Kɛ̈ŋ 10 - JAM DE NHIALIC 2011

Kɛ̈ŋ ke Tholomon

¹ Mɛnh pel nɔm ee kɔc dhiëth en tɔ mit piɔ̈ɔ̈th: Ku dhiën ë piɔ̈u aye mɛnh piɔl piɔ̈u yiɛ̈n keek.

² Kuɛth yök në kuɛɛr rac acïn kony, ee piathëpiɔ̈u yen ee raan kony wëi.

³ Bɛ̈nydït acïï kɔc piɛth piɔ̈ɔ̈th ee tɔ nɛ̈k cɔk, ku abï kɔc ee karɛc looi pɛ̈n kë kɔɔrkï.

⁴ Adaakrɔt ee nyin kuany, ku raan ee luui ee kuɛth.

⁵ Raan ee nɔm tiëër ee rɛɛpke dap tem mɔ̈i, ku ë ayäär të ye raan niin akööl ke tëm.

⁶ Athiɛɛi yen ee göl ë kɔc piɛth piɔ̈ɔ̈th, ku ye liëp ke kɔc ee karɛc looi täu rɛɛcden thiaan.

⁷ Täŋ ee kɔc nïïm tak në raan piɛth piɔ̈u acie määr, ku man rin ke kɔc ee karɛc looi.

⁸ Raan pelnɔm ee lööŋ piŋ, ku bɔ̈ riääk tëde raan piɔlpiɔ̈u.

⁹ Nɔm lääu ee këde kɔc piɛthpiɔ̈ɔ̈th ku raan ruëëny aye bɛ̈n yök.

¹⁰ Nieu de nyin de yic mɛth ee agɔ̈th bɛ̈ɛ̈i, ku raan ee jam weeric ku nyooth yic ke cïï riɔ̈c ee mät bɛ̈ɛ̈i.

¹¹ Jam de raan piɛth piɔ̈u yen awaŋ de pïïr, ku ye liëp ke kɔc ee karɛc looi täu rɛɛcden thiaan.

¹² Män ee agööth jat nhial, ku nhiëër ee agööth täc nïïm.

¹³ Pɛlënɔm aye yök në liëp ke kɔc ee käŋ yökiic, ku dui ee këde raan piɔl piɔ̈u.

¹⁴ Röör pelnïïm ayek ŋïnydekäŋ ŋuak, ku liem bɛ̈ɛ̈r ë raan piɔl piɔ̈u ee ye yiɛ̈n riääk.

¹⁵ Kajuëc ke raan kueth ayek könde, ku kuany de nyin ee riäŋ de raan cïn nɔm käŋ.

¹⁶ Piathëpiɔ̈u ee ariöpde pïïr, ku kɔc ee karɛc looi aye karɛc ke yök.

¹⁷ Raan ee jiëëm piŋ acath në kueer ë pïïric, ku reec de jäny ee raan mɔ̈ɔ̈r.

¹⁸ Raan ee män moony ee lueth töör, ku aciɛɛth wël apiɔl piɔ̈u.

¹⁹ Jam juëc, ee raan tɔ wäc, ku tiët ë thok ee pɛlënɔm.

²⁰ Liem de raan piɛth piɔ̈u acït ateŋ awai, ku täŋ de raan ee karɛc looi acïn naamde.

²¹ Kuɔɔny de kɔc juëc ee bɛ̈n në liëp ke kɔc piɛth piɔ̈ɔ̈th, ku thou kɔc piɔl piɔ̈ɔ̈th në ciën ciët.

²² Kuɛth ee athiɛɛi de Bɛ̈nydït, ku acie luɔiduöndït.

²³ Luɔi de kërac tëde raan piɔlpiɔ̈u acït thuëëc de acandii, ku kake pɛlënɔm kek anhiɛɛr raan ee käŋ yökiic.

²⁴ Kë ye raan ee karɛc looi riɔ̈ɔ̈c ee ye cuööp, ku yök raan piɛth piɔ̈u kë ye kɔɔr.

²⁵ Bɛ̈n ë riääk ee kɔc ee karɛc looi nyaai, ku dɔ̈ŋ kɔc piɛthpiɔ̈ɔ̈th ananden.

²⁶ Raan toc adaakrɔt acït keth ë raan röl ku cït nyin nɛ̈k tol.

²⁷ Riëëu de Bɛ̈nydït ee pïïr ë raan ŋuak, ku tɔ nïn ke kɔc ee karɛc looi lik.

²⁸ Kɔc piɛth piɔ̈ɔ̈th aŋäthden ee lɔ guut në miɛt ë piɔ̈uwic, ku lɔ kɔc ee karɛc looi guut në baŋic.

²⁹ Bɛ̈nydït ee gëlgël tëde kɔc piɛthpiɔ̈ɔ̈th, ku yïn riääk kɔc ee karɛc looi.

³⁰ Kɔc piɛthpiɔ̈ɔ̈th acïï ke duëërë kɔn wuuk piny cï thɔ̈n keek, ee kɔc ee karɛc looi kek acï bï tɔ̈u.

³¹ Pɛlënɔm ee bɛ̈n në liëp ke kɔc piɛthpiɔ̈ɔ̈th, ku liëp ee karɛc lueel aye ke miɛɛm.

³² Kɔc piɛthpiɔ̈ɔ̈th aŋickï jam në ka rɔ̈ŋ, ku jam de ruëëny ee këde kɔc ee karɛc looi.