Jowɛl 3 - JAM DE NHIALIC 2011

Nhialic abï Juöör Luöi Këtuc

¹ Aye Bɛ̈nydït lueel an, “Në aköölkë yiic, të lan Juda puɔ̈k nɔm miɛt ë guöpde kekë Jeruthalem.

² Yɛn bï juöör määt yiic kedhie, ku bɛ̈ɛ̈i keek në wak de Jeɣocapat ɣɔn cän e tɔ tiëm. Bä keek bɛ̈n luöi këtuc ëtɛ̈ɛ̈n, në biäk de kë cïk luöi Yithriɛl kɔckiën bä lɔ̈ɔ̈k lak. Acïk kɔckï thiäi në juöör yiic ëbɛ̈n, ku tëkkï röt pinydï.

³ Acïk gɛk dɛɛny tëk kek röt kɔckï. Acïk wɛ̈ɛ̈t dhuök waar në diäär akɔɔrröör, ku ɣɔɔckï duet në mɔ̈n dekkï.

⁴ “Eeŋö kaarkï tëde Yɛn yïn Tayer wekë Thidon, ku paan de Pilithtiya ëbɛ̈n? De kë guöörkï, kë cä luöi week? Na de kë guöörkï, ke Yɛn bï kë cäk luöi Yɛn jɔ dap guöör nɔm në week aruööth.

⁵ Në luɔi cä wek adhɛ̈pkï nööm, ku nɔ̈mkï ateek, ku këriëëcdiën de naamde ëbɛ̈n. Ku lɛɛrkï keek ë luëk ke yiëthkun yiic.

⁶ Wek cï kɔc ke Juda, ku kɔc ke Jeruthalem ɣɔ̈c kɔc ke Girikii, jatkï keek pinyden ku leerkï ke tëmec.

⁷ Ku ënɔɔnë, ala keek jɔt të ɣɔn cä wek keek ɣaac thïn. Ku kërɛɛc wään cäk luöi keek, abä bɛ luöi week ayadäŋ.

⁸ Wɛ̈ɛ̈tkun, ayï duetkun abä keek ɣɔ̈c Juda. Ku abï Juda keek lɔ ɣɔ̈c kɔc ke Thabe, jur mec arëët. Kë cïï Bɛ̈nydït lueel ka.

⁹ Lɛ̈kkï juöör ee jamë an: ‘Guiɛkkï tɔŋ, ku thɛrkï tɔɔŋkun thook, ku määtkï jöötkuön ke tɔŋ yiic. Takï rem de tɔŋ cut rɔt tëthiɔ̈k, ku ë ke miööc tɔŋ.

¹⁰ Thäthkï pur, ke ke ye abätɛ̈ɛ̈u. Thäthkï leem ke tëm, ke ke ye tɔɔŋ. Takï lueel ë kɔc kɔ̈c an, “Wok lëu tɔŋ.

¹¹ Dapkï guëër wedhie, wek juöör thiɔ̈k, määtkï weyiic ëtɛ̈ɛ̈n, Ku yïn Bɛ̈nydït, bɛ̈ɛ̈iyë jöötkuön ke tɔŋ piny, bïï ke mak.

¹² “Ku juöör ë ke guiir röt, bïkkï në wak de Jeɣocapat yic. Yen të bï Bɛ̈nydït löŋ de juöör kedhie lɔ guiir thïn ka ëtɛ̈ɛ̈n.

¹³ Nɔ̈mkï menyjel ke tëm, rap acïk luɔk. Bäk duömkï enap yiic, dhiëm ke mäu acïk thiäŋ, ku töny acïk nïïm lɔ wei. Në biäk cï karɛcken juëc arëët.

¹⁴ Kuut dïït ë kɔc ë guëër ëbɛ̈n në wak de tɛ̈m ë löŋic. Në luɔi cïï kööl ë Bɛ̈nydït thiɔ̈k në wak ë tɛ̈m ë löŋic.

¹⁵ Akɔ̈l kekë pɛɛi acïk cuɔl, ku kuɛl acïkï be riau.

Nhialic abï Kɔcke Thieei

¹⁶ Ku Bɛ̈nydït, Raan ril de Yithriɛl, abï jam në Dhiɔn, ku reel në Jeruthalem, ago tënhial kekë piny lath. Ku Bɛ̈nydït abï kɔcke gël apiɛth.

¹⁷ “Yen abä wek en jɔ ŋic ëgɔk ëtɛ̈ɛ̈n, Yɛn Bɛ̈nydït Nhialicdun. Nɔn rɛ̈ɛ̈r Ɛn në Dhiɔn kuurdiën ɣeric nɔm. Jeruthalem abï aa pänydït ɣeric, ku acïï rem de tɔŋ de alɛi bï bɛ nyɔk ë pɛ̈c taitai.

¹⁸ “Ku në ee köölë, kur abïk aa thuat në mɔ̈n kuil, ku wat kur kor nïïm në ca, ku nyïïn ke pïïu ke Juda, abïk wat në pïïu kedhie. Ku awaŋ de pïïu abï rɔt mɔc nhial Luaŋdït, ku piɔɔk wak de Akacia yic.

¹⁹ “Rip abï döŋ ke ye jɔ̈ɔ̈r, ku Edom abïï puɔ̈l ke cï riääk, në luɔi cïï kek kɔc ke Juda kuur, ku näkkï kɔc cïn kë cïk wööc pinyden.

^20-21 Ku Juda abï yic dɛ kɔc aɣet athɛɛr, ku Jeruthalem abï cieŋ ë rɛm juëc anande. Ku päl keek awɛ̈ɛ̈ckɛn ke nääk wään kɛ̈n päl keek. Ku Bɛ̈nydït aa rɛ̈ɛ̈r në Dhiɔn.