Kɛ̈ŋ 1 - JAM DE NHIALIC 2011

Piath de Kɛ̈ŋ

¹ Kakë ee kɛ̈ŋ ke Tholomon wën ë Debid, ku ye meliŋ de Yithriɛl.

² Kakë ee kɛ̈ŋ bï kɔc tɔ ŋic pɛlënɔm ku wëët lɔ gɔk, ku tɔkï kɔc yök ka cï thiaaniic apiɛth.

³ Abïk kɔc aa wɛ̈ɛ̈t në ŋiëc rëër, ago dɛ piathëpiɔ̈u, ku yic, ku kïït ë kɔc nïïm.

⁴ Abïk raan cïn piɔ̈u tɔ yök pɛlënɔm, ku tɔkï dhuök yök ŋïnydekäŋ ku pɛ̈ɛ̈kden.

⁵ Kek ee kɛ̈ŋkë aduëërkï raan pelnɔm ŋuak aya në pɛlënɔm, ku gëmkï raan ë käŋ yökiic kïït lɔ gɔk.

⁶ Agokï kääŋ cï thiaan aa yökiic, ku yökkï meek de kɔc pelnïïmiic.

Yöök de Dhuök

⁷ Riëëu rïïu ë raan Bɛ̈nydït, yen aye göl de ŋïny ë käŋ. Dhän ayek pɛlënɔm dhɔ̈lic, ku reeckï wëët.

⁸ Ye jam ë wuur piŋ apiɛth mɛnhdï, ku du wëët ë moor ee rɛɛc ë pïŋ.

⁹ Wëëtden abï yï tɔ läk cït göl ë dhuëëŋ në yïnɔm, ku cït kuat piɛth në yïyeth.

¹⁰ Të meet ë kɔc rac yïn, ke yï du gäm mɛnhdï.

¹¹ Na lëkkï yïn an, “Bä buthku raan näkku! Bä mɛkku raan cïn kë cï wööc baaŋ!

¹² Abuk keek yök apïïr ku piɛthkï, ku abuk keek nɔ̈k ëthiäu, ku tɔku ke lɔ piny thar ya paan ë thuɔɔu.

¹³ Yen abï wok nïïm thiäŋ në këriëëc piɛth ëbɛ̈n, ku thiäŋku ɣöötkuɔ në kak ë pec!

¹⁴ Bä mätë we wook, ke yï bï ka ë kual aa tek we wook ëtök.”

¹⁵ Du ee cath wekë kɔc cït ee kakë mɛnhdï. Ye rɔt mɛc wei në keek.

¹⁶ Acïkï ee gääu në luɔi de kërac. Ayek tɔ̈u ë ke kɔɔr nääk ë cieŋ.

¹⁷ Eeŋö piɛth cï jɔ looi të deep yïn wïn ë dɛ̈p cïï din dep tïŋ?

¹⁸ Ku kɔc cït ee kɔckë adepkï röt kapäc në wïn ë dɛ̈p, ku abï wïn ë dɛ̈p keek nɔ̈k yiëthken.

¹⁹ Cuëër ee wun nɔ̈k, yen täude ka ëbɛ̈n tëde raan de guöp akuöörkuöör.

Pɛlënɔm Acöt

²⁰ Piɛŋkï, pɛlënɔm acöt në kuɛɛriic, ku ɣään ke ɣööciic.

²¹ Acöt arëët në wut thok, ku në të ye kɔc kenïïm mat thïn lueel an,

²² “Amawoou në week wek kɔc piɔl piɔ̈ɔ̈th! Bäk pial ë piɔ̈u jɔ cuuth agut cï nɛn? Ku wek kɔc ee kɔc bui gup, bäk bui jɔ cuuth agut cï nɛn? Ku wek dhän wek man ŋïnydekäŋ.

²³ Piɛŋkï nɛɛn nɛn ɛn week apiɛth, ee jam piɛth yen lɛ̈k week, ku wek gäm kë ŋiɛc.

²⁴ Wek ya cool ë caal ɛn week ku cäkï gam. Wek cïï kë luɛɛl ee piŋ.

²⁵ Këpiɛth ya lɛ̈k week ëbɛ̈n ayak dhɔ̈lic, ku acäkï kɔɔr nɔn dak ɛn week taitai.

²⁶ Ku në biäk de ee kënë, wek bä jɔ dɔl gup të le kërac we yök. Wek bä bui gup kööl le riääk we lɔ̈ny.

²⁷ Kööl le riääk we mook cït man amaŋ, ku tɔ guöm tuc thok, ka wek rem gup në jiɛthëpiɔ̈u.

²⁸ Ëtɛ̈ɛ̈n, wek bï ya jɔ aa cɔɔl an pɛlënɔm, ku acä bï bɛ piŋ. Wek bï ya kɔɔr në ɣääniic ëbɛ̈n, ku cäkï ya yök.

²⁹ Në baŋ cä wek ŋïnydekäŋ rɛɛc, ku rɛɛckï Bɛ̈nydït riëëu.

³⁰ Wek kën jam piɛthdï kɔɔr, ku wek ë jai taitai në luɔi wɛ̈ɛ̈t ɛn week.

³¹ Ku ënɔɔnë, wek bï kërɛɛc rɔ̈ŋ ke week jɔ yök. Ku kë ë luɔikï në cinkun abäk jɔ thiëëp thok.

³² Kɔc piɔl piɔ̈ɔ̈th ayek thou në baŋ ye kek pɛlënɔm rɛɛc. Ku dhän aye dhääl ye kek käŋ dhɔ̈liic ke riɔ̈ɔ̈k.

³³ Ku raan ëbɛ̈n, raan ee kë luɛɛl piŋ, abï rëër ë dïu. Abï kony wëi, ku acïn kë bï ye riääc.”