Kolothai 2 - JAM DE NHIALIC 2011

¹ Ku yɛn kɔɔr luɔi bä wek e ŋic biök dïït aa yɛn biök në biäkdun, ku në biäk de kɔc nu Laodikia, ku në biäk de kɔc kɔ̈k kedhie kɔc kën a tïŋ nyin ë guöpic.

² Ke ke bï muk piɔ̈ɔ̈th, ku matkï ëtök në nhiëër, ku në kuɛth bï kek kuɛth në ŋïny ŋic kek käŋ ëgɔk agokï këcïmoony de Nhialic ŋic, yen aye Kërtho,

³ raan cï kapiɛth cï kueet thiaan ë yeyic ëbɛ̈n, ka ke pɛlënɔm ku ŋïnydekäŋ.

⁴ Cöökë en a luɛɛl, ke cïn raan bï we math në wëŋ ee yen kɔc wëŋ ë yeliep.

⁵ Ku yɛn, acakaa yɛn ë liu guöp, ke yɛn nu wokë week ë wëi yiic, ke ya mit piɔ̈u në wui wɔi ɛn kïït aa wek jamdun kiëët ku kɔ̈ɔ̈c kääc wek tëdun aril në gämduön nu ë Kërthoyic.

Kuɛth ë Pïïr në Yecuyic

⁶ Yen ka, acït man cä wek Kërtho Yecu Bɛ̈nydït nööm, yen rɛ̈ɛ̈r wek ë yeyic aya.

⁷ Ku takï meeidun ɣet ë yeyic, ku we bï yïk ë yeyic, ku yak kɔ̈ɔ̈c aril në gämic, cït man cï we wɛ̈ɛ̈t, ku yak kuɛth ë gäm abäk thieithieei dap aa lueel.

⁸ Yak röt tiit, ke cïn raan bï we puk piɔ̈ɔ̈th në nhiëër ë pɛl ku në ruëëny ɣɔ̈ric, në jam thɛɛr ë kɔc, ku në jam de jɔɔk ke piny nɔm, jam cie këde Kërtho.

⁹ Yen aye raan rëërë kuɛth ë Nhialic ëbɛ̈n ë yeguöp.

¹⁰ Ku we cï kuɛth ë yen, raan nu ë bäny nïïm kedhie ku nu ë riɛl nɔm ëbɛ̈n.

¹¹ Ku we cï cueel ë yen në cuɛ̈l kënë looi ë raan ciin, ee luny cä wek guöp de rïŋ luöny bei, në cuɛ̈l cïï Kërtho we tɔ cuel.

¹² We cï tɔ̈ɔ̈u në yen ëtök në baptith, ku we cï bɛ jɔt thïn aya, në gäm cä wek luɔi de Nhialic gam, Raan ë jɔt en ë kɔc cï thou yiic.

¹³ Ku week, wek kɔc ɣɔn cï thou në karɛckun, ku në luɔi kënë rïïŋdun cueel, we cï bɛ tɔ pïïr në yen ëtök, të cï en karɛckuɔ päl wook kedhie,

¹⁴ ku cï jam cï gɔ̈ɔ̈r ë lööŋ yiic cuöth bei, kë de ater ke wook: ago nyaai ë woyiic, në piëët cï en e piäät ë tim cï rïïu nɔm kɔ̈u.

¹⁵ Ɣɔn cï en bäny yak ayï riɛl, tɔ ke ë ka bï kɔc woi, ago keek thel në tiëm cï en ke tiaam ë yen.

¹⁶ Yen duö wek röt ee tɔ jiëëny raan në këde këcam ku në këde ka dek ayï kööl ke dhuëëŋ, ayï pɛɛi cï wil ayï kööl ë Thabath:

¹⁷ Kakë ayek atiëp de ka bï bɛ̈n, ku guöp ee këde Kërtho.

¹⁸ Duökï röt tɔ pënë raan ariöpduön bäk yök, në kuur ee yen rɔt kuɔɔr piny ku läm ee yen tuucnhial lam, raan ë pëk ë ke cï yök ë nyuöthic, ee rɔt tɔ dït ë ɣɔ̈ric, në piɔ̈ndɛn cï tuöm ka ke piny,

¹⁹ ku cïï Nɔm ee muk aril, Nɔm ee guöp ëbɛ̈n tɔ dït ë Nhialic, në muŋ cï e muk ku män cï en rɔt mat në yomnyïïn ku räl.

Thuɔɔu ku Pïïr në Yecu

²⁰ Ku të cä wek thou në Kërtho ëtök, të lɔ ka ke piny nɔm, eeŋö ya wek ka lueel kɔc piŋ, cït man piëër wek ë piny nɔm,

²¹ kë cït, “Du ye jak, du ye thiëëp, du ye dɔm.”

²² (Kake kedhie ee ka bï dhiap në luɔi looiyë raan keek), ayek lööŋ ke kɔc tei, ku wëët e kɔc?

²³ Kakë ayek röt tɔ ye ka cït ka cath ë pɛlënɔm, në läm ee raan lam ë këde yenpiɔ̈u, ku në kuur ee raan rɔt kuɔɔr piny, ku reec ee raan e guöp rɛɛc muk, ku acïnkï naamden, ee kak ee piɔ̈u tɔ mit tei.