Kolothai 3 - JAM DE NHIALIC 2011

¹ Ku ënɔɔnë, të cï we jat nhial në Kërtho ëtök, yak ka nu tënhial kɔɔr, të rëër ë Kërtho thïn, ke rɛ̈ɛ̈r ë ciin cuëny de Nhialic.

² Yak wepiɔ̈ɔ̈th tuöm ka ke tënhial, duökï wepiɔ̈ɔ̈th ee tuöm ka nu ë piny nɔm.

³ Wek cï thou, dï, ku pïïrdun acï thiaan kekë Kërtho ë Nhialicic.

⁴ Miäk, të tïcë Kërtho pïïrda, ke we bï tïc aya në yen ëtök ë dhuëëŋic.

Pïïr Thɛɛr ku Pïïr ë Piac Bɛ̈n

⁵ Yak ka ke wegup tɔ thou, ka nu ë piny nɔm, kɔ̈ɔ̈rëdiäär, luɔi col, tum ee raan e piɔ̈u tuöm ka ke piny, ŋɔ̈ɔ̈ŋ de kërac, ku wui de kalei, yen aye läm de yiëth.

⁶ Ee biäk de kakë yen abï agönh ë Nhialic ë kɔc reec gäm nïïm.

⁷ Ku wek aya we ye rëër ë kɔckë yiic, ɣɔn aa wek cool ë luɔɔi wek kake.

⁸ Ku ënɔɔnë, pälkï kakë kedhie ayadäŋ: agɔ̈th, dïtëpiɔ̈u, racdepiɔ̈u, lɛ̈ɛ̈t, jam ë rɔ̈ɔ̈th ëbɛ̈n bei ë wethook.

⁹ Ë ŋɛk ë cïï ŋɛk ee tɔ̈ɔ̈r lueth, në päl cä wek raan thɛɛr pɔ̈l kekë luɔide,

¹⁰ ku cäk raan ë piac cak tääu abäk cieŋ, raan ë be ë Nhialic cak Aciëŋde, ke bï käŋ ŋic ëgɔk, ku bïï ciët täu de raan ë cak en.

¹¹ Ku tɛ̈ɛ̈n acïn Girikii nu ku cïn Judai, ku cïn aŋuɛl nu ku cïn raan cie aŋuɛl, ayï Jur rɛɛc ë ciɛɛŋde, ayï Thekuka, ayï lïm, ayï raan lääu nɔm, abï ciën këdäŋ, ku Kërtho yen aye këriëëc ëbɛ̈n, ku nu ë käŋ yiic kedhie.

¹² Yen dam wek piɔ̈n ë dap kok, cït kɔc cïï Nhialic lɔc, kɔc ɣeriic ku nhiaar ke, ku damkï dhuëëŋ, ku piɔ̈n koor, ku kuur ee raan rɔt kuɔɔr piny, ku rëër ëmääth, ku guöm de kajuëc.

¹³ Yak rëër apiɛth ëtök, yak röt pɔ̈l wapäc, të de en raan de nɔm gööny kekë raan däŋ, acït man cï Kërtho we pɔ̈l, ke we ye röt pɔ̈l aya.

¹⁴ Ku në kakë yiic kedhie yak nhiëër dɔm, yen aye kën ee käŋ mat yiic abïk aa dikëdik.

¹⁵ Yak män ë Kërtho tɔ rɛ̈ɛ̈r ë löŋ nɔm ë wepiɔ̈ɔ̈th, yen ee cɔ̈t ë cɔɔlë week në guöp tökic, ku yak dap lueel an, thieithieei.

¹⁶ Yak jam de Kërtho tɔ rɛ̈ɛ̈r ë weyiic në pɛlënɔm ëbɛ̈n, abäk kuɛth ë ye, yak röt wɛ̈ɛ̈t wapäc ku yak wenïïm tak në diɛt, ku diɛt ke Nhialic ku diɛt ke Wëidït, ku yak Bɛ̈nydït kɛ̈t në miɛt ë wepiɔ̈ɔ̈th.

¹⁷ Ku na de kë luɔikï, nɔn ee yen jam ku nɔn ee yen luɔi, yak ke looi ëbɛ̈n në rin ke Bɛ̈nydït Yecu, ke we ye Nhialic Wääda yɔ̈ɔ̈k an, thieithieei, në këde.

Rëër de Kɔc ë Pïïr ë Piac Bɛ̈n Yic

¹⁸ Wek diäär, yak tɔ̈u ë röörkun cök, cït man röŋ en ë Bɛ̈nydïtic.

¹⁹ Wek röör, nhiaarkï diëërkun, ku duökï piɔ̈ɔ̈th ee rac ë keek.

²⁰ Wek mïth, yak ka ke kɔc ë dhiëëth week piŋ ë këriëëcic ëbɛ̈n, kënë amit ë Nhialic piɔ̈u.

²¹ Wek wärken ë mïth, duökï mïthkun ee jut ë jam, ke ke cïï piɔ̈ɔ̈th bï bäp.

²² Wek lïïm, yak ka ke bänykun piŋ, bäny ceŋ wegup, duökï ee luui ë kë woi kɔc, cït man ë kɔc ë kɔc math nyïïn, yak luui në piɔ̈n cïnic anäinäi, në riëëu riëëu wek Nhialic.

²³ Na de kë luɔikï, ke luɔikï ë wepiɔ̈ɔ̈th thïn, cït man aa wek Bɛ̈nydït luööi, ku cäkkï kɔc ee luööikï tei.

²⁴ Në ŋïny ŋiɛc wek cöökë an, ee tëde Bɛ̈nydït, yen bä wek käŋ lɔ̈ɔ̈k lak ka bï aa ariöpdun, ee Bɛ̈nydït Kërtho yen aluööikï.

²⁵ Ku raan ë kërac looi abï këde yök në kërɛɛc cï looi, ku kuëny bï kɔc aa kuany yiic aliu.