Kɛ̈ŋ 7 - JAM DE NHIALIC 2011

¹ Döt lööŋkï mɛnhdï cït man ye yïn yïnyin gël, ku du nɔm kɔn määr në jam cä lɛ̈k yïn.

² Ye kë cä lɛ̈k yïn looi, ke yï bï pïïr. Döt lööŋkiën lɛ̈k yïn apiɛth cït man yïn nyin cooldu döt.

³ Ye wëëtdï döt në yïpiɔ̈u aköölnyïïn ëbɛ̈n.

⁴ Tɔ pɛlënɔm cït nyankui, ku tɔ yöŋ ë käŋiic cït mɔ̈th.

⁵ Abïk yïn gël në tiiŋ ë mony däŋ, ku titkï yïn në tiiŋ ee kɔc meet në jam piɛth.

Tiiŋ Akɔɔrröör

⁶ Ade kööl ë cän luïït në awër ë ɣöndï nyin.

⁷ Guɔ wɛ̈ɛ̈t dhuök juëc tïŋ, wɛ̈ɛ̈t kën guɔ gïu, ku tiëŋ wën dhɔ̈n tök në keyiic.

⁸ Aa tiëŋ atëk në kueeric të lɔ aguk de ɣön cieŋ ë tiiŋ tök. Aa tëk ë ɣön ë tik lɔ̈ɔ̈m,

⁹ ɣɔn thëën acï piny thok amoor.

¹⁰ Na wën, ke kɛɛŋ ë tiiŋë yenɔm ke cieŋ lupɔɔ cït lupɔɔ ke tiiŋ akɔɔrröör, ku guiir kiɛɛr.

¹¹ Ee tiiŋ ŋeny cïï guöp ee riɔ̈ɔ̈c, ku aa ye cool ke ciɛɛth kuɛɛr ë wutic,

¹² aye yök akääc agukic ke tït, ku ee cath ë kuɛɛriic, ku tëthiinë ee guɔ lɔ ë thuukic.

¹³ Na wën, ke dut ee wën dhuŋë yic, ku ciim thok, ku toom nyin ë gɔk, ku lëk en an,

¹⁴ “Yɛn aa gɛm miɔ̈cdï ee köölë, ka yɛn de nɔm rïŋ.

¹⁵ Ka ee yïn abä bɛ̈n diëc. Yïn aa kaar ku ënɔɔnë, yïkï cä guɔ yökë.

¹⁶ Ɣöndï acä thiethic në linɔn ke paan ë Rip lɔ jämjäm.

¹⁷ Ku acä yoor në aŋiëër de mer, ku aloyeth, ku kinamon.

¹⁸ Bä lok ruu ë bom woyiic aruu ë piny. Bä lok thölku miɛt ë piɔ̈nda thok.

¹⁹ Monydï aliu baai, ë keny të mec arëët.

²⁰ Acï wëu juëc jɔt, ka acïï bï dap guɔ lɔ bɛ̈n, abï bɛ̈n miäk në wil ë pɛɛi.”

²¹ Tik ë wënë bɛ̈n meet në jam piɛth, ku tɔ gam lɔ ke yen.

²² Ë bɛ̈n guɔ jäl ke yen ëtök ë tëthiinë abï ciët thɔn le nɔ̈k, ku cït ŋer tuök ke lɔ në wïn ë dɛ̈pic,

²³ agut të bï winh ë dhaŋ ye pïlic. Ku cït din bɛ̈k wïn ë dɛ̈p, ke kuc nɔn yen kë näk en.

²⁴ Ku ënɔɔnë, piŋ këdï wëndï. Piŋ kë lɛ̈k yïn apiɛth.

²⁵ Du tiiŋ cït ee kënë bï tɔ diir yïn, ku du kɔn mɛ̈ɛ̈r ë yecök.

²⁶ Ee tiiŋ cï röör juëc riɔ̈ɔ̈k, ku nɛ̈k röör juëc cïï kuen.

²⁷ Të le yïn ë nɔm thɛm ɣönde, ka yïn cï kueer ë paan ë thuɔɔu dɔmic. Thondu acïï mec.