Kɛ̈ŋ 3 - JAM DE NHIALIC 2011

Yöök de Dhuök

¹ Du nɔm kɔn määr në wëët lɛ̈k yïn mɛnhdï. Ku ye lööŋ thɔ̈n yïn döt aköölnyïïn.

² Wëëtdï abï yï gäm pïïr piɛth lɔ yum, ku tɔ yï rɛ̈ɛ̈r abä dhiɔp.

³ Du piɔ̈n adöt päl kekë yic. Duöötë keek në yïyeth, ku muk keek në yïpiɔ̈u.

⁴ Të le yïn e looi aya, Nhialic, ayï kɔc abïk piɔ̈ɔ̈th miɛt në yïn.

⁵ Ye Bɛ̈nydït ŋɔ̈ɔ̈th në yïpiɔ̈u ëbɛ̈n. Du rɔt ee kan në këduön ŋic.

⁶ Ye Bɛ̈nydït tak në këriëëc loi yic ëbɛ̈n, ku abï yï nyuöth kueer yic.

⁷ Du rɔt ee yök apel nɔm, ye Bɛ̈nydït riëëu, ku päl luɔi de kërac.

⁸ Të looi yïn en aya, aduëër ciët wɛ̈ɛ̈l piɛth cï tääu ë tëtöökku yiic, ku tɔ ke dem, go arɛɛmdu ŋuɛ̈ɛ̈n.

⁹ Dhuëŋ Bɛ̈nydït në miɔ̈c miɔɔc yïn En në këriëëc piɛth cï kɔn luɔk domdu ëbɛ̈n.

¹⁰ Të le yïn en looi aya, adhɛnku abïk thiäŋ në rap, ku yïn bï nɔm thiäŋ wekë mɔ̈u, ka bï ciën të bï yïn e tɔ̈ɔ̈u thïn.

¹¹ Du wëët ë Bɛ̈nydït ee dhɔ̈lic mɛnhdï, ku du ee bäp në nɛɛnde.

¹² Bɛ̈nydït ee kɔc nhiɛɛr nen, cït man ye wun meth wëndɛn nhiɛɛr nen.

¹³ Thieithieei në raan cï pɛlënɔm yök kekë yöŋ de käŋiic.

¹⁴ Në baŋ yen raan tɔ yök këpiɛth awär kë duëër yök në ateekic, këpiɛth arëët awär adhääp.

¹⁵ Ku pɛlënɔm apiɛth arëët awär kur läk, ku acïn kë duëër thööŋ ke yen.

¹⁶ Pɛlënɔm ee yï gäm pïïr bäär, ku gëm yïn kuɛth, ku tɔ yïn aa dhuɛ̈ŋ.

¹⁷ Pɛlënɔm aduëër pïïrdu tɔ piɛth, ku ciɛɛth yïn në pïïric apiɛth.

¹⁸ Kɔc ee nïïm pɛl amitkï piɔ̈ɔ̈th, aye pɛlënɔm kek gäm pïïr.

¹⁹ Bɛ̈nydït aa cak piny në pɛlënɔmde, aa tɛ̈ɛ̈u tënhial nhial në ŋïnyde.

²⁰ Pɛlënɔmde yen atɔ kiɛɛr thiɔɔr, ku tɔ luäät tuëny piny nɔm.

²¹ Muk pɛlënɔmdu yic apiɛth mɛnhdï, kekë yöŋ de käŋiic. Du ke kɔn pɔ̈l anyiëëŋ yï piny.

²² Abïk yïn gäm pïïr piɛth lɔ yum.

²³ Ka yïn duëër aa cath kueer në nɔm lääu, ku cïn kë kɔ̈th yïn.

²⁴ Yïn duëër aa tɔ̈u ke cïn kë riëëc yïn, ku nin ë läŋ ë wɛ̈ɛ̈ric ëbɛ̈n.

²⁵ Du riɔ̈c në riääk duëër rɔt tɛ̈ɛ̈m ëthiäu, riääk cït riääk ee kɔc ë karɛc looi yök cït man amaŋ.

²⁶ Bɛ̈nydït abï yï döt apiɛth. Acïï yï bï tɔ lööny ë wïn ë dɛ̈pic.

²⁷ Ye këpiɛth luöi kɔc rɔ̈ŋ në këpiɛth të cïn pëk të lëu yïn en bä looi.

²⁸ Du kɔn lɛ̈k kɔc rɛ̈ɛ̈r në yïn an, “Abä tïŋ tei miäk, të lëu yïn en nɔn duëër yïn ke kony ee köölë.

²⁹ Du kɔc thiääk në yïn ee luöi kërac, arëërkï ke ke ŋäth yïn.

³⁰ Du ee teer wekë kɔc baaŋ, kɔc cïn kërɛɛc cïk luöi yïn.

³¹ Du rɔt tɔ meet ë kɔc ee karɛc looi, ku du luɔiden bï kääric,

³² në luɔi mɛɛn ë Bɛ̈nydït kɔc ee karɛc looi, ku ade aŋäth kekë kɔc piɛthpiɔ̈ɔ̈th.

³³ Bɛ̈nydït ee bɛ̈i ke kɔc ë karɛc looi cieen, ku thieei bɛ̈i ke kɔc ɣerpiɔ̈ɔ̈th.

³⁴ Ee kɔc ë kɔc bui gup bui gup, ku dhuëëŋ kɔc ee röt kuɔɔr piny gup.

³⁵ Kɔc pel nïïm abïk dhuëëŋ ë piɔ̈u lɔ̈ɔ̈k lak, ku dhän abïk ayärden ŋuak nyin.