Kɛ̈ŋ 31 - JAM DE NHIALIC 2011

Jam Jiëëmë Melik

¹ Kakë ee wël ke Lemuwɛl, meliŋ de Matha, ɣɔn cïï man ke ye wɛ̈ɛ̈t an,

² “Wëndiën Lemuwɛl yïn aa dhiëëth në luɔi cïï Bɛ̈nydït lɔ̈ŋdï bɛ̈ɛ̈r, ka yïn piëŋë apiɛth.

³ Du riɛldu tɔ thöök wei në ŋɔ̈ɔ̈ŋ ë diäär ye kɔɔr, kɔc ee meliik riɔ̈ɔ̈k.

⁴ Meliik ayï bäny acïkï rɔ̈ŋ në dëŋ ë mäu ayï mɔ̈n tuc.

⁵ Dëk ee keek tɔ mär nïïm në lööŋ cï tääu piny, ku mär yiny de kɔc kuanynyïïn.

⁶ Mɔ̈u tuc ee këde kɔc thou, ku mɔ̈u ee këde kɔc nuan.

⁷ Tɔ dekkï ke ke cïï kuɛɛny de nyinden bï bɛ aa tak, ku bïk nïïm määr në nuɛɛnden.

⁸ “Ye jam në biäk de kɔc cïï jam lëu kapäc, ku ye yiny de kɔc cïn nïïm riɛl gël.

⁹ Jamë ku ye löŋ de raan ëbɛ̈n ŋiëc guiir, ku gël yiny de kɔc dɛk käŋ.”

Tiiŋ Piɛth

¹⁰ Eeŋa bï tiiŋ piɛth yök? Ku yen ade naamdɛn wɛ̈ɛ̈r en kajuëc tuc ɣööcden.

¹¹ Aye monyde ŋɔ̈ɔ̈th piɔ̈u, ku acïn kë ye tɔ dak monyde.

¹² Apiɛth ke yen në pïïrdenic aköölnyïïn kedhie, ku acï ee luöi kërac.

¹³ Në ee cinkɛnkë ayen ke lupɔɔ gut në miɛtëpiɔ̈u.

¹⁴ Ee rɔt lɔ yiɛ̈n këciɛm tëmec, cït abël wïïr ë kɔc ee käŋ ɣaac.

¹⁵ Ee rɔt jɔt adurduur të ŋoot ë piny ke col, ku looi këciɛm ë baaide ku kɔc luui yen.

¹⁶ Aŋic luɔi yen käŋ ɣaac, ku ɣɔɔc dom ku com në tiim ke enap.

¹⁷ Yen ee lui në piɔ̈nde ëbɛ̈n ku apiɔl cin.

¹⁸ Aŋic kaam ye käŋ ɣaac ku ɣɛɛcë ke, ee luui abï piny dït.

¹⁹ Yen ee lupɔɔke gut yetök.

²⁰ Ee ɣönde liep thok kɔc kuanynyïïn ku gɛm eciin.

²¹ Të ciɛk ë piny liɛɛr, acie diɛɛr në luɔi de yen nɔm lupɔɔ dhïl bïï baaide ke kum.

²² Ee biökke thieth ku cieŋ lupɔ piɛth lɔ mot ku lupɔɔ thiith amujuŋ.

²³ Monyde aŋic arëët wutic, ku aye riëëu në röördït yiic.

²⁴ Ee lupɔɔ gut ku ɣöc keek kɔc ee käŋ ɣaac.

²⁵ Ee tiiŋ ril thiekic, cie diɛɛr në ka bï tuöl wadäŋ.

²⁶ Ee jam në pɛlënɔm ku wëët adöt.

²⁷ Ee baaide muk apiɛth ku acïï guöp ë ŋɛɛr.

²⁸ Aye mïthke röt jɔt ku lëkkï thieithieei ku aye monyde leec.

²⁹ Ku lueel an, “Ade diëër juëc ee kapiɛth looi, acïkï cït yïn awär keek kedhie.”

³⁰ Läk de guöp acïï kït ke läk de piɔ̈u, ku tiiŋ ee Bɛ̈nydït riëëu arɔ̈ŋ ke piɔ̈ny.

³¹ Tɔ lec në röördït wut ke ye ariöp de luɔide.