Kɛ̈ŋ 29 - JAM DE NHIALIC 2011

¹ Raan ee cool ë jiëënyë yen ku cïï gäm, ee bɛ̈n dhuɔŋ ëthiäu ku acie bɛ piath anande.

² Bɛ̈ny piɛth piɔ̈u ee ya miɛtëpiɔ̈u, ku bɛ̈ny rac ee kɔc tɔ ŋun në keyäc.

³ Mɛnh nhiaar pɛlënɔm ee miɛt ë piɔ̈u yiɛ̈n wun, ku riŋ në akɔɔrröör cök ee wëuke thöl.

⁴ Wun ye bɛ̈ny raan ëbɛ̈n gäm yinyde ee kɔ̈ɔ̈c, ku bɛ̈ny ye kum thok aye wunde riääk.

⁵ Raan ee mɛ̈thë jääm në ruëëny, adep rɔ ë wïn ë dɛ̈p.

⁶ Kɔc ee karɛc looi acï ke dɔm në awɛ̈ɛ̈cken, ku kët kɔc piɛthpiɔ̈ɔ̈th në miɛtëpiɔ̈u.

⁷ Raan piɛth piɔ̈u aŋic yiny de kɔc kuanynyïïn, ku kɔc ee karɛc looi acïkï ee yökic.

⁸ Kɔc ee kɔc dɔl gup aduëërkï wut kɛ̈ɛ̈k abï dëp, ku aye röör pelnïïm ke piɔɔk.

⁹ Kaam de raan pelnɔm kekë raan piɔl piɔ̈u acïn kë ye rɔt tiiŋ. Aye raan piɔl piɔ̈u dhuth në dɔl agɔ̈th ku lɛ̈ɛ̈t.

¹⁰ Nɛ̈k aman raan adöt, ku pïïr de raan adöt anhiɛɛr ë kɔc piɛthpiɔ̈ɔ̈th.

¹¹ Raan piɔl piɔ̈u aye agööth thɛl wei, ku aye raan pelnɔm ke mɔ̈k piny.

¹² Bɛ̈ny ee piŋ ë tör ë lueth, aye bäny nu yecök rac aya.

¹³ Kɔc kuanynyïïn ku kɔc yɔŋ keek amɛt ëtök keek, aye Bɛ̈nydït ke gäm pïïr kedhie.

¹⁴ Bɛ̈ny ee kɔc kuanynyïïn gäm yinyden, abï bääny muk në kaamdït.

¹⁵ Dui de mïth ee ke gäm pɛlënɔm, mɛnh cï päl thïn ee man yɔ̈ɔ̈r.

¹⁶ Karac ayek kenyïïn ŋuak të nu bääny ë kɔc rac cin, ku wïïkden abï kɔc piɛth piɔ̈ɔ̈th tïŋ.

¹⁷ Ye mïthku dui, ke yï bï dɛ mät ku miɛtëpiɔ̈u.

¹⁸ Wun cïnic nyuuth aye kɔc juëc määr, ku raan ee löŋë muk abï thieei.

¹⁹ Acie liep yetök yen duëërë lïm dɔk, cakaa yen ee piŋ ka acïï bï yökic.

²⁰ Aŋuɛ̈ɛ̈n ë raan piɔl piɔ̈u në raan ee pɛ̈ɛ̈r ë jamic ke kën kɔn cätic.

²¹ Raan ee lïm bɔ̈ɔ̈ŋ ke koor ee ye bɛ̈n gäm dhiën ë piɔ̈u lɛk en käŋ ëbɛ̈n.

²² Raan ee dap gɔ̈th ateer tuök nhial, ku tɔ awɛ̈ɛ̈c juëc loi röt.

²³ Na ye rɔt tɔ dït ke yïn bï kuɔɔr piny, ku na kuɔɔrë rɔt piny ke yïn bï riëëu yök.

²⁴ Raan ee cath ke cuɛ̈ɛ̈r aman pïïrde, në luɔi yen kuëŋ tëthiëëcë en ke cïï yic nyoth.

²⁵ Riɔ̈ɔ̈c acït wïn ë dɛ̈p, ee raan tɔ diɛɛr në kë bï lueel në biäkde, ku aŋäth ë Bɛ̈nydïtic yen ee kuɔɔny.

²⁶ Kɔc ayek dap riŋ ke ke lɔ tëde bäny, ku guiëër ë löŋ yic aye yök tëde Bɛ̈nydït.

²⁷ Kɔc piɛthpiɔ̈ɔ̈th amankï kɔc rac, ku kɔc rac amankï kɔc piɛthpiɔ̈ɔ̈th.