Kɛ̈ŋ 16 - JAM DE NHIALIC 2011

¹ Kïït ee këde raan ku lee thök ë Bɛ̈nydït ciin.

² Raan ee rɔt tïŋ ke pïïr ë kueer awai, ku Bɛ̈nydït, Yen aŋic kë tɔ̈u në yepiɔ̈u.

³ Ye këriëëcduön loi ëbɛ̈n gäm Bɛ̈nydït, ke kïïtdu bï tiam.

⁴ Bɛ̈nydït ee këriëëc looi ke de kë lui yen, ayï kɔc ee karɛc looi në akööldɛn ë riääk.

⁵ Raan ee rɔt lɛɛc ëbɛ̈n ee kërɛɛcdïït mɛɛn Bɛ̈nydït, ku acïï bï poth ke kënë luöi këtuc.

⁶ Bɛ̈nydït ee kɔc adööt ku kɔc piɛth piɔ̈ɔ̈th päl awɛ̈ɛ̈c. Ka ye Bɛ̈nydït riëëu ke cïn kërac bï yï yök.

⁷ Raan cïï Bɛ̈nydït piɔ̈u miɛt ke yen, aye Bɛ̈nydït kɔc ke aterde puk ke ke ye määthke.

⁸ Apiɛth bä kalik yök në piathëpiɔ̈u, në kajuëc ye yök në luɔi rɛɛc de ruëëny yic.

⁹ Kïït ee këde raan ku jɔ Bɛ̈nydït thöl thok.

¹⁰ Wël ke bɛ̈ny ayek ciët röl ë Nhialic, arɔ̈ŋ bï löŋ de raan ëbɛ̈n ŋiëc aa guiir.

¹¹ Ŋiëc thëm piɛth abɔ̈ tëde Bɛ̈nydït.

¹² Acïï rɔ̈ŋ bï bɛ̈ny kërac looi, na rëër në piathëpiɔ̈u abï cieŋ në bäänyic.

¹³ Liem ee yith lueel ee miɛt ë piɔ̈u de bɛ̈ny, ku ade naamde tëde raan jam në yith.

¹⁴ Agönh ë bɛ̈ny ee tuny de thuɔɔu, ku raan pelnɔm ee bɛ̈ny tɔ lɔ piɔ̈u piny.

¹⁵ Miɛt ë piɔ̈u de bɛ̈ny acït deŋ yaak ee pïïr bɛ̈ɛ̈i.

¹⁶ Pɛlënɔm ade naamdɛndït awär adhääp, ku yöŋ de käŋiic ade naamde awär atek.

¹⁷ Raan piɛth piɔ̈u acie tëëk ë kueer racic, ka tiët ë rɔt ee gël ë wëi.

¹⁸ Lɛc aye riääk kuany cök.

¹⁹ Rëër de raan kekë kɔc kuanynyïïn, yen aŋuän në luɔi bï yïn aa tek në kake rum wekë kɔc ee röt leec.

²⁰ Raan ee lööŋ ke Bɛ̈nydït piŋ ee tiam, ku athiɛɛi ee këde raan ee Ye ŋɔ̈ɔ̈th.

²¹ Raan pel nɔm aye ŋic në yöŋdɛn ë käŋiic, ku wël mit ee ke lueel ayek kɔc puk piɔ̈ɔ̈th.

²² Pɛlënɔm ee awaŋ de pïïr de raan cï ye yök, ku pial ë piɔ̈u yen ee wun dui.

²³ Raan pel nɔm ee jam ë kë ŋic, ku kë lueel yen ee kɔc puk piɔ̈ɔ̈th.

²⁴ Jam piɛth acït miök de kiëc, miɛtden ee pial ë guöp bɛ̈ɛ̈i.

²⁵ Kueer ee raan tïŋ ke cït yic, aduëër lɔ guut tëde thuɔɔu.

²⁶ Yäc ee kɔc cieŋ.

²⁷ Raan col piɔ̈u ee kiɛɛr rac looi, ku dɛ̈p wëlke cït many riäk piny.

²⁸ Kɔc ee käŋ liääp ee kek ee tuum caath ku këëkkï kɔc ayï mäth.

²⁹ Raan ee gɔ̈th, ee kɔc wat në kueer racic në mɛth.

³⁰ Tit rɔt në kɔc ee kɔc nieu në kenyïïn ku ŋuɛnkï ke liëp anyoothkï kiɛɛr rac.

³¹ Luɔu de nɔm yen ee göl ë dhuëëŋ aye yök në piathëpiɔ̈u.

³² Raan cie dap gɔ̈th aŋuän në raan ril në tɔŋic, ku ŋuän raan ee yethok tiit në raan dɔm wut.

³³ Kɔc ayek gɛk dɛɛny, ku kë bï rɔt lëu acath ke Bɛ̈nydït.