Kɛ̈ŋ 15 - JAM DE NHIALIC 2011

¹ Ŋiëc bëër në piɔ̈n lir ee agɔ̈th tɔ lɔ piny, ku wël tuc thook ayek agɔ̈th tɔ ɣeer.

² Jam de ŋïnydekäŋ ë raan pel nɔm ee kɔc diir, ku thuäär kɔc piɔl piɔ̈ɔ̈th thook në wël cïn naamden.

³ Acïn të cïï nyin ë Bɛ̈nydït ee lɔ thïn, ee kɔc piɛth woi ku kɔc rac.

⁴ Liem piɛth acït awaŋ de pïïu, ku liem ee lueth lueel ee kɔc riɔ̈ɔ̈k piɔ̈ɔ̈th.

⁵ Mɛnh piɔl piɔ̈u ee wun cuiit, ku raan ee wëët piŋ ee nɔm tiëër.

⁶ Kɔc piɛthpiɔ̈ɔ̈th ayek piɔ̈ɔ̈th miɛt në kajuëcken yiic, ku kake kɔc ee karɛc looi ayek keek yiɛ̈n ateer.

⁷ Ŋïny de käŋ aye thiäi piny në kɔc pel nïïm, ku aliu tëde kɔc piɔl piɔ̈ɔ̈th.

⁸ Miɔ̈c näk ye kɔc ee karɛc looi gam ee gök de kërɛɛc mɛɛn ë Bɛ̈nydït, ee lɔ̈ŋ de kɔc piɛth piɔ̈ɔ̈th yen anhiɛɛr.

⁹ Kueer ë kɔc ee karɛc looi ee gök de kërɛɛc mɛɛn Bɛ̈nydït, ku anhiaar kɔc ee rɛ̈ɛ̈r në piathëpiɔ̈uwic.

¹⁰ Päl ë kueer ee kuöm rac bɛ̈ɛ̈i, ku reec de jäny ee thuɔɔu.

¹¹ Na ye Bɛ̈nydït riäŋ cï thiaan paan ë thuɔɔu tïŋ, ka cïï kë nu ë kɔc piɔ̈ɔ̈th duëër bɛ kuc.

¹² Raan piɔlpiɔ̈u aman jäny, acie lɔ në kɔc pel nïïm lɔ̈m.

¹³ Miɛt ë piɔ̈u ee tïc ë raan nyin, ku tɔ dhiën ë piɔ̈u raan cath ëduuŋduuŋ.

¹⁴ Wëët de kɔc pelnïïm acie guut, ee kɔc piɔl piɔ̈ɔ̈th kek ee pëk në pial ë piɔ̈ndenic.

¹⁵ Kɔc yɔŋ aye pïïrden ëbɛ̈n aa nuan, ku ye pïïr de kɔc mit piɔ̈ɔ̈th ëbɛ̈n aa dhuëëŋ.

¹⁶ Lïk de käŋ mat ke riëëu de Nhialic yen aŋuän në juëc de käŋ kekë rëër në wëliic.

¹⁷ Baai nyiiyë këcam nyin ku nu nhiëër apiɛth në baai ciɛmë miöök ku nu män thïn.

¹⁸ Raan ee dap gɔ̈th anhiaar teer, ku raan ee käŋ täc nïïm ee mät bɛ̈ɛ̈i.

¹⁹ Na ye adaakrɔt kë le yïn thïn ëbɛ̈n yïn bï karil yiic aa yök, ku na ye raan adöt ka acïn nuan bä yök.

²⁰ Mɛnh pel nɔm ee kɔc dhiëth en tɔ mit piɔ̈ɔ̈th, ku mɛnh piɔl piɔ̈u ee ke biɔɔn gup.

²¹ Pial ë piɔ̈u ee miɛt ë piɔ̈u de raan cïï käŋ ee yökiic, ku cath raan ee käŋ yökiic në kueer piɛth.

²² Të cïn jiëëm kïït ee riääk, ku ayek tiam në juëc de kɔc ee kɔc jääm.

²³ Ŋiëc bëër ee kɔc tɔ mit piɔ̈ɔ̈th ku apiɛth arëët të lueelë yen në akööl rɔ̈ŋ ke keek.

²⁴ Kueer ë raan pelnɔm ee pïïr ke cïï lɔ paan ë thuɔɔu.

²⁵ Ɣööt ke kɔc ee röt leec aye Bɛ̈nydït ke jäp piny, ku gël kake diëër abɛɛr.

²⁶ Täŋ de kɔc ee karɛc looi ee gök de kërɛɛc mɛɛn Bɛ̈nydït, ee jam de kɔc awai yen anhiɛɛr.

²⁷ Raan dït piɔ̈u ee kɔc cam, ee baaide yiɛ̈nic awuɔɔu, ku raan man kum thok ee rëër në miɛt ë piɔ̈uwic.

²⁸ Raan piɛth piɔ̈u ee kɔn ciët, ke kën bëër, ku raan ee karɛc looi ee thok thuäär në karɛc.

²⁹ Lɔ̈ŋ de kɔc ee karɛc looi acie lɔ në Nhialic yïc, ee lɔ̈ŋ de kɔc piɛth piɔ̈ɔ̈th yen ee piŋ.

³⁰ Ŋeek de dɔl ee piɔ̈u tɔ mit, ku thoŋ piɛth cï bɛ̈n ee pial ë guöp bɛ̈ɛ̈i.

³¹ Raan ee piŋ në jäny bï ye kiɛm piny, ee ye lɛɛr në kɔc pel nïïmiic.

³² Ee biɔ̈n ë rɔt yen ee raan jiëëm dhɔɔtic, ku nhiëër ë jäny ee yöŋ de käŋiic.

³³ Riëëu de Bɛ̈nydït ee wëët de pɛlënɔm, ku koor ë rɔt piny ee riëëu bɛ̈ɛ̈i.