Kɛ̈ŋ 25 - JAM DE NHIALIC 2011

Kɛ̈ŋ Kɔ̈k ke Pɛlënɔm ke Tholomon

¹ Kɔ̈kkë aya, ayek kɛ̈ŋ ke Tholomon, ë gɛ̈ɛ̈r ë kɔc lui ë Ɣedhekia melik de Juda.

² Ee dhuëëŋ de Nhialic luɔi Yen käŋ thiaaniic, ku ee dhuëëŋ de bɛ̈ny luɔi yen ka cïï kɔc thiaan yökiic.

³ Tän de piɔ̈n ë bɛ̈ny acie yökic acït thuth ë piny kekë mɛc ë tënhial.

⁴ Ku cït man ye ateek lëëŋ abï lɔ kïr, ke thɛ̈th bï konh piɛth thɔ̈ɔ̈th në yen.

⁵ Nyaaiyë kɔc rac në bɛ̈ny lɔ̈ɔ̈m, ke thööcde bï kɔ̈ɔ̈c në piathëpiɔ̈uwic.

⁶ Du rɔt tɛ̈ɛ̈u tueŋ bä nyuc të ye meliik rëër, ku nɔn bä lɔ kɔ̈ɔ̈c tëde röördït.

⁷ Apiɛth bïï yïn yɔ̈ɔ̈k an bä ee në, në luɔi bï ë yïn tɔ yäär guöp në wɛ̈ɛ̈t meliik nïïm.

⁸ Du kë mɛɛn ee tïŋ ku go gööny, na lɔ cäätɔ yic bɛ̈n ku yök ke ye awänydu, bä ŋö jɔ looi.

⁹ Na de kë tɛɛrkï wek ë raan thiääk wek, thɔ̈lkï agönhdun waarou, ku duökï kë cï moony ee tɔ piŋ.

¹⁰ Na le ë raan däŋ kë cï moony piŋ, abï we tɔ yäär, në biäk cïï piär ke ayäär ee thök.

¹¹ Wël cï ŋiëc lööny tëden ayek ciët gul cï thɔ̈ɔ̈th ë adhäm de thar kuny de ateek.

¹² Pïŋ de jäny ë raan pɛlënɔm ee ciët yöŋ de adhääp ku kaläk de naamden.

¹³ Tuny piɛthpiɔ̈u acït pïïu ke agut ë kööl ë tëm tëde bɛ̈nyde.

¹⁴ Raan ee yenɔm ɣääc në miɔ̈c cïï bï gam acït luändïït put ë yom cïnic deŋ.

¹⁵ Ŋiëc jam ee tiam, ku aye bɛ̈ny raan piŋ thok.

¹⁶ Na cak kiëc miɛt ke yï du rɔt thiɔ̈ŋ në yen, na lɔ rɔt thiɔ̈ɔ̈ŋ në yen ka bä ŋɔk.

¹⁷ Raan ee yecök bɛ dɔm baai de mäthde ke cïï bï maan guöp.

¹⁸ Raan ee raan däŋ cäk thok ee nɛ̈k cït thieec ku tɔŋ ku winh moth thok.

¹⁹ Aŋäth cï tääu në kɔc cïn adöt gup në kööl ë riääk, ee ciët lëny rem kekë cöök cï ŋɔl.

²⁰ Raan kït dit raan dhiau piɔ̈u ee ciët kë bïï lupɔɔ bei në yekɔ̈u ë rutic, ku cït kë tɛ̈ɛ̈u awai ë tëtök nyin.

²¹ Miɔ̈c raan aterdu në kuïn ku nɔn en pïïu të nɛ̈k ë cɔk en ku nɔn yen reu,

²² yen ee kënë, yen abï yen tɔ gɔ̈k rɔt yetök, ku Bɛ̈nydït abï yï cuööt.

²³ Jam de yic mɛth agɔ̈th bɛ̈ɛ̈i, cït man ye yom de rut deŋ bɛ̈ɛ̈i.

²⁴ Raan ceŋ luak aŋuän në raan ceŋ ɣöt ke tiiŋ awuɔɔu looi.

²⁵ Thoŋ piɛth bɔ̈ tëmec ee ciët pïïu lir tëde raan nɛ̈k rou.

²⁶ Raan piɛth piɔ̈u cïï raan ee karɛc looi ee jɔ̈ɔ̈ny, Acït nyin cïï pïïuke dhuööth ku awaŋ cïï pïïuke riääk.

²⁷ Kɔ̈ɔ̈r ë lɛc acïï piɛth, yen acït cäm de kiëcdït.

²⁸ Raan cïï rɔt ee mɔ̈k piny në agɔ̈th, ee ciët wun cïï kalde wïïk cïn kë gël kɔc mɛk en.