Kɛ̈ŋ 12 - JAM DE NHIALIC 2011

¹ Nhiëër ë jäny ee nhiëër ë ŋïny de käŋ, ku män ë jäny yen ee dhɔ̈ɔ̈n.

² Bɛ̈nydït ee piɔ̈u miɛt kekë kɔc piɛth piɔ̈ɔ̈th, ku kuum kɔc ee kiɛɛr rac cät.

³ Luɔi de kërac ee raan tɔ rɛ̈ɛ̈r aŋuɛm tök, ku kɔc piɛthpiɔ̈ɔ̈th acïï ke ee wuuk.

⁴ Tiiŋ piɛth ee göl ë monyde, ku tiiŋ cïn guöp riëëu acït tëtök apajic në yuɔɔmde yic.

⁵ Kɔc piɛthpiɔ̈ɔ̈th ayek ciët ke ke kïït kɔc nïïm, ku kiɛɛr rɛɛc ë kɔc ee karɛc looi ee ya mɛth.

⁶ Liëp ke kɔc ee karɛc looi athiëŋkï në rim, ku kony kɔc në jam de kɔc piɛthpiɔ̈ɔ̈th.

⁷ Kɔc ee karɛc looi aye ke wit ku gur ɣöötken thook, ku rɛ̈ɛ̈r bɛ̈i ke kɔc piɛth piɔ̈ɔ̈th ananden.

⁸ Kɔc pel nïïm aye ke lɛ̈c pɛlënɔmden, ku ciën yöŋ de käŋiic ee biɔ̈n ë guöp bɛ̈ɛ̈i.

⁹ Raan kuany nyin ee luui yetök, aŋuän në raan ee rɔt tɔ ye gök de bɛ̈ny ku cïn nɔm këciɛm.

¹⁰ Raan piɛth piɔ̈u ee ɣɔ̈kke ŋiëc döt, ku luɔi piɛth de raan rac ë akuöörkuöör luöi ɣɔ̈kke.

¹¹ Raan ee pur ee nɔm dɛ kacaam juëc, ku raan ee riŋ në ka cïn naamde cök acïn kë ŋic.

¹² Alooc bäär de kɔc ee karɛc looi ye kek röt gël, abïï riɔ̈ɔ̈k, ku kääc kɔc piɛth piɔ̈ɔ̈th në cökkeniic.

¹³ Liem bɛ̈ɛ̈r de kɔc ee karɛc looi ee ke dɔm, ku wël ke kɔc piɛthpiɔ̈ɔ̈th ayek keek pɔɔth në riääkic.

¹⁴ Kapiɛth ee bɛ̈n bei ë raan thok ayek e kueth, ku luɔi de yen ciin ee rɔt dɔ̈k en.

¹⁵ Aye raan piɔl piɔ̈u lueel an, yic ëbɛ̈n ee bɛ̈n bei në yethok, ku raan pelnɔm ee jiëëm piŋ.

¹⁶ Raan piɔl piɔ̈u ee ŋeenyde dap nyuɔɔth, ku guöm de lɛ̈ɛ̈t ee këde raan ee nɔm tiëër.

¹⁷ Yith ayek kak ë kɔc adöt, ku cäätɔɔ alueth ayek kɔc math.

¹⁸ Deeny de wël kënë cätiic atök ke thook cït tɛ̈m de tɔŋ moth, ku wël lueel në pɛlënɔm acïtkï wɛ̈ɛ̈l ee pial ë guöp bɛ̈ɛ̈i.

¹⁹ Lueth acïkï ee rëër, ee yith kek atɔ̈u ananden.

²⁰ Kɔc ee karɛc kiëët ayek piɔ̈ɔ̈th thiäŋ në mɛth, ku miɛt ë piɔ̈u ee këde kɔc ee mät bɛ̈ɛ̈i.

²¹ Acïn këtuc ye luöi kɔc piɛthpiɔ̈ɔ̈th, ee kɔc ee karɛc looi kek ye nuɛɛn juëc ke yök.

²² Liem ee lueth töör ee gök de kërɛɛc mɛɛn Bɛ̈nydït, ku anhiaar kɔc ee luui apiɛth.

²³ Kɔc ee nïïm tiëër ayek kethook tiit, ku thuäär dhän thook në ka ɣääriic.

²⁴ Raan ee luui apiɛth ee dɛ riɛl në kɔc nïïm, ku raan adaakrɔt ee ya lïm ee kɔc luööi.

²⁵ Diɛɛr ee raan tɔ cath ëduuŋduuŋ, ku wël piɛth ayek en jat nhial.

²⁶ Raan piɛthpiɔ̈u ee määthke thɛl në kueer piɛth yic, ku aye raan ee karɛc looi ke mɔ̈ɔ̈r.

²⁷ Adaakrɔt acïï lɛ̈n cï nɔ̈k ee yaaŋ, ku raan ee luui apiɛth ee kuɛth ë yecin.

²⁸ Piathëpiɔ̈u ee kueer de yic pïïr, ku luɔi de awäc ee kueer de yic thuɔɔu.