Kɛ̈ŋ 6 - JAM DE NHIALIC 2011

Jäny Kith Yic

¹ Të de yen luɔi cï yïn gutguut lueel nɔn bï yïn käny ë raan däŋ dɔ̈k mɛnhdï.

² Ku cï jam ë luel yï dɔm kekë gutguutdu.

³ Ke yïn ë jɔ wɛɛn në ee raanë ciin mɛnhdï. Ku kueer töŋ bï yïn ban kï: dap lɔ të de yen, ku läŋ bï yï pɔ̈l.

⁴ Du kɔn lɔ̈ŋ, ku du nin ëtɔt.

⁵ Dap bɛ̈n bei wïn ë dɛ̈pic cït man ë dit, ku bänë cït man ye ŋɛɛr ban ë yiëëp ciin.

⁶ Tiëŋkï amujuŋ wek kɔc adaakrɔt, ku wɛ̈ɛ̈tkï röt në luɔiden.

⁷ Acïnkï nïïm bɛ̈ny, ku acïnkï raan dït ë kenïïm,

⁸ ku ayek këcamden määtic mɔ̈i, ku tɛ̈ukï keek rut.

⁹ Bï raan adaakrɔt gäk ke dhɔt piny ë biöŋde yic agut cï nɛn? Ku bï rɔt jɔ jɔt nɛn?

¹⁰ Aa ye lueel an, “Ë ya tɛ̈ɛ̈c a kɔ̈u tëthiin akäŋ ku gap ka lik ke nïn!”

¹¹ Ku abï kuany ë nyin ye muɔɔk ë nïnic cï cuɛ̈r muk tɔŋ ee kɔc rum.

¹² Kɔc rac cïn thaarden ayek lueth caath në kɔciic ëbɛ̈n.

¹³ Kë yek looi ayek kɔc nieu në kenyïïn, ku niŋkï riöp ke kecök, ku kecin wëŋ kek kɔc.

¹⁴ Acïk piɔ̈ɔ̈th thiäŋ në lueth, ku ayek kërac cät acïn pëk, ku acomkï wël në kɔciic ëbɛ̈n.

¹⁵ Në baŋ de ee kënë, abï riääk keek mook ëthiäu të cïn lëk, riääk cïï kek bï kɔn bɛ piath ananden.

^16-19 Kakë kadhetem ee ka mɛɛn ë Bɛ̈nydït keek, ayï dhoronden acïï ke kɔɔr bï ke tïŋ taitai. Ɣɛ̈ɛ̈c ë nɔm, ku liem ee lueth töör, ku ciin ee raan cïn guöp awäc nɔ̈k, ku piɔ̈n ee karɛc tak, ku cök ee pial ë yät të le kek kërac looi, ku cäätɔ ee käŋ cak ëbɛ̈n, ku raan ee wël rac com në kɔciic.

Jäny në Baŋ ë Kɔ̈ɔ̈r

²⁰ Döt löŋ ë wuur mɛnhdï, ku du nɔm kɔn määr në wëët ë moor.

²¹ Thiɔ̈ɔ̈kë jamden në yïpiɔ̈u thïn, ku ye döt ë cieŋ.

²² Jamden abï yï aa wat të ciɛth yïn, ku gël yïn të niin yïn, ku yöök yïn të yïn yïn.

²³ Löŋ acït manyëalath, ku wëët acït ɣɛɛr riau, ku jiëëm ku nɛɛn ayek kueer de pïïr.

²⁴ Aduëër yïn mɛc wei në diëër rac lɔ̈m, ku mëëc yïn wekë jam amɛɛt de diëër lei.

²⁵ Du rɔ bï tɔ meet ë läkden. Du rɔt tɔ diir ë läk de kenyïïn.

²⁶ Tiiŋ akɔɔrröör aduëërë riɔp në kuën koor cït kuën ë kuïn cï pam tök, na nɔ̈m ë tiiŋ ë moc atuc abï këriëëcdu jɔt ëbɛ̈n.

²⁷ Duëër raan mac boom, ku cïï lupɔɔke nyop?

²⁸ Duëër raan cath atiɔp ë macic, ku cïï cök nyuɔp?

²⁹ Yen täude ka kekë raan ee tiiŋ lei kɔɔr. Acïn raan duëër tiiŋ ë mony däŋ nööm ku rëër ke cïn këtuuc yök en.

³⁰ Kɔc acïkï cuɛ̈ɛ̈r ee biɔɔn guöp na cï kuïn kual të cï cɔk e nɔ̈k.

³¹ Na cï dɔm ee kë cï kual cool nɔm raan dhorou, kake aye acuut ke jɔt ëbɛ̈n.

³² Raan ee tiiŋ lei nööm acïn piɔ̈u. Ee rɔt riɔ̈ɔ̈k tei ë tik.

³³ Aye baar nyin ku dui, ku ee jɔ cieŋ ke biɔn guöp anande.

³⁴ Tiɛɛl ee mony ë tik tɔ diu piɔ̈u arëët, na le guur ke guurde atuc thok arëët.

³⁵ Arok ayï awɛ̈c acïkï agönhde ee thöl në yepiɔ̈u të ciɛk kek juëc arëët.