Kɛ̈ŋ 19 - JAM DE NHIALIC 2011

¹ Raan adön kuanynyin aŋuän në raan piɔl piɔ̈u ee lueth töör.

² Kë kɔɔr arëët ke kɛ̈në cätic arac, ayï raan ee kɛɛc ë këdäŋic ee määr.

³ Raan piɔl piɔ̈u të cï yen lööny në riäŋdɛn ë looi yic ee agɔ̈th pɔ̈k nɔm Bɛ̈nydït.

⁴ Kuɛth ee määth juëc bɛ̈ɛ̈i, ku raan kuanynyin aye määthke kat në yen.

⁵ Cäätɔ aluenh ee thok thuäär ë lueth acie pɔ̈l baaŋ.

⁶ Kuɔɔny aye kɔɔr tëde bɛ̈ny, ku amiööc ee määth ke raan ëbɛ̈n.

⁷ Ku na jɔ raan kuanynyin aa caany në kɔcke, ku na määthke bïk jɔ caany në cäny yïndï! Na kɔɔr an bï keek lip, abï yecin aa taar, ka cïï ke yök.

⁸ Pɛlënɔm ee pïïr piɛth bɛ̈ɛ̈i.

⁹ Cäätɔ aluenh ee thok thuäär ë lueth acie pɔ̈l baaŋ, acïn nɔm löŋ, apïïr ke cï thou.

¹⁰ Rëër ë raan piɔl piɔ̈u në kajuëciic acïï rɔ̈ŋ, ku ajɔ rac arëët tëde lïm bï nu në bäny nïïm.

¹¹ Pɛlënɔm acïï raan ee dap tɔ göth, ku ee dhuëëŋ të yen akɔ̈ɔ̈k täc nɔm.

¹² Ŋeeny ë bɛ̈ny acït ŋäär ë köör, ku cït miɛt de piɔ̈nde thɛ̈c kekë wal tɔ̈c.

¹³ Mɛnh piɔl piɔ̈u yen ee riäŋ de wun, ku tiiŋ ee gɔ̈th acït deŋ akonyoot.

¹⁴ Kuɛth ku ɣööt aye ke lak tëde kɔcdïtkun, ku tiiŋ tiëër nɔm ee ya miɔ̈c de Bɛ̈nydït.

¹⁵ Adaakrɔt amääth ke nïn ku abï teer ke cɔk.

¹⁶ Riëëu de lööŋ ee dön de wëi, ku dhɔ̈tden ee thuɔɔu.

¹⁷ Raan ee kɔc kuanynyïïn miɔɔc ee Bɛ̈nydït miɔɔc, ku abï cuööt.

¹⁸ Wëët ee meth kiɛm piny, ye wɛ̈ɛ̈t ke yï cï bï mɛt në riäŋde yic.

¹⁹ Raan ee dap gɔ̈th ee ariöpde yök, na cï kony ke ŋic nɔn bï yïn en aa nyɔk ë kuny.

²⁰ Piŋ jiëëm kekë wëët, ke yï bï aa mɛnh pelnɔm wadäŋ.

²¹ Kajuëc aye raan ke kiëët, ku kë kɔɔr Bɛ̈nydït yen aye rɔt lëu.

²² Kë ye kɔɔr tëde raan ee luɔi bï yen aa raan adöt, ku raan kuanynyin aŋuän në raan ee lueth töör.

²³ Riëëu de Bɛ̈nydït ee kueer ë pïïr, ee raan tɔ rɛ̈ɛ̈r ke mit piɔ̈u, ku cïn kërɛɛc yök en.

²⁴ Këcam cïï adaakrɔt ŋuany acie ɣet ë yethok.

²⁵ Dui de raan piɔlpiɔ̈u ee kɔc ee pëk thïn tɔ wɛ̈ɛ̈t, ku jäny de raan ee käŋ yökiic ee ŋïnydɛn ë käŋ ŋuakic.

²⁶ Aa yäär të yɔŋ ë raan wun ku cieec man.

²⁷ Mɛnhdï, mälë në pïŋ de jiëëm, ke cïn kë bä bɛ ŋic.

²⁸ Cäätɔ alueeth ee kɔc ee yic looi dɔl gup, ku kɔc ee karɛc looi ayek luɔi de kërac yök ke mit.

²⁹ Kuöm ee këde kɔc ke piɔlpiɔ̈u, ku cïï waat jël në kɔc piɔl piɔ̈ɔ̈th kɔ̈ɔ̈th.