Kɛ̈ŋ 30 - JAM DE NHIALIC 2011

Jam ë Lueel Agur

¹ Kakë ayek wël ë lueel Agur wën ë Jake wun cɔl Matha lëkkë Yithriɛl kekë Yucal an, “Nhialic acïï tɔ̈u ke yɛn, Nhialic acïï tɔ̈u ke Yɛn, ku yɛn cï ciën kony.

² Yɛn ee raan töŋ de kɔc kuc käŋ aläl, yɛn cïn yöŋ de käŋiic cït man ë kɔc,

³ yɛn kënë wɛ̈ɛ̈t në pɛlënɔm, ku yɛn kuc ŋïny de Nhialic ɣeric.

⁴ De raan cï kɔn lɔ paannhial ku le bɛ̈n piny? Eeŋa cï yom kɔn dɔm në yecin? Eeŋa cï pïïu kɔn duɔl në lupɔde yic? Eeŋa tɛ̈ɛ̈u ë loi piny thar ëbɛ̈n? Cɔl ŋa ku cɔl mɛnhde ŋa? Lɛ̈kë yɛn të ŋic yïn keek.

⁵ “Këriëëc ë bɛ̈n cïï Nhialic lueel ee ya yic, ku Yen ee ya kön ë raan kɔɔr kuɔɔny tëde Yen.

⁶ Du kë cï Nhialic lueel bï ŋuak! Abï yïn gɔ̈k ku nyooth yïn luɔi yïn käŋ töör.”

Kɛ̈ŋ kɔ̈k

⁷ Bɛ̈nydït, ade ka nu kaarou bä ke luöi yɛn ke ya kën kɔn thou, ku du thiëcdï reec:

⁸ Nyaaiyë kë cɔl tör ë wël ë yathok, ku du ya tɔ kuanynyin ku nɔn bä kueth aläl, gämë yɛn kuïndiën aköölnyïïn tei,

⁹ ku cä bï kuɛth abä nɔm määr në Yïn, ku na cä dak, ke yɛn duëër dhil kual ku ta rinku lɛ̈ɛ̈të.

¹⁰ Du lïm de bɛ̈nyde ciëk guöp, ke yï cïï bï cieen ku yök ariöpdu.

¹¹ Kɔc kɔ̈k ayek wärken läät, ku acïkï märken ee thieei.

¹² Kɔc kɔ̈k ayek röt tïŋ ke ke lɔ wai, ku ŋoot awɛ̈ɛ̈cken ke ke kënë wɛ̈ɛ̈k bei.

¹³ Ade kɔc kɔ̈k ee kenïïm ɣääc, ku ayek daai ke ke biɔn kɔc gup.

¹⁴ Kɔc kɔ̈k acïtkï lec abätɛ̈ɛ̈u ku leem ye kek ke kake kɔc kuanynyïïn cam, ku pïïrkï në kɔc kɔ̈ɔ̈th kɔc dɛk ë käŋ.

¹⁵ Ade käŋ kadiäk ayï ŋuɛɛnden acïkï ee lueel an, “Wok cï loi!

¹⁶ paan ë thuɔɔu, ku tiiŋ rɛ̈ɛ̈r, ku piny cï yaak, ku many dɛ̈p ke cïï liu.

¹⁷ Mïth cïï wärken ee riëëu ku rɛɛckï lööŋ ke märken, abïï gɛk ke wakic ke lɔ̈l nyïïn bei ku ŋueet ajël ke cuɔɔr keek.

¹⁸ Ade käŋ kadiäk ayï ŋuɛɛnden ka cä keek ee yökiic,

¹⁹ päär ye cuɔɔr päär tënhial, mol ye kërac mol ë kuriic, cäth ye abël wïïr cath wïïr, ku lɔ ye nyan kaman lɔ ɣöt kekë monyde.

²⁰ Kënë ee tän ë tiiŋ ee köör, ee lɔ köör ku wɛɛk rɔt ku lueel an, “Acïn kërɛɛc cä looi!”

²¹ Ade käŋ kadiäk ayï ŋuɛɛnden kak ee piny tɔ lɛthë ku cïï ke lëu në guöm:

²² lïm cï ya melik, ku raan piɔl piɔ̈u cï kuɛth aläl,

²³ ku tiiŋ ë man cï rɔt yɔ̈k monyde, ku nyan lïm cï mony de tiiŋ luui kek nööm.

²⁴ Në ee pinyë nɔm ade läi kor kaŋuan ku apelkï nïïm arëët:

²⁵ Amujuŋ ee käm thii cïï ril, ku ayek kacaamken tɔ̈ɔ̈u mɔ̈i ëtɛ̈ɛ̈n.

²⁶ Ku biɔl ee lony thiin cïï ril, ku ee ɣönde wet kuriic.

²⁷ Ku kɔyɔm wën cïn nïïm bäny, ku ayek cath aber cït rem leer tɔŋ.

²⁸ Alëu ee lɛ̈n thiin duɛ̈ɛ̈rë muk në raan ciin ku ee rëër ɣön ë melik.

²⁹ Ade käŋ kadiäk ayï ŋuɛɛnden ayek cath ke ke ɣɛ̈ɛ̈c kenïïm:

³⁰ Köör ee lɛ̈n ril në läi yiic, acïn kë yen riɔ̈ɔ̈c,

³¹ ku thɔn ajïnh laath, ku nyɔɔŋ bou, ku bɛ̈ny cath ke remdɛn ë tɔŋ.

³² Na ye pial ë piɔ̈u yïn tɔ ɣɛ̈ɛ̈c yïnɔm ku nɔn looi yïn kiɛɛr rac, ke yï jɔ rɔt jɔ̈ɔ̈ny!

³³ Na cï ca miɔɔk, ke yïn ee miök yök. Na cï raan yup wum, ee wum kuëër. Na cï agönh gɔl, ee nuan bɛ̈ɛ̈i.