Kɛ̈ŋ 11 - JAM DE NHIALIC 2011

¹ Kuöc thëm de yic cuëër ee gök de kërɛɛc mɛɛn Bɛ̈nydït, ee thëm piɛth yen anhiɛɛr.

² Lɛc ë rɔt ee lɔ guut ayäär, ku koor ë rɔt piny ee pɛlënɔm.

³ Piathëpiɔ̈u de kɔc piɛthpiɔ̈ɔ̈th ee ke caath. Ku ruëëny ee kɔc ee käŋ liääp riɔ̈ɔ̈k.

⁴ Kuɛth acïn kony në kööl ë agɔ̈th, ee piathëpiɔ̈u yen ee raan kony wëi në thuɔɔu.

⁵ Luɔi de piathëpiɔ̈u de raan adöt ee yen tɔ cath në kueer lɔ citic, ku raan ee karɛc looi aye karɛcke wit.

⁶ Piathëpiɔ̈u de raan adöt ee ye kony, ku kɔc ee kɔc math aye ŋɔ̈ɔ̈ŋ de kërac keek mac.

⁷ Të cïï kɔc ee karɛc looi thou, ayek thou në aŋäthden ëtök. Ku aŋäth cï tɔ̈ɔ̈u ë kuɛthic ee ciën naamde.

⁸ Kɔc piɛth piɔ̈ɔ̈th aye keek kony në nuɛɛn yiic, ku kɔc ee karɛc looi ayek löny thïn.

⁹ Liem de raan cïï Nhialic ŋic ee raan rɛ̈ɛ̈r ke yen riɔ̈ɔ̈k, ee pɛlënɔm yen abï raan piɛth piɔ̈u kony.

¹⁰ Wut ee yic dɛ miɛt ë piɔ̈u të cïï kɔc piɛthpiɔ̈ɔ̈th dɛ kajuëc, ku të cïï kɔc ee karɛc looi thou kiɛɛu de miɛtëpiɔ̈u aye moc.

¹¹ Wut ee lɔ tueŋ në athiɛɛi de kɔc piɛth piɔ̈ɔ̈th, ku liem de kɔc ee karɛc looi ee ye riɔ̈ɔ̈k.

¹² Pialëpiɔ̈u ee raan tɔ biɔn kɔc rɛ̈ɛ̈r ë yen, ku raan ee käŋ yökiic ee yeliep tiit.

¹³ Amantum acie ŋɔ̈ɔ̈th në këcïmoony, ee raan adöt yen acie luath thok.

¹⁴ Wut ee löny të cïn en bɛ̈ny, ku juëc de kɔc ee kɔc jääm ee wut tɔ rɛ̈ɛ̈r ë mätic.

¹⁵ Cuöt ë käny lei ee nuan bɛ̈ɛ̈i, ku raan cïï rɔt ë dɔ̈m keek ee piɔ̈u miɛt.

¹⁶ Tiiŋ ee piɔ̈u adhuɛ̈ŋ ee riëëu yök, ku tiiŋ cïn guöp riëëu ee yäär. Kɔc lir yiic acïkï wëu duëër kɔn yök, ku kɔc ke akuöörkuöör ayek kuɛth yök.

¹⁷ Kokëpiɔ̈u ee raan yiɛ̈n këpiɛth, ku bïï akuöörkuöör bɔ̈ɔ̈t.

¹⁸ Acïn kë ye raan ee karɛc looi yök në luɔide yic, ku kɔc ee piathëpiɔ̈u com kek ade ariöp yic.

¹⁹ Pïïr ee këde raan kääc aril në piathëpiɔ̈uwic, ku raan ee kat ë karɛc cök aye thuɔɔu yök.

²⁰ Liëëp de käŋ ee gök de kërɛɛc mɛɛn Bɛ̈nydït, ku anhiaar kɔc adööt.

²¹ Ŋiɛckï ëgɔk nɔn cïï kɔc ee karɛc looi bï pɔ̈l ke ke kënë kuum, ee kɔc piɛth piɔ̈ɔ̈th kek bï kony wëi.

²² Läk de tiiŋ cïn guöp riëëu acït jonh adhääp cieŋ ë kudhur ë yewum.

²³ Kë ye kɔc piɛth piɔ̈ɔ̈th kɔɔr ee lɔ guut në këpiɛth, ku lɔ aŋäth de kɔc ee karɛc looi thök në agɔ̈th.

²⁴ Amiööc aye kake kenyïïn ŋuak, ku raan ril ciin ee nyin bɛ̈n kuany.

²⁵ Amiööc abï kuɛth, në abïny lɔ ku abïny bɔ̈.

²⁶ Raan ee rap thiaan aye läm aciɛɛn, ku thieei raan ee ke ɣaac.

²⁷ Luɔi de këpiɛth yen aye kɔc nhiaar, ku kërɛɛc ye raan kɔɔr ee rɔt dɔ̈k en.

²⁸ Aŋäth de kajuëc ee löny bɛ̈ɛ̈i, ku kɔc piɛthpiɔ̈ɔ̈th ayek nyok cï yïth ke tiim mɔ̈i.

²⁹ Kɔc piɔl piɔ̈ɔ̈th ayek riääk lɛɛr në bɛ̈ikeniic, ayek yom lɔ̈ɔ̈k lak. Ku kek ee bɛ̈n aa lïïm ke kɔc pel nïïm.

³⁰ Luɔi de piathëpiɔ̈u ee pïïr bɛ̈ɛ̈i, ku akuöörkuöör ee näk.

³¹ Na ye kɔc piɛth piɔ̈ɔ̈th ariöp yök ee pinyë nɔm, ke kɔc ee wäc ku kɔc ee karɛc looi acïï ke bï pɔ̈l.