Kɛ̈ŋ 13 - JAM DE NHIALIC 2011

¹ Mɛnh pel nɔm ee jiëëm de wun piŋ, ku mɛnh ee wun dɔl guöp ee jäny rɛɛc.

² Kapiɛth ee bɛ̈n ë raan piɛth liep ayek röt dɔ̈k en, ku bɔ̈ agɔ̈th tëde alueeth.

³ Tiët ë thok ee wëi gël, ku wël ye dɛɛny ayek raan riɔ̈ɔ̈k.

⁴ Adaakrɔt ee këdäŋ kɔɔr në piɔ̈nde ëbɛ̈n ku acie yök, ku raan ee luui apiɛth ee kuɛth.

⁵ Kɔc piɛthpiɔ̈ɔ̈th amankï lueth, ku ayäär ee bɛ̈n tëde kɔc ee karɛc looi.

⁶ Luɔi de piathëpiɔ̈u ee raan a piɔ̈u wai gël, ku raan ee karɛc looi aye karɛcke riɔ̈ɔ̈k.

⁷ Raan däŋ ee rëër cï raan kueth, ku acïn kë nu tëde yen. Ku raan däŋ ee rëër cï raan kuanynyin, ku akueth aläl.

⁸ Kajuëc ke raan kueth aduëërkï ye wɛ̈ɛ̈r bei, ku raan kuanynyin acïn kë duëër en riɔ̈ɔ̈c.

⁹ Pïïr de raan piɛth piɔ̈u acït ɣɛɛr ee piny meer, ku kɔc ee karɛc looi ayek lɔ dum piny cït many cï nɔ̈k.

¹⁰ Dït ë nɔm ë agööth bɛ̈ɛ̈i, ku yök pɛlënɔm tëde raan ee jiëëm piŋ.

¹¹ Kajuëc ye yök ë wup ayek riääk, ku ka ye yök ëmääth ayek kuet.

¹² Aŋäth cie tiam ee Dhiënëpiɔ̈u bɛ̈ɛ̈i, ku aŋäth tiëm ee tim de pïïr.

¹³ Dhɔ̈t ë wël ee riääk bɛ̈ɛ̈i, ku raan ee lööŋ piŋ athiɛɛi lak.

¹⁴ Wëët de pɛlënɔm ee awaŋ de pïïr ee raan nyaai në wïn ë thuɔɔuwic.

¹⁵ Ŋïny de yöŋ ë käŋiic ee nhiëër bɛ̈ɛ̈i, ku kueer cïn adöt ee nuan.

¹⁶ Raan tiëër nɔm ëbɛ̈n ee luui në kë ŋic, ku ciɛɛl kɔc piɔl piɔ̈ɔ̈th pial ë piɔ̈nden.

¹⁷ Tuny rac ee lööny ë riääkic, ku pial ë guöp ee bɛ̈n tëde tuny adöt.

¹⁸ Kuany ë nyin kekë ayäär ayek aa kak ë raan ee jiëëm dhɔɔtic, ku pïŋ de jiëëm ee dhuëëŋ de guöp bɛ̈ɛ̈i.

¹⁹ Kë kɔɔr ee rɔt lëu, ee raan tɔ mit piɔ̈u, ku mec de rɔt wei në luɔi de karɛc amɛɛn kɔc piɔl piɔ̈ɔ̈th, yen acïï kek kë kɔɔrkï ee yök.

²⁰ Raan rɛ̈ɛ̈r ke röör pelnïïm ee nɔm pɛl, ku määth de kɔc piɔl piɔ̈ɔ̈th ee nuɛɛn ee buɔ̈t bɛ̈ɛ̈i.

²¹ Kɔc ee karɛc looi aye riääk ke cop cök, ku ye athiɛɛi ariöp de kɔc piɛthpiɔ̈ɔ̈th.

²² Raan piɛth ee kajuëcke nyäŋ mïthke, ku kajuëc ke raan ee karɛc looi aye Nhialic ke lɔ̈ɔ̈k tɔ lɛk ë kɔc piɛth piɔ̈ɔ̈th.

²³ Dom de raan kuanynyin aduëër luɔk në rɛɛp juëc, ku jɔt kɔc rac keek në luɔi rac.

²⁴ Nhiëër de meth acath ke dui në kë cï wööc, ku na ye pɔ̈l ka aman.

²⁵ Kɔc piɛth piɔ̈ɔ̈th ade kë ee ke lëu thook, ku rɛ̈ɛ̈r kɔc ee karɛc looi në cɔk.