Kuɛ̈n 10 - JAM DE NHIALIC 2011

Kɛŋ Ke Maläŋ

¹ Go Bɛ̈nydït lɛ̈k Mothe an,

² “Loi kɛŋ ke atek kaarou në atek cï deŋ, ke bï yïn ke akutnɔm de kɔc aa cɔɔl, ku lueel yïn ke kuɛth kuëëth ë kɔc.

³ Ku të cï ë keek koothiic kaarou, ke akutnɔm de kɔc kedhie abïk aa guëër në yïlɔ̈ɔ̈m në paany de mät thok.

⁴ Ku na ee kaaŋ tök yen ë koothic, ke ye bäny ke dhiëën ke Yithriɛl kek abï ya guëër në yïlɔ̈ɔ̈m kapäc.

⁵ Të cïï kaaŋ kooth në kë tueŋ, ke dhiën nu të lɔ aköl amiäk ë ke käp.

⁶ Ku të cïï kaaŋ bɛ nyɔk në kuöth ye kek rou, ke dhiën nu të lɔ wöuwic ë ke käp. Kaaŋ abï ya kooth të kuëëth ë wut.

⁷ Ku kaaŋ cɔɔl ë amatnɔm bïk kenïïm kut, abï ya kooth tei ke cïï guëlë yic.

⁸ Ku ee wɛ̈ɛ̈t ke Aron, bäny ke kake Nhialic kek abï kɛŋ aa kooth. “Ku kënë ee cöök bäk döt anandun agut cï rɛm bɔ̈ ciëën.

⁹ Ku të yiɛ̈n wek kɔc ke ater tɔŋ, kɔc yɔŋ week, ke we koth kɛŋ ke tɔŋ. Ku yɛn, yɛn Bɛ̈nydït Nhialicdun, wek bä kony ku luäk week në kɔc ke ater.

¹⁰ Ku në kööl ë dhuëëŋ ayadäŋ ke we koth kɛŋ, dhuëëŋ cak mäc akööl, ayï dhuëŋkuön ke wil ë pɛ̈i. Yak ke kooth të gam wek miɔ̈c ye nyop ëbɛ̈n, ayï miɔ̈c de mät. Ku ëtɛ̈ɛ̈n, abïk Bɛ̈nydït Nhialicdun ee täk nɔm në week.

Yithriɛl Akuëth Thinai.

¹¹ Ku në kööl ye pɛɛi ye pɛ̈i rou thok thiërrou, në ruöön ye run rou, ke luät ë jël në paany ë mät nɔm.

¹² Go kɔc ke Yithriɛl kɔ̈p ayadäŋ në jɔ̈ɔ̈r de Thinai. Go luät lɔ kɔ̈ɔ̈c në jɔ̈ɔ̈r de Paranic.

¹³ Ku kɔc ke Yithriɛl kuëth ke ke cï röt kiëët në dhiën, cït man cïï Bɛ̈nydït ye lɛ̈k Mothe.

¹⁴ Go wut biäk de Juda kɔn lɔ tueŋ në kɔc mät në keek. Ku Nacon wën ë Aminadab yen aaye bɛ̈nydɛn wat keek.

¹⁵ Ku Nethaniɛl wën ë Dhuwar aa nu në wut biäk de dhiën ë Yithakar nɔm,

¹⁶ Ku Eliap wën ë Ɣelon aa nu në wut biäk de dhiën ë Dhebulun nɔm.

¹⁷ Go paany de mät dɔ̈k, ku kɛ̈p ë Lebai ke Gercon en kekë Merari ku lek kueer.

¹⁸ Ku lɔ wut biäk de dhiën ë Ruben në kecök në kɔc mät në keek. Ku Elidhur wën ë Ceduer yen aaye bɛ̈nydɛn nu në kenïïm.

¹⁹ Ku Celumiel wën ë Dhuricadai yen aa nu në dhiën ë Thimion nɔm.

²⁰ Ku Eliathap wën ë Dewel yen aa nu në dhiën ë Gad nɔm.

²¹ Ku lɔ Lebai ke dhiën ë Koɣath në kecök ke ke ɣɛɛc kaɣeriic ke paany de mät. Në luɔi ë kɔɔrë yen nɔn bï paany kɔn mac piny ke ke kën guɔ ɣet.

²² Ku lɔ wut biäk de Eparaim në kecök në kɔc mät në keek. Ku Elicama wën ë Amiɣud yen aaye bɛ̈nydɛn nu në kenïïm.

²³ Ku Gamaliel wën ë Pedadhur yen aaye bɛ̈ny nu në dhiën ë Manatha nɔm.

²⁴ Ku Abidan wën ë Gidiɔni yen aaye bɛ̈ny de dhiën ë Benjamin.

²⁵ Ku wut biäk de dhiën ë Dan kekë kɔc mät në keek kek aa löök kɔc thïk cök ciëën kedhie, ka ee kek ë gël kɔc kɔ̈ɔ̈th ciëën. Ku Aɣidher wën ë Amicadai yen aaye bɛ̈nydɛn nu në kenïïm.

²⁶ Ku Pagiel wën ë Wokran yen aaye bɛ̈ny nu në dhiën ë Acer nɔm.

²⁷ Ku Aɣira wën ë Enan yen aaye bɛ̈ny nu në dhiën ë Naptali nɔm.

²⁸ Ku yen luɔi ë ye Yithriɛl rɔt kiëët ka, të kuëëth kek.

²⁹ Go Mothe lɛ̈k wën thuönde Ɣobap wën ë Rewel raan wun ë Midian an, “Wokï lɔ piny ɣɔn cïï Bɛ̈nydït thɔ̈n wook an bïï gäm wook. Acïï Bɛ̈nydït than nɔn bï yen Yithriɛl lɔ gäm kapiɛth kith ëtɛ̈ɛ̈n. Ka yïn, bä cathë we wook ëtök, ke yïn bï kapiɛthkë lɔ rɔm we wook.

³⁰ Go jai lëk Mothe an, “Ei, yɛn cïï lɔ! Yɛn puk a nɔm wunda në kɔckï yiic.

³¹ Go Mothe ye lɔ̈ŋ lëk en an, “Du jäl yïn läŋ, ee yïn aŋic jɔ̈ɔ̈ric të bï wok lɔ piɔ̈ɔ̈t thïn, ka ee yïn abï wo caath.

³² Ku të le yïn caath we wook, yïn buk miɔɔc në këriëëc piɛth cïï Bɛ̈nydït gäm wook ëbɛ̈n.

Kɔc ke Yithriɛl Akuëthkï

³³ Na wën, aa jäl kɔc ke Yithriɛl në kuur ë Bɛ̈nydït lɔ̈ɔ̈m, kuur ɣeric, acïk nïn kadiäk bɛ̈n nööm ke ke cath. Ku athänduŋde män ë Bɛ̈nydït ë keek bɛ̈n wat në ee nïnkë yiic kadiäk ke köör keek të bï kek lɔ piɔ̈ɔ̈t thïn.

³⁴ Ku të ë ye kek kuëëth ëbɛ̈n, luän ë Bɛ̈nydït aaye nu në kenïïm nhial aköl ëbɛ̈n.

³⁵ Ku të cï athänduk jäl, aaye Mothe lueel an, “Jɔt rɔt Bɛ̈nydït ku thiäi kɔc de wek ater, ku cop kɔc göth në yïn.

³⁶ Na lë acï athänduk kɔ̈ɔ̈c, ke lueel ë Mothe an, “Bɛ̈nydït, Puɔ̈kë rɔt aguum kathiëër ke aguum ke kɔc ke Yithriɛl.