Kɛ̈ŋ 22 - JAM DE NHIALIC 2011

¹ Piath ë raan yen aŋuän në kuɛth, ku raan ade naamde awär adhɛ̈p ku atek.

² Kɔc kueth ku kɔc kuanynyïïn töŋ mat keek, aa ciɛk Bɛ̈nydït keek.

³ Raan ee nɔm tiëër ee agööth tïŋ ku thiɛɛn rɔt, ku tïŋ ë raan ee pëk thïn ku dhoŋ thïn ku be gum.

⁴ Koor ë rɔt piny ku riëëu de Bɛ̈nydït, ariöpden ee pïïr ku dhuëëŋ ku kuɛth.

⁵ Kuɛɛr ke kɔc ee käŋ liääp adekï yiic kuɔɔth ku wïïn ke dëp, ku raan ee rɔt tiit acie tëëk ëtɛ̈ɛ̈n.

⁶ Ye meth wɛ̈ɛ̈t ke koor, ke bï ya mɛnh wadäŋ.

⁷ Kɔc ee dhëën ayek lïïm ke kɔc ee ke dhɛ̈ɛ̈n, cït man cieŋ ë kɔc kueth kɔc kuanynyïïn.

⁸ Raan ee luɔi rac com nyin ee riääk tem, ku riɛldɛn yen kɔc miɛn aye tɔ kääc.

⁹ Amiööc aye thieei në luɔi yen rɔm ke kɔc kuanynyïïn.

¹⁰ Ye kɔc ee kɔc dɔl gup tɔ mec, ke bï ciën lɛ̈ɛ̈t ayï teer.

¹¹ Raan nhiaar ɣɛɛr ë piɔ̈u ku ye jam në wël ke kokdepiɔ̈u, anhiɛɛr ë bɛ̈ny ke.

¹² Ŋïny de käŋ aye Bɛ̈nydït gël, ku ee jam de kɔc cïn gäm tɔ cïn naamde.

¹³ Aye adaakrɔt lueel an, yɛn bï köör cam kueer të la yɛn biic.

¹⁴ Jam de tiiŋ akɔɔrröör ee pul thuth thar, raan le wëŋ acïï Bɛ̈nydït cieen.

¹⁵ Wuöŋ de meth ëbɛ̈n acï duööt në yepiɔ̈u, na wɛ̈ɛ̈të apiɛth ka cï tɔ ye raan piɛth.

¹⁶ Yaaŋ de kɔc kuanynyïïn kɔɔr ë raan kajuëc ku miɔ̈c de kɔc kueth, ayek raan bɛ̈n nyääŋ kuany ë nyin.

Jiɛɛm ke Pɛlënɔm Kathiërdiäk

¹⁷ Kët yïnydu ku piŋ wël ke pɛlënɔm, ku tääuwë wëëtdï në yïnɔm.

¹⁸ Yïn duëër piɔ̈u miɛt të le yïn keek aa tak ku cïkï jël në yïthok.

¹⁹ Yïn kaar bä aŋäthdu tääu në Bɛ̈nydït guöp, yen acän keek tɔ ŋic ee köölë yïn guöp.

²⁰ Yïn gäär jiëëm kathiërdiäk, ayek jiëëm piɛth de yiic ŋïny de käŋ.

²¹ Ke yï bï yic ŋic eeŋö, ku bä kɔc cï yï tooc lɛ̈k yic.

Jam Tueŋ

²² Du kɔc kuanynyïïn yɔŋ në luɔi kɔ̈c kek, ku du keek ee baar nyïïn në gönyiic.

²³ Bɛ̈nydït abï göönyden nööm ku tɔ kɔc wään cï kaken peec bɛ tɔ pec.

Jam de Rou

^24-25 Raan acie määth ke kɔc kec piɔ̈ɔ̈th ke ke cïï yen bï wɛ̈ɛ̈t.

Jam de Diäk

²⁶ Du rɔt döm cuöt ë käny lei an bä cool, na kɛ̈në lëu.

²⁷ Ke yïn bïï ke kaku nööm acakaa biöŋduön ë tɔ̈c.

Jam de Ŋuan

²⁸ Du aken thɛɛr cï tääu piny në kuarkun löök waar.

Jam de Dhïc

²⁹ Raan ŋic luɔide looi, ee bäny kek ee luöi ku acie kɔc tei.