Kɛ̈ŋ 23 - JAM DE NHIALIC 2011

Jam de Dhetem

¹ Të cïï bɛ̈ny yï caal në kuïn nɔm,

² ke yï jɔ miëër apiɛth, akuc nɔn ye kamitke wïn ë dɛ̈p,

³ na cï dït ë piɔ̈ndu yï mɔ̈ɔ̈r, ke yï gut yïyic.

Jam de Dhorou

^4-5 Du rɔt nɛ̈k piny në kɔ̈ɔ̈r ë kuɛth, ye nɔm pɛl ke yï bï rɔt tiit në ka ye piɔ̈ndu ke kɔɔr. Kake kuɛth ayek tëëk ë wïl ku pɛ̈ɛ̈rkï nhial cït man ë cuɔɔr.

Jam de Bɛ̈t

⁶ Du ee cam në kuïn raan acɔk, ku de këcamdɛn mit ee kɔɔr.

⁷ Aye lueel an, “Bä cämë ku bä dɛ̈kkë,” acie yic yen lueel, ee miööc në yethok ku liiu në yepiɔ̈u.

⁸ Yïn bï tɛk ciëën ku abï yïn tɔ ŋɔk kë piɛth duëër yïn lɛc lueel.

Jam de Dhoŋuan

⁹ Du ee jam wekë raan piɔl piɔ̈u, ke cïï wëlkuön ke pɛlënɔm bï dhɔɔtiic.

Jam de Thiëër

^10-11 Päl aken thɛɛr tëde ku du aken de mïth abɛɛr ee lïïr nɔm, Awärjäŋ Raan ril, abï göönyden nööm.

Jam de Thiëër ku Tök

¹² Tääuwë yïpiɔ̈u në wëëtic, ku yïnydu ke pïŋ de wël ke ŋïny de käŋ.

Jam de Thiëër ku Rou

¹³ Du mïth ee pɛ̈n dui. Acïï dui keek ke bï nɔ̈k.

¹⁴ Abï dui keek kony wëi, në paan ë thuɔɔu.

Jam de thiëër ku Diäk

^15-16 Mɛnhdï të yïn piɔ̈u jam në wël ke pɛlënɔm ku ye yith lueel, ke yïn cï piɔ̈ndï tɔ mit.

Jam de thiëër ku Ŋuan

¹⁷ Du rɔt ee tɔ nɛ̈k ë piɔ̈u në biäk de kɔc ee karɛc looi, ye rëër ke yï riëëu Bɛ̈nydït në akööl ke pïïrdu ëbɛ̈n,

¹⁸ ke aŋäthduön bï bɛ̈n wadäŋ cï bï teem kɔ̈u.

Jam de Thiëër ku Dhïc

¹⁹ Piŋ apiɛth mɛnhdï, ye nɔm pɛl ku ye yïpiɔ̈u tääu në kueer yicic.

²⁰ Du ye mat wekë kɔc ee dek ë mɔ̈u aläl ku yek keyiic thiɔ̈ɔ̈ŋ në cäm dït.

²¹ Kɔc ye mɔ̈u wit ku yek cäm tɔ dït abïk nyïïn kuany ëthiäu. Ku na ye cool ë cäm ku nïn, yïn bï yïkɔ̈u aa kum në anuɛɛr.

Kɛ̈ŋ Kathiëër ku Dhetem

²² Ye kë lueel ë wuur piŋ, ku du moor ee dhɔɔt guöp të cï yen dhiɔp, na cie keek ke yïn duëër liu.

²³ Kɔɔr yic ku pɛlënɔm ku yöŋ de käŋiic abä tuc gïth, du ke be pɔ̈l.

²⁴ Miɛtëpiɔ̈u dït ee këde wun mɛnh piɛthpiɔ̈u ku pel nɔm.

²⁵ Ë miɛtëpiɔ̈u tɔ̈u ke kɔc ë dhiëth yïn, ku moor ë ɣɛ̈ɛ̈c yïn ë yeyäc.

Jam de Thiëër ku Dhorou

^26-28 Mɛnhdï, piŋ këdiën luɛɛl, woi kë luɔɔi ku döt kuɛɛrkï yiic apiɛth. Akɔɔrröör ku tiiŋ cath thïn ayek pul thuth thar. Ayek kɔc buuth cït man ë kɔc ee kɔc rum ku ayek röör juëc pɛ̈n yök në diëërken.

Jam de Thiëër ku Bɛ̈t

²⁹ Ee yï ŋa nu ë nuanic? Ku ee yï ŋa tɔ̈u ë dhiëëuwic? Ku ee yï ŋa ee nu agööthiic? Ku ee yï ŋa ee gööny? Ku ee yï ŋa ee bɔ̈ɔ̈tdït yök në ka ɣääriic? Ku jɔ aa yï ŋa ee nyïïn cɔ̈p në rim?

³⁰ Cie kɔc ee gääu ë mɔ̈u thar, kɔc ee mäu määt nïïm në dëk?

³¹ Du yïnyin ee gëëŋ ë mɔ̈uwic të ciɛk en tuak, ka gut amonh ee lɔ nhial ku lee piny, të ciɛk en lɔ ë yïyäc abä guöp lɔ ɣääi, ke du dek!

³² Na lɔ piny ruu, ke jɔ gut cït man ë kërac de thok wurïï.

³³ Yïn bïï kake gäi aa bɛ̈n në yïnyin, ku täŋ piɛth ku jam de ka piŋiic acïkï röt bï lëu tëde yïn.

³⁴ Yïn bï ciët raan tɔ̈u adeetic në amaŋic në kiiric cil.

³⁵ Abä jɔ lueel an, “Yɛn cï dhil dui, acïk a dui ku akɛ̈n yök. Eeŋö cän pääc? Yɛn kɔɔr mɔ̈n däŋ lɔ dek.”