Kolothai 4 - JAM DE NHIALIC 2011

¹ Wek bäny de lïïm, yak lïïmkun gäm ka röŋ ë luɔiden, yak ke miɔɔc ë ke kiëëtkï, aŋiɛckï nɔn dɛ wek Bɛ̈nydun aya paannhial.

Wëët

² Yak cök ë cuɔɔl wek ë lɔ̈ŋ, ku yak röt tiit thïn në luɛl aa wek e dap lueel an, thieithieei.

³ Ku yak lɔ̈ŋ në biäkdï ayadäŋ, ke Nhialic bï wo liëp ɣöt thok, ɣön ë guiëër ë wël, buk jam de Kërtho aa guiir, këcïmoony, jam cï a mac në biäkde aya.

⁴ Yak lɔ̈ŋ, ke ya bï jam tɔ tiëc ëgɔk, cït man aa yɛn en dhil lueel.

⁵ Rɛ̈ɛ̈rkï në kɔc nu biic ë rëër ë kɔc pelnïïm, ku yak ka ke ënɔɔnë wɛ̈ɛ̈r bei ë këracic.

⁶ Yak jamdun tɔ cath ke dhuëëŋdepiɔ̈u anandun cït man ë kuïn cï wac ë amilɔ, ke we bï këde raan ëbɛ̈n ŋiëc bɛ̈ɛ̈r apiɛth.

Thiëc Ciëën

⁷ Täudï ëbɛ̈n abï Tukiko lɛ̈k week, ee mɛnhkënëdan nhiaar, ku ye raan ee käŋ döt ë luɔi, raan ee wok lïïm ëtök ë Bɛ̈nydïtic.

⁸ Yen aa tuöc ɛn en week, ke we bï täuda ŋic, ku bï we muk piɔ̈ɔ̈th.

⁹ Yen kekë Onethimo, mɛnhkënëdan adöt ku nhiaar, ku ye raandun. Kek abï we tɔ ŋic ka cï looi eenë kedhie.

¹⁰ Wek thiëëc Aritharko raan mɛc wok ëtök, ku wek thiëëc Mak aya, wën ë nyankënë Baranaba (we cï yiɛ̈n thok në këde, të cï en bɛ̈n tëde week, ke damkï).

¹¹ Ku Yecu, raan cɔl Juthutho aya, kekë kɔc nu ë aŋueel yiic, kɔckë kapäc ayek kɔc luui wok ëtök në këde ciɛɛŋ de Nhialic, kɔc cï a muk piɔ̈u.

¹² Wek thiëëc Epapara, raandun, ku ye raan ee Yecu Kërtho luööi, ee cool ë nɛ̈k rɔt piny ë lɔ̈ŋdeyic në biäkdun, ke we bï aa kɔ̈ɔ̈c aril, ke we bï piɔ̈ɔ̈th aa dikëdik ku kuɛthkï në këde piɔ̈n ë Nhialic ëbɛ̈n.

¹³ Yɛn ee cäätɔ de lɛ̈th ee yen yic lɛ̈th ë luɔi arëët në biäkdun, ku në biäk de kɔc nu Laodikia, ayï kɔc nu Kierapoli.

¹⁴ Wek thiëëc Luk, akïm nhiaar, ku Demath.

¹⁵ Thiëckï mïthëkɔckuɔn nu Laodikia, ku Numpa, ku ɣön ë Nhialic nu ɣönde.

¹⁶ Ku të cï awerekë kueenic ë weyiic, takï kuen ë ɣön ë Nhialic de kɔc ke Laodikia yic aya, ayï week, we bï këde Laodikia kueenic aya.

¹⁷ Ku yɔ̈ɔ̈kkï Arkipo an, “Ye luɔi tiit apiɛth luɔi cï yök tëde Bɛ̈nydït, abä thöl apiɛth.”

¹⁸ Thiëcdiën ë yɛn ciin kï, yɛn Paulo. Takkï wenïïm ë joth mac ɛn ke. Ë dhuëëŋdepiɔ̈u tɔ̈u ke week Amiin.