Kɛ̈ŋ 2 - JAM DE NHIALIC 2011

Ariöp de Pɛlënɔm

¹ Ye kë ya lɛ̈k yïn piŋ apiɛth mɛnhdï, ku du nɔm ee kɔn määr në lööŋ cä thɔ̈n yïn.

² Të yïn jam de pɛlënɔm piŋ apiɛth mɛnhdï, ku ye them ë gɔk nɔn yök yïn e yic.

³ Të kɔɔr yïn pɛlënɔm ë piɔ̈ndu ëbɛ̈n, ku dhiëëuwë yöŋ de käŋ yiic.

⁴ Ku të yïn e kɔɔr arëët abä ciët ke kɔɔr ateek, ku ka lɛ̈k cï thiaan tuc ë ɣööcden.

⁵ Të le yïn e looi aya ke yïn bï riëëu de Bɛ̈nydït jɔ ŋic, ku yïn bï tiam ëŋïny de Nhialic.

⁶ Ee Bɛ̈nydït Yen ee pɛlënɔm gam, ku ŋïnydekäŋ ee bɛ̈n tëde Yen, ayï yöŋ de käŋiic.

⁷ Ee kɔc piɛthpiɔ̈ɔ̈th gäm pɛlënɔm, ku ee köt tëde kɔc adööt.

⁸ Ee kɔc ee yic kɔɔr gël në pïïrdenic ëbɛ̈n ayï kuɛɛrkeniic.

⁹ Të piŋ yïn jamdï, yïn bï yic ku piathëpiɔ̈u ŋic, ku kïït ë kɔc, ku këpiɛth ëbɛ̈n.

¹⁰ Yïn bï pɛlënɔm yök, ku ŋïnydu abï yï tɔ mit piɔ̈u.

¹¹ Ku yöŋ yïn käŋ yökiic abï yï gël.

¹² Ku abï yï pɛ̈n luɔi looi yïn kërac, ku tɔ yï mɛ̈ɛ̈c wekë kɔc ee kɔc kɛ̈ɛ̈k,

¹³ kɔc cï pïïr de ɣɛɛr ë piɔ̈u pɔ̈l, ku dɔmkï luɔi cool de karɛc,

¹⁴ kɔc ee piɔ̈ɔ̈th miɛt në luɔi de kërac,

¹⁵ kɔc cïn raan duëër këden gam, ku cïn raan ŋäth keek.

¹⁶ Yen aduëër yïn tiiŋ piɔl piɔ̈u kɔɔr yïn rɛɛc, ciɛk an kɔɔr nɔn wëŋ en yïn në jam piɛth.

¹⁷ Tiiŋ cïï kääc në monyde nɔm, tiiŋ cï nɔm määr në kuëëŋ ɣeric cï yen kuëëŋ.

¹⁸ Të le yïn lɔ ɣönde, ka yïn cï kueer ë paan ë thuɔɔu dɔmic.

¹⁹ Acïn raan töŋ duëër en neem ku be rɔt puk. Acï yenɔm duëër kɔn bɛ pɔ̈k në kueer ë pïïric.

²⁰ Ka yïn, kuany kueer de kɔc piɛthic, ku dɔm pïïr de kɔc piɛthpiɔ̈ɔ̈th.

²¹ Kɔc piɛthpiɔ̈ɔ̈th kek abï pinyë cieŋ, kɔc de kë ŋickï.

²² Ku Nhialic abï kɔc ee karɛc looi gap wei në pinyic, ku thël kɔc ee wööc bei thïn cït man ë rɔk.