Kɛ̈ŋ 17 - JAM DE NHIALIC 2011

¹ Baai nyiiyë kuïn nyin ku nu mät apiɛth, në baai ciɛmë kamit ku nu agööth.

² Lïm pelnɔm abï gäm riɛl dït në mɛnh cïn guöp riëëu, ku abï gäm biäk de ka löök lak kekë mïth.

³ Bɛ̈nydït ee kɔc them piɔ̈ɔ̈th, cït man ye adhääp kekë ateek them në mac.

⁴ Kɔc ee karɛc looi anhiaarkï pïŋ de karɛc, ku liëp thuäär në karɛc kek aye alueth piŋ.

⁵ Raan ee kɔc kuanynyïïn dɔl gup, alɛ̈ɛ̈t Aciëŋden, ku paan cieŋ nɔk në riäŋ de paan däŋ acïkï bï tɔ̈u ke ke kënë kuum.

⁶ Kɔcdït ayek aa dhuëëŋ në mïth ke mïthken, ku mïth ayek kenïïm lɛc në wärken.

⁷ Jam piɛth acïï rɔ̈ŋ kekë raan piɔl piɔ̈u, ku jɔ rac arëët të ye bɛ̈ny wël töör.

⁸ Aye kɔc kɔ̈k tak an luɔi de kumthok acït yath, ee raan tɔ tiëm në këriëëcdɛn ye looi ëbɛ̈n.

⁹ Raan ee karɛc täc nïïm ee nhiëër kɔɔr, ku nyöŋ de käŋiic ee määth pääk.

¹⁰ Jäny ee raan ee käŋ yökiic nieeŋ piɔ̈u, awär dui de raan piɔl piɔ̈u në waat bɔt.

¹¹ Dhuŋ de löŋ kɔ̈u ee këde raan ee karɛc looi, ku aye tuöc cök tuny kec piɔ̈u.

¹² Rɔ̈mdu wekë raan piɔl piɔ̈u arac, aŋuän bä rɔ̈m wekë köör cïï aduurke jɔt.

¹³ Na ye raan ee këpiɛth puk nɔm në kërac, ke kërac acïï duëër kɔn jäl paandu.

¹⁴ Të cïï agɔ̈th e thar cak aye dap duöm piny ke cï bï ɣeer, aduëër ciët wɛ̈ɛ̈r cïï thɔc dhuɔɔŋ.

¹⁵ Päl de raan de guöp awäc ku kuöm de raan cïn kë cï looi, amɛɛn Bɛ̈nydït keek.

¹⁶ Eeŋö duëërë raan piɔl piɔ̈u nɔm dɛk wëu bï yen ke wëët në nɔm cïï käŋ ee yökiic?

¹⁷ Määth ee tɔ̈u anande, ku dhiënh nhiaar rɔt ee tïc në kööl ë agɔ̈th.

¹⁸ Raan cïï käŋ ee yökiic ee yen ee rɔt dɔ̈m cuöt ë käny lei.

¹⁹ Nhiëër agɔ̈th ee nhiëër awɛ̈ɛ̈c, ku lɛc de rɔt ee cɔ̈t de riääk.

²⁰ Raan de yic aguuk acie kuɛth, ayï liem yath ee riääk bɛ̈ɛ̈i.

²¹ Acïn miɛtëpiɔ̈u ee nu tëde wun mɛnh piɔl piɔ̈u.

²² Miɛt ë piɔ̈u ee pial ë guöp bɛ̈ɛ̈i, ku jiɛthëpiɔ̈u ee riɛl nyaai ë raan guöp.

²³ Raan ee karɛc looi ee kum thok nööm në cuëër, ke bï löŋ cï ŋiëc guiir riɔ̈ɔ̈k.

²⁴ Raan ee käŋ yökiic ee yenɔm wɛ̈l pɛlënɔm, ku jɔ raan piɔlpiɔ̈u nyin kɛɛc ë piny thar.

²⁵ Dhiënëpiɔ̈u ku jiɛthëpiɔ̈u abïk tɔ̈u tëde kɔc ë dhiëth mɛnh piɔl piɔ̈u.

²⁶ Kuöm de raan cïn kë cï looi, ayï dui de bäny ë waat acïï piɛth.

^27-28 Raan ee käŋ yökiic acie dap gɔ̈th, ee yethok tiit. Ayï mim de raan piɔl piɔ̈u ee ye tɔ tïŋ cït kë pel nɔm.