛ̈n?

²² Ee luuny ke ɣɔ̈k ku thök kek bä jɔ nɔ̈k bï ke lëu? Na cakaa lɛɛuwë wɛ̈ɛ̈ric bei në rec ëbɛ̈n duëër keek lëu?

²³ Go Bɛ̈nydït pɔ̈k Mothe nɔm an, “Ye tak kënë duëër Ɛn ban në luɔi? Abä tïŋ ënɔɔnë, na bï ke cä lueel rɔt lëu në luɔi ku nɔn cïï rɔt bï lëu!”

²⁴ Go Mothe kɔc guiëër ke cïï Bɛ̈nydït lueel. Ku kuɛ̈ny röördït nu në kɔc nïïm kathiërdhorou. Ku leer keek në paany ë mät thok.

²⁵ Na wën, ke Bɛ̈nydït ë bɔ̈ piny në luätic, ku jiɛɛm ke Mothe. Go wëi kɔ̈k nööm në wëi wään cï gäm Mothe, ku gëm keek röördït kathiërdhorou. Na wën, alɔ wëi lɔ në keyiic, ke ke go jam cït man ë tït, ka ee luɔi kën en bɛ̈n cieŋ.

²⁶ Ku kɔc kaarou, në ee kɔckë yiic kathiërdhorou, Eldad kekë Medad, acïk bɛ̈n döŋ wut ke ke cïï lɔ në paany ë mät thok. Ku wëi acïk bɛ̈n lɔ në kegup ëtɛ̈ɛ̈n ayadäŋ, agokï bɛ̈n jam cït tït.

²⁷ Go wën dhuŋ koor kat ke lɔ të nu Mothe le lɛ̈k en an, “Eldad kekë Medad ajamkï cït tït wutic.

²⁸ Go Jocua wën ë Nun bɛ̈n gɔ̈th (Yen aa cïï Mothe lɔ̈c rɔt bï yen aa kuɔny), ku lëk Mothe an, “Tɔ keek mim thook bɛ̈ny.

²⁹ Go Mothe lɛ̈k en an, “Eeŋö dɔm ë tiɛɛl yïn në këdï? Na ee këdï, Bɛ̈nydït aduëër kɔcke gäm wëi kedhie, ku tɔ keek ee tït kedhie.

³⁰ Na wën, ke Mothe ë jɔ yenɔm puɔ̈k wut kekë röördït ke Yithriɛl.

Bɛ̈nydït Atooc Dhuööl ë Thɔ̈rɔ̈ɔ̈l

³¹ Go Bɛ̈nydït yom tuööc, yom bïï dhuööl ë thɔ̈rɔ̈ɔ̈l bei wïïr. Ku tɔ ke pär ë ke nyär piny tëthiɔ̈k në ke cït mitïr tök. Gokï bɛ̈n nyuc në wut këc të thiɔ̈k ku geeukï wut piny ke ke kuöt nïïm.

³² Go kɔc cool ke ke döm, ku ruukï ke ke döm në ee köölë, ku lɔ kööl lɔ në yecök. Acïn luɔi däŋ pei cïk bɛ̈n aa looi. Wut ëbɛ̈n ë kajuëc bɛ̈n dɔm, ku raan ë dɔm ka lik aa pëk në cual kathiëër. Gokï ke tiiriic ku kärkï keek biic.

³³ Na wään, aŋoot rïŋ ke kith, ke Bɛ̈nydït ë diu piɔ̈u ke keek go keek tuöc jɔɔk.

³⁴ Gokï ëtɛ̈ɛ̈n cäk an Kibroth Ɣataaba (yen aye “Rɛ̈ŋ ke amamïth në thoŋda”), në biäk ë cï kek kɔc de thook mïnh ë rïŋ thiɔ̈k thïn.

³⁵ Ku në Kibroth Ɣataaba ëtɛ̈ɛ̈n, acïk bɛ̈n kuɛɛth Ɣadheroth, të wään cïï kek bɛ̈n lɔ piɔ̈ɔ̈t thïn.