Kɛ̈ŋ 14 - JAM DE NHIALIC 2011

¹ Tiiŋ de pɛlënɔm ee gende yïk aril, ku tiiŋ piɔl piɔ̈u ee dhiënde thiäi piny.

² Cäth ë kueer adötic ee yen ee riëëu de Bɛ̈nydït, ku kɔc ee cath ë kueer ŋɔlic ayek En biɔɔn.

³ Jam de pial ë piɔ̈u ee wun dui, ku raan pel nɔm aye wëlke kony.

⁴ Acïn adhɛn ee juëc wun cïn thön ee pur, ee riɛl ë thön lui yen ee rap juëc.

⁵ Cäätɔ yic acie mɛth, ku thoŋ ë cäätɔ alueeth ee thuäär ë lueth.

⁶ Pɛlënɔm kɔɔr raan ee kɔc dɔl gup acie yök, ku ŋïny de käŋ apiɔlic tëde raan ee käŋ yökic.

⁷ Ye rɔt mec wei në raan piɔl piɔ̈u, acïn ŋïny de käŋ bä yök në yethok.

⁸ Pɛlënɔm ee ŋiëc ciët, ku pial ë piɔ̈u ee ya mɛth.

⁹ Päl awɛ̈ɛ̈c acïï kɔc piɔl piɔ̈ɔ̈th ee diɛɛr, ee kɔc piɛth piɔ̈ɔ̈th kek ee ye kɔɔr.

¹⁰ Miɛt ë piɔ̈u ku nɔn yen jiɛth ë piɔ̈u de raan acie rɔm.

¹¹ Riääk ee këde ɣööt ë kɔc ee karɛc looi, ku rɛ̈ɛ̈r bɛ̈i ke kɔc piɛth piɔ̈ɔ̈th në athiɛɛi.

¹² Kueer ee raan tïŋ ke cït yic, aduëër lɔ guut tëde thuɔɔu.

¹³ Dɔl aduëër diu de piɔ̈u thiaan, ku të cïï miɛt ë piɔ̈u jël, ke dhiën ë piɔ̈u rɛ̈ɛ̈r.

¹⁴ Raan ee käŋ muk në ye adöl ee kuɛth në ariöp de luɔide, ku kueth raan piɛth në luɔide.

¹⁵ Raan ee pëk thïn ee këriëëc guɔ gam ëthiäu, ku raan ee nɔm tiëër aŋic të le yen thïn.

¹⁶ Raan pelnɔm ee rɔt tiit ku mec rɔt wei në kërac, ku raan piɔl piɔ̈u acie diɛɛr ë riäŋ bï ye yök.

¹⁷ Raan ee dap gɔ̈th apiɔl piɔ̈u, ku raan ee kiɛɛr rac tak aye maan.

¹⁸ Pëk thïn ee raan thɛl ë pial ë piɔ̈uwic, ku yök raan ee nɔm tiëër göl de ŋïny de käŋ.

¹⁹ Kɔc ee karɛc looi abïk nyuc në kɔc piɛth piɔ̈ɔ̈th nïïm.

²⁰ Raan kuanynyin aye caany ayï kɔc raan në yen, ku raan kueth ade nɔm määth juëc cie kueen.

²¹ Awäc atɔ̈u kekë raan ee kɔc thiääk ë yen biɔɔn gup, ku raan ee kɔc kuanynyïïn kony aye thieei.

²² Määr cie këde kɔc ee kiɛɛr rac cät? Ku kɔc ee kapiɛth kiëët ayek nhiëër kekë piath ë piɔ̈u yök.

²³ Lɛ̈th ë guöp ade naamde, ku luɔi de jam ë thok ee nyin kuany bɛ̈ɛ̈i.

²⁴ Göl de kɔc pel nïïm ee pɛlënɔmden, ku ŋuak pial ë piɔ̈u enyin tëde kɔc piɔl piɔ̈ɔ̈th.

²⁵ Cäätɔ yic ee kony, ku mɛth ee këde cäätɔ alueeth.

²⁶ Riëëu de Bɛ̈nydït aa ŋäth ril ëtör tëde raan kekë mïthke.

²⁷ Riëëu de Bɛ̈nydït ee awaŋ de pïïr ee raan nyaai në wïn ë thuɔɔuwic.

²⁸ Dhuëëŋ de bɛ̈ny ee tïc në kɔc juëc ye wat, na liukï acie ya bɛ̈ny.

²⁹ Raan ee käŋ täc nïïm ee käŋ yökiic, ku pial ë piɔ̈u ee këde raan ee dap gɔ̈th.

³⁰ Piɔ̈n cïï kajuëc ee tak ee guöp tɔ piɔl, ku tiɛɛl acït tëtök cie dem.

³¹ Raan ee kɔc kuanynyïïn yɔŋ, alɛ̈ɛ̈t Aciëŋden, ku raan ee piɔ̈u kok ke keek ee Nhialic riëëu.

³² Luɔi rac ee kɔc ee karɛc looi wit, ku yök raan piɛth piɔ̈u gëlgël të ciɛk en thou.

³³ Pɛlënɔm ee rëër në raan ë käŋ yökiic piɔ̈u, ku akuc ë raan piɔl piɔ̈u.

³⁴ Piathëpiɔ̈u ee jur jat nhial, ku luɔi de kërac ee kɔc riɔ̈ɔ̈k.

³⁵ Bɛ̈ny ee piɔ̈u miɛt kekë raan ŋic luɔi, ku raan ë ayäär bɛ̈ɛ̈i ee ye tɔ göth.