Juda 1 - JAM DE NHIALIC 2011

¹ Yɛn Juda, lïm ë Yecu Kërtho, ku ya mänhë ë Jakop. Awerek en gäär kɔc cï cɔɔl, kɔc nhiɛɛr Nhialic Wääda, ku cïke muk ë Yecu Kërtho yic:

² Ë kokdepiɔ̈u, ku mät, ku nhiëër, ë ke ye lɔ ke ke ŋuak kenyïïn tëde week.

Tït Aluɛth

³ Week kɔc nhiaar, wään aa yɛn cök ë kaar ɛn gäär gäär ɛn week awerek në këde kunydewëi kuny nu wok thïn wodhie, ke ja ŋic ë yapiɔ̈u nɔn bän week dhil gäär jam riɛɛt ɛn wepiɔ̈ɔ̈th ke we bï cök ë teer në këde gäm, gäm cï yiɛ̈n kɔc ɣerpiɔ̈ɔ̈th raantök.

⁴ Luɔi de en kɔc kɔ̈k cï bɛ̈n thïn ëcuëër, kɔc cï kɔn meek ɣɔn thɛɛr, bïk këdɛn tucë yök, kɔc reec Nhialic riëëu, ku yek dhuëëŋ de Nhialicda piɔ̈u puk tɔkï ye këde dhööm, ku reeckï Bɛ̈nydïït töŋ nu ë wonïïm, Bɛ̈nydan Yecu Kërtho.

⁵ Ku yɛn de piɔ̈u luɔi täk ɛn wenïïm, ciɛk an, cäk kënë kɔn ŋic, näŋ cïï Bɛ̈nydït kɔc reec gäm nɔ̈k, acakaa yen ë cï kɔc kɔn kony bïï ke bei paan ë Rip.

⁶ Ayï tuucnhial tuuc ɣɔn reec tɔ̈u ë ciɛɛŋic ciɛɛŋ ë ciɛkë ke thïn, ku jɔkï paandɛn ee kek rëër thïn pɔ̈l, keek aake cïï Nhialic mac tëcol në jonh bï tɔ̈u athɛɛr bïk kööl dïït ee guiëërëlöŋ tiit.

⁷ Cït man ë Thɔdom ku Gɔmoora, ayï pɛ̈ɛ̈nydït ë nu ë ke këc, të cï kek röt aa gäm luɔi de dhööm, cït man ë tuucnhialkë, ku yek gup lei kɔɔr, ke ke jɔ tääu ë kɔc nïïm abï aa kë ye kɔc bɛ̈ɛ̈i nïïm, në yöŋ cï kek këtucden yök mɛɛc many tɔ̈u athɛɛr.

⁸ Ku kɔckë aya, acïtkï keek, kɔc ee nyuöth ë kërac, ayek kegup tɔ nhiany, ku yek bäny kuöc riëëu, ku yek adhuëŋ läät ë lɛ̈ɛ̈t rac.

⁹ Ku Maikɔl bɛ̈ny nu ë tuucnhial nïïm, ɣɔn teer en kekë jɔŋdït rac, tëërkï guöp de Mothe, akën nyin riɛl bï jɔt ɣɔn gɔɔny en en, aa luel tei an, “Ee Bɛ̈nydït en bï yï jɔ̈ɔ̈ny!”

¹⁰ Ku kɔckë, të de yen ka kuckï ka yek ke lat, ku të de yen ka ŋickï në täudɛn cï cäk ke, cït man ë läi cïn nïïm, ka yek röt riɔ̈ɔ̈k ee kakë.

¹¹ Amawoou në keek! Acïk cath ë kueer ë Kain. Ku acïk röt jaac lek wäc cï man cï Balaam käŋ wööc në këde ariöp. Ku acïk määr ë ater ë Kɔra, gokï riääk cï yen.

¹² Kɔckë ayek kuur cï thiaan këcamduön ë nhiëëric, të ye kek rɔm ë week ëtök ë këcam, ku yek këyäc thiɔ̈ɔ̈ŋ ke ke cïï riɔ̈c, ayek luäät cïn yiic pïïu, luäät ee yom kuaath. Acïtkï tiim ee mïthken dap yom, agokï cuö lok, tiim ruël cï thou raanrou, ago ke wöth bei në meiken.

¹³ Acïtkï apiöŋ de wɛ̈ɛ̈r apiöŋ ee rɔt miɔɔk, abïk ayärden gut cït man ë amoth. Acïtkï kuɛl ee tai, luɔi cï Nhialic duëëradur col ëcut tɔ̈ɔ̈u bï aa këden aɣet athɛɛr.

¹⁴ Ku Eenok aya, raan ë rem wën ee rɛm dhorou gɔl Adam, yen aa kɔn jam guiir në kɔcke, lueel an, “Tiëŋkï, Bɛ̈nydït abɔ̈ ke cath ke aguum juëc ke tuucnhialkɛn ɣeriic,

¹⁵ bï kɔc bɛ̈n tɔ yök këdɛn tuc kedhie, ku bï kɔc reec Nhialic riëëu bɛ̈n jɔ̈ɔ̈ny në luɔidɛn rɛɛc cïk looi ëbɛ̈n në reec reec kek Nhialic riëëu, ku jäny kɔc në jam tuc cïk lɛ̈k en ëbɛ̈n, kek kɔc ee kërac looi kɔc reec Nhialic riëëu!”

¹⁶ Kɔckë ayek kɔc ee dok ë këyäc, kɔc ee piɔ̈ɔ̈th dap dït, ku yek ŋɔ̈ɔ̈ŋdɛn rac kuany cök (ayek jam dïït ɣɔ̈ric lueel ë kethook), ku yek kɔc kɔ̈k kɔ̈c nyïïn nɔn de en ke bïk yök.

Yöök kekë Wɛ̈ɛ̈t

¹⁷ Ku wek kɔc nhiaar, yak wenïïm tak në wël wään cïï tuuc ke Bɛ̈nydan Yecu Kërtho kɔn lueel.

¹⁸ Wël wään cïk ke lɛ̈k week an, “Kööl rial kɔc de gup agɛɛt abïk dhil nu, kɔc bï ŋɔ̈ɔ̈ŋdɛn rac aa kuany cök.”

¹⁹ Kɔckë ee kɔc ee röt pöc bei, kɔc ee kepiɔ̈ɔ̈th tuöm ka ke piny, kɔc liiuwë Wëidït tëde keek.

²⁰ Ku week, we kɔc nhiaar, yak röt yïk ë gämduön cä we gam, gäm ɣeric ë wic, ku yak lɔ̈ŋ në Wëidït ɣer,

²¹ ku yak röt mɔ̈k ë nhiëër ë Nhialicic, abäk kok de Bɛ̈nydan Yecu Kërtho piɔ̈u aa tiit ayɔ̈k wek pïïr athɛɛr.

²² Yak piɔ̈ɔ̈th kok ë kɔc kɔ̈k, kɔc aye ke pääk,

²³ ku yak kɔc kɔ̈k kony në riɔ̈ɔ̈c riääc wek, abäk ke ya dɔ̈ɔ̈r bei mɛɛc, ayï lupɔ aya abäk maan lupɔ cï nyuel në rac de guöp.

Lɔ̈ŋ de Piɔ̈ny

²⁴ Ku ënɔɔnë, Nhialic Raan ŋic week gël ke we cïï bï aa wïïk, ku ŋïc week tääu ë dhuëëŋde nɔm ke cïn kë bï we gɔ̈k, abäk piɔ̈ɔ̈th a yum aläl,

²⁵ Nhialic pelnɔm, cïn Nhialic ee kek rou, ku ye Konydan ë wëi në Yecu Kërtho Bɛ̈nydïïtda, ë dhuëëŋ ë ye tɔ̈u ke yen, ku dït, ku riɛl, ku bɛ̈ɛ̈ny, ɣɔn thɛɛr ya ayï ënɔɔnë, aɣet athɛɛr ya. Amiin.