Kɛ̈ŋ 20 - JAM DE NHIALIC 2011

¹ Mɔ̈u ade guöp agɛɛt ayï mɔ̈n tuc ee kɔc kɛ̈ɛ̈k, raan ëbɛ̈n raan ee rɔt tɔ thel ë mɔ̈u wei acïï nɔm pel.

² Agönh ë bɛ̈ny acït ŋäär ë köör, raan lɔ yen tɔ riääk piɔ̈u ka cï rɔt nɔ̈k.

³ Raan agööth täc nïïm ee dhuëëŋde, ku raan piɔl piɔ̈u yen acïï agööth ee lïïr nïïm.

⁴ Adaakrɔt acie pur ruël, ku acïï yen ee tɔ yök rɛɛp tem.

⁵ Ka tɔ̈u në raan piɔ̈u acïtkï pïïu ke yith thar, ee raan ee käŋ yökiic yen aduëër ke bɛ̈ɛ̈i bei.

⁶ Cakaa nɔn ye kɔc e lueel an, yɛn piɛth piɔ̈u, yɛn aa döt, eeŋa duëër raan cït ee kënë yök?

⁷ Raan adöt ee rëër ë piath ë piɔ̈uwic, aye mïthke döŋ në athiɛɛi.

⁸ Bɛ̈ny nyuc ë thöny de guïïr ë löŋ nɔm, ee këpiɛth pɔ̈c bei në këracic të cïï en e woi yic.

⁹ Eeŋa duëër e lueel an, yɛn cï a piɔ̈u tɔ piɛth, yɛn lɔ wai acïn kërɛɛc nu ë yeguöp?

¹⁰ Kuöc thëm de yic cuëër ee gök de kërɛɛc mɛɛn Bɛ̈nydït.

¹¹ Rac de meth ku piathde aye ŋic ë luɔide, luɔi de kë lɔ wai ku yic.

¹² Bɛ̈nydït acï raan cäk nyïïn ku yïth, bï ke luɔɔi.

¹³ Nhiëër ë nïn ee kuany ë nyin bɛ̈ɛ̈i, ku raan ee yïn ee kuɛth.

¹⁴ Raan ee ɣööc anande ee teer an cï ɣööc lɔ nhial, na le gäm en në kuën kɔɔr, ke go yenɔm lɔ ɣääc.

¹⁵ Yöŋ de adhääp kekë awaŋgur tuc ë ɣööcden apiɔlic në liem ee jam në ŋïny de käŋ.

¹⁶ Na de raan cï rɔt dɔ̈m cuöt ë käny lei, yen abïï këthiinde nööm bïï wun käny tïït.

¹⁷ Këcam yök në kueer rac amit, ka thökde ee ciët nyii de rap de yiic kɔɔi.

¹⁸ Kïït ayï tɔŋ ayek riɛl në jiëëm.

¹⁹ Raan ee rɔt mɛc wei në mantuum lɔ̈m, ke kë cï thiaan cïï bï thiëi piny.

²⁰ Mïth ee wärken ku märken läät, abïï ke pïïrden teem kɔ̈u.

²¹ Ka ye raan ke guɔ lak yetök, ayek yiic bɛ̈n ciën athiɛɛi.

²² Du raan de kë cï wäc yïn ee yɔ̈ɔ̈k an, abä guöör nɔm. Pälë Bɛ̈nydït bï yï kuɔny.

²³ Kuöc thëm de yic cuëër ee gök de kërɛɛc mɛɛn Bɛ̈nydït.

²⁴ Pïïr ë mɛnh ë raan atɔ̈u në Bɛ̈nydït ciin, ka cïï raan duëër yökic yetök.

²⁵ Ee wïn ë dɛ̈p, të lueel ë raan en an ee kë ɣeric, ke kën ciët an bï Bɛ̈nydït miɔɔc ku be mɔ̈l.

²⁶ Bɛ̈ny pel nɔm ee kɔc ee karɛc looi pɔ̈c biic, ku kɛ̈ɛ̈m keek.

²⁷ Täŋ de raan piɔ̈u acït many de alath cïï Bɛ̈nydït gäm en, ee kë nu ë yepiɔ̈u thïn kɔɔriic.

²⁸ Piathëpiɔ̈u ku nhiëër ayek bɛ̈ny tɔ rɛ̈ɛ̈r në thönyde nɔm.

²⁹ Dhuëëŋ de dhuök ee riɛlden, ku dhuëëŋ ë monydït ee luɔu de yenɔm.

³⁰ Dui tök thok ee kërac waak wei, ku yup ee raan waak piɔ̈u thïn.