Kɛ̈ŋ 8 - JAM DE NHIALIC 2011

Pɛlënɔm Alecë Nɔm

¹ Piɛŋkï, pɛlënɔm acöt. Ku yöŋ de käŋiic acï yeröl jat nhial.

² Ee kɔ̈ɔ̈c në kuɛɛr nïïm tëthöny, ku kɛ̈ɛ̈c në apuɔ̈k kuɛɛr.

³ Ee cööt në röldït në kal ë wut thok lueel an,

⁴ “Wek caal wedhie, wek kɔc ke piny nɔm.

⁵ Na kɛ̈nkï gïu? Ke wek wɛ̈ɛ̈t bäk gïu. Na yak dhän, ke we wɛ̈ɛ̈t bäk dhɔ̈ɔ̈n pɔ̈l.

⁶ Piŋ jamdiën piɛth arëët, kë ya lueel ëbɛ̈n ee yic.

⁷ Kë ya lueel ee yic, ku yɛn man tör ë lueth.

⁸ Ka ya lueel ëbɛ̈n ayek yith ë cök piny, acïnkï yiic mɛth, ku cïnkï yiic anäinäi.

⁹ Alek dhek tëde kɔc dek kë ŋickï, ku yek käŋ yökiic.

¹⁰ Dɔm jamdï awär ateek, ku dɔm ŋïnydekäŋ awär adhäm awai.

¹¹ “Yɛn pɛlënɔm, yɛn piɛth awär kur läk tuc ë ɣööcden, acïn këpiɛth duëërë thɔ̈ɔ̈ŋ ke yɛn.

¹² Yɛn pɛlënɔm, yɛn ee käŋ yökiic, ku yɛn de ŋïnyëkäŋ, ku guiëër ë löŋ agɔk.

¹³ Të dhuëëŋ yïn Bɛ̈nydït guöp, ke yï man kërac. Yɛn man ɣɛ̈ɛ̈c ë nɔm, ku leec ë rɔt, ku maan jam de yic lueth.

¹⁴ Yɛn ee käŋ kiëët ku dɛ pɛlënɔm yic. Yɛn ee käŋ yökiic, ka yɛn ril.

¹⁵ Yɛn ee meliik kuɔny, gokï ŋiëc guïïr apiɛth, ku kuɔny bäny, gokï lööŋ piɛth looi.

¹⁶ Bɛ̈ny ëbɛ̈n në piny nɔm ee ŋiëc guïïr në kuɔɔnydï, ayï adhuëëŋ ku bäny ee yɛn ee keek kuɔny.

¹⁷ Yɛn nhiaar raan ee yɛn kɔɔr ëbɛ̈n, ku raan ee yɛn kɔɔr ëbɛ̈n, ee ya yök.

¹⁸ Kuɛth ku dhuëëŋ atɔ̈ukï tëde yɛn ëbɛ̈n, këriëëc kiith bï tɔ̈u anu tëde yɛn.

¹⁹ Këpiɛth bä yök tëde yɛn, awär adhäm awai, ku wɛ̈ɛ̈r ateŋ lɔ kïr.

²⁰ Yɛn ee cath në kueer ë piathëpiɔ̈u yic, ku kuany kueer ë yicic.

²¹ Yɛn ee kɔc nhiaar ɛn tɔ kueth, ku thiääŋ ɣöötken në këriëëc piɛth ëbɛ̈n.

²² “Bɛ̈nydït ee yɛn aa kɔn cak tueŋ në këriëëcdɛn ë ciɛk nɔm ëbɛ̈n ɣɔn thɛɛr.

²³ Ee yɛn aa kɔnë cäk gɔl, ɣɔn thɛɛr kënë piny kɔn cak.

²⁴ Ee yɛn ë kɔnë cak tueŋ në abäpdit, të ɣɔn cïn en awɛɛŋ ke pïïu cï kɔn tuöl.

²⁵ Ee yɛn ë kɔnë cak tueŋ në kur, të ɣɔn kënë keek kɔn tääu tëden.

²⁶ Ayï të ɣɔn kën En piny kɔn cak kekë duumke, ayï këthiin ë abuui ë piny nɔm.

²⁷ Yɛn aa nu ëtɛ̈ɛ̈n të ɣɔn tɛ̈ɛ̈n En tënhial tëde, të ɣɔn poc En pïïu thook,

²⁸ të wään tɛ̈ɛ̈u En luäät nhial, ku liep awɛɛŋ ke tëthuth piny.

²⁹ Ku yöök pïïu tɔ̈u ë wɛ̈ɛ̈r yiic cïkï bï thiɔɔr awär agöör nïïm, cït man cïï yen ke yɔ̈ɔ̈k, ku tɛ̈ɛ̈u mënke piny.

³⁰ Ëtɛ̈ɛ̈n, yɛn aaye atën ë ye luui wo Yen, Yɛn aa ye këdɛn ee ye miëtpiɔ̈u, ku ya piɔ̈u miɛt në rëërdï wo Yen ë ceŋ.

³¹ Ka yɛn mit piɔ̈u ë pinyde nɔm ëbɛ̈n, ku miɛt piɔ̈u wokë mɛnh ë raan.

³² “Ënɔɔnë, piɛŋkï këdï dhuök, athiɛɛi atɔ̈u ke kɔc ee kuɛɛrkï kuanyiic.

³³ Yak wëlkï piŋ ku yak nïïm pɛl, duökï keek ee dhɔɔtiic.

³⁴ Thieitheei në kɔc ë wëlkï piŋ, ku yek ya woi ë ceŋ, ke ke tit bɛ̈ndï bei ɣööt.

³⁵ Raan cï ya yök ka cï pïïr yök, ku yen abï miɛt ë piɔ̈u yök tëde Bɛ̈nydït.

³⁶ Raan ëbɛ̈n raan kën ɛn kɔɔr abï rɔt yiëk buɔ̈t yetök, raan man ɛn, ka ee thuɔɔu yen ë nhiɛɛr.”