Kɛ̈ŋ 21 - JAM DE NHIALIC 2011

¹ Piɔ̈n ë bɛ̈ny acït kuëër ë pïïu ke kiir aye Bɛ̈nydït Awärjäŋ wɛl nɔm të kɔɔr.

² Raan aduëër rɔt tïŋ cït kë cïn kë ye wööc, ku Bɛ̈nydït, Yen aŋic kë tɔ̈u në yepiɔ̈u.

³ Luɔi de yic ku piathëpiɔ̈u awär miɔ̈c tëde Bɛ̈nydït.

⁴ Daai de yic lɛc ku piɔ̈n cï thiäŋ ë lɛc, yen ee many alath ë kɔc ee karɛc looi ku yen ee kërac.

⁵ Täŋ de raan ŋic luɔi ee kuɛth bɛ̈ɛ̈i, ku banabek ee nyin kuany.

⁶ Kajuëc ee määtiic në liëp ee tör ë lueth abïk dap riäär cït tol ku bïïkï thuɔɔu.

⁷ Agönh ë kɔc ee karɛc looi ee ke nyaai, në kë ye kek luɔi yic jäi.

⁸ Rëër de kɔc awɛ̈ɛ̈c looi aŋɔl, ku rëër de kɔc awai cïn gup awɛ̈ɛ̈c alɔ cit.

⁹ Raan ceŋ luak aŋuän në raan thiak tiiŋ awuɔɔu looi.

¹⁰ Luɔi de kërac ee wun dɔm ŋɔ̈ɔ̈ŋ, acakaa raan thiëëk kek acïï piɔ̈u ë kok ke yen.

¹¹ Dui de raan piɔlpiɔ̈u ee kɔc ee pëk thïn tɔ pel nïïm, ku jiëëm de raan pelnɔm ee ŋïnydɛn ë käŋ ŋuakic.

¹² Nhialic apiɛth piɔ̈u, aŋic këriëëc ëbɛ̈n ye kɔc rac looi, abï ke riɔ̈ɔ̈r nyïïn.

¹³ Raan ee yeyïc kum të piŋ en kiɛɛu de raan kuanynyin, yïth acïkï bï piŋ në kööl ë kiɛɛude.

¹⁴ Kɔc ayek kum thok gam në cuëër, ke bï agɔ̈th tɔ lir.

¹⁵ Luɔi ye yic looi ee miɛtëpiɔ̈u tëde kɔc piɛthpiɔ̈ɔ̈th, ku ee riɔ̈ɔ̈c tëde kɔc ee karɛc looi.

¹⁶ Raan lɔ rɔt yal wei në kueer ë ŋïny de käŋiic, abï rɔt lɔ yök në amatnɔm de paan ë thuɔɔuwic.

¹⁷ Nhiëër de kamit ke pinynɔm kek aye nyin kuɛɛny bɛ̈ɛ̈i, kacuai ku mɔ̈u acïkï kuɛth duëër bɛ̈ɛ̈i.

¹⁸ Riäŋ bï bɛ̈n tëde raan ëbɛ̈n, abï kɔc ee karɛc looi aa kööt ke kɔc piɛth piɔ̈ɔ̈th.

¹⁹ Raan ceŋ jɔ̈ɔ̈ric aŋuän në raan rɛ̈ɛ̈r kekë tiiŋ kec piɔ̈u ee wou.

²⁰ Raan pelnɔm aye kajuëcke rëër, ku raan piɔl piɔ̈u ee kake thɔ̈l wei.

²¹ Raan ee piathëpiɔ̈u ku kokdepiɔ̈u cop cök, ee pïïr kekë athiɛɛi ku riëëu yök.

²² Raan pelnɔm aduëër rem ril de tɔŋ tiaam, ku dhoŋ tëdɛn dïït ë riɛl piny.

²³ Tiët ë thok ee raan gël në katuc thookiic.

²⁴ Kɔc ee kenïïm ɣääc, luɔiden ëbɛ̈n ee ya lɛc ë rɔt, ku aye ke cɔl kɔc ee dɔl gup.

²⁵ Kɔ̈ɔ̈r ye adaakrɔt käŋ kɔɔr në piɔ̈ndït, abï ye nɔ̈k.

²⁶ Kë ye cool ke tɛk ëbɛ̈n ee kë bï yök, ku raan piɛth piɔ̈u ee yeciin pɔ̈l.

²⁷ Ka näk ye kɔc ee karɛc looi gam ee gök de kërac mɛɛn Bɛ̈nydït, ku ee jɔ rac arëët tëde yenic kiɛɛr rac.

²⁸ Cäätɔ ee wël töör abï thou, ku wël ke raan ee jam piŋ abïï ke gam.

²⁹ Täk në kueer piɛth ee këde kɔc piɛthpiɔ̈ɔ̈th, ku kɔc ee karɛc looi ayek röt guɔ tɔ cït kɔc piɛth.

³⁰ Na cak raan nɔm pɛl ku ye käŋ yökiic ku ŋic kïït, ka cïï kïït de Bɛ̈nydït duëër tiaam.

³¹ Kɔc ayek röt guiir në akööl ke tɔŋ, ku tiëm ee ya këde Bɛ̈nydït.