Kɛ̈ŋ 4 - JAM DE NHIALIC 2011

Këpiɛɛth de Pɛlënɔm

¹ Piŋ kë lëk ë wuur yïn mɛnhdï. Piŋ ë gɔk ke bï yï gäm yöŋ ë käŋiic.

² Yïn lɛ̈k kapiɛth, ka yïn piŋ wëëtdï ëbɛ̈n.

³ Të ɣɔn yan mɛnh thiin koor, ku ya wën tök në wää kekë maa nɔm,

⁴ yɛn cïï wää bɛ̈n wɛ̈ɛ̈t lëk ɛn an, “Piŋ kë lɛ̈k yïn ë gɔk, ku du kɔn tɔ mär yïnɔm. Ye lööŋ lɛ̈k yïn döt ke yï bï pïïr.

⁵ Dɔm pɛlënɔm kekë yöŋ de käŋiic. Du nɔm mär në kë lɛ̈k yïn, ku du dhälic.

⁶ Du pɛlënɔm päl, abï yï gël, nhiaar pɛlënɔm, ku döt apiɛth.

⁷ Yöŋ yök yïn pɛlënɔm ade naamde arëët awär këriëëc ëbɛ̈n. Ku däŋ ye kek rou dɔm yöŋ de käŋiic.

⁸ Nhiaar pɛlënɔm, ke bï yï tɔ ya adhuɛ̈ŋ, ku bom apiɛth, ke bï yï tɔ rïïuwë.

⁹ Yen abï ya gölduön ë dhuëëŋ.”

¹⁰ Piŋ kë lɛ̈k yïn mɛnhdï. Döt kë lɛ̈k yïn ëgɔk, ke yï bï pïïr abä dhiɔp.

¹¹ Yïn cä nyuöth pɛlënɔm, ku nyuöth yïn kueer yic bï yïn pïïr.

¹² Acïn kë bï kɔ̈ɔ̈c në yïnɔm të pel yïn nɔm. Na yï cak kat, acïn kë bï yï dɔ̈ɔ̈r cök.

¹³ Ye kë cï ŋic tak aköölnyïïn. Kë cï ŋic yen aye pïïrdu, ye gël apiɛth.

¹⁴ Du kɔc rac ee käär thook, ku du ee lɔ të ye kek lɔ thïn.

¹⁵ Du kërac ee looi. Ye rɔt mɛc wei në kelɔ̈m. Jäiyë ke, ku baric në bärdu.

¹⁶ Kɔc rac acïkï ee niin të kën kek kërac kɔn looi. Aye nïn ke rɛɛc nyïïn abïk raan kɔn tɔ wiëëk në këracic.

¹⁷ Ayek cam ë kuïn de luɔi de kërac, ku dekï mɔ̈n de akuöörkuöör.

¹⁸ Ku kueer de kɔc ɣerpiɔ̈ɔ̈th, acït ɣɛɛr de run ë piny, ë lɔ ke jɔ ɣɛɛr abï piny jɔ ruu ë gɔk.

¹⁹ Ku kueer ë kɔc rac, acït mɔ̈ɔ̈th dïït lɔ cɔ̈t. Na ë ke cak kɔ̈th acïkï kën ee ke tɔ kɔ̈th ee tïŋ.

²⁰ Piŋ kë lɛ̈k yïn apiɛth mɛnhdï. Piŋ wëlkï ë gɔk.

²¹ Du keek kɔn tɔ nyiëëŋ yï piny. Ye ke tak ku döt keek në yïpiɔ̈u.

²² Abïk raan ee keek yökiic ëbɛ̈n gäm pïïr ku pial ë guöp.

²³ Kiɛmë yïnɔm piny në kueer yïn tɛk thïn, pïïrdu abï täŋdu ye kiɛm piny.

²⁴ Du lueth kɔn töör taitai. Cïn këdu yic thïn wekë lueth, ku wël mär kɔc.

²⁵ Ye të tueŋ woi ë cök piny në piɔ̈n adöt, ku du yïnyin ee kuaak në riɔ̈ɔ̈c.

²⁶ Ye kë loi kɔn kiëët ë gɔk, ku jɔ bɛ̈n looi, ke këriëëc loi ëbɛ̈n ke bï ya yic.

²⁷ Ye kërac rɛɛc në luɔi, ku baric ë cik. Du rɔt kɔn nyaŋ në kueer ë yicic.