Jowɛl 1 - JAM DE NHIALIC 2011

¹ Jam de Bɛ̈nydït kï, jam ë bɔ̈ tëde Jowɛl wën ë Pethwɛl.

Kɔc Adhiaukï në Riääk de Rap

² Piɛŋkï ee kënë, wek röördït, ku piëŋkï wek kɔc cieŋ piny ë Juda wedhie. De kë cït ee kënë cï rɔt kɔn looi në aköölkun yiic, ku nɔn yen akööl ke kuarkun yiic?

³ Lɛ̈kkï mïthkun, ku takï lëk ë mïthkun mïthken, ku takï lëk ë mïth ke mïthken rem bï lɔ̈ɔ̈k bɛ̈n.

⁴ An kë cïï luny de kɔyɔm tueŋë both, acïï luny de kɔyɔm bɔ̈ në yecök cam. Ku kë cïï kɔyɔm ye kek rou both, acïï kɔyɔm ye kek diäk cam. Ku kë cïï luny de kɔyɔm ye kek diäk both, acïï luny ye kek ŋuan cam.

⁵ Jatkï röt dhiaukï, wek kɔc ye mɔ̈u wit. Dhiëëukï mɔ̈u, wek kɔc ee mɔ̈u dek, në baŋ cï ye rɔ̈t bei në we thook.

⁶ Pinydï acïï jur peec, jur dït arëët ku riil, ku cieŋ lec cït lec ke köör, ku gul cït gul ke ŋun ë köör.

⁷ Acï rɛɛpkï riɔ̈ɔ̈k, ku riäkkï tiimkiën ke ŋaap. Acïk ke ŋööt kɔ̈ɔ̈th, ku wit keek piny ka kërken acïk kɔ̈ɔ̈th yaat.

⁸ Dhiaukï cït man ë nyan dhueny dhiëëu monydɛn ë dhuuk kek cï ye thiaak.

⁹ Miɔ̈c ë rap, ku miɔ̈c ye dek acïï kɔyɔm keek tɛɛm wei Luaŋdïït de Bɛ̈nydït, ka bäny ke kake Nhialic, ayï kɔc luui Bɛ̈nydït adhiaukï në biäk cïn en miɔ̈c gëmkï Bɛ̈nydït.

¹⁰ Duum acïk riääk, piny ë nɔm yiɛɛl wei në biäk cïï ë rap riɔ̈ɔ̈k, ku mɔ̈u ë dëu, ku tiim ke miök acïk biɔɔr.

¹¹ Ee këdïït de gäi, wek kɔc ee com, Dhiaukï wek kɔc ee enap com, dhiëëukï agamɔ aläl kekë barli, në biäk cïï këriëëc cï com riääk ëbɛ̈n.

¹² Tiim ke enap acïk riɔu, ku biɔɔr tiim ke ŋaap, ku tiim nu ë duum yiic kedhie acïk riɔu: tiim ke pomegraneet, ku akööt, ku tiim ke tupa. Ka kɔc acïkï piɔ̈ɔ̈th be miɛt.

¹³ Dhiaukï, wek bäny ke kake Nhialic, ku jiɛthkï piɔ̈ɔ̈th, wek bäny ee luui në yïk kɔ̈u. Niɛnkï ke we kïïu, wek kɔc ee Nhialicdï luööi. Në luɔi cïï miɔ̈c ë rap, ku miɔ̈c ye dek tɛɛm wei ɣön ë Nhialicdun.

¹⁴ Caalkï thɛ̈k ɣeric, calkï amatnɔm! Matkï röördït nïïm ku kɔc cieŋ piny ë Juda kedhie bäk lɔ Luaŋdïït de Bɛ̈nydït Nhialicdun, ku läŋkï Bɛ̈nydït.

¹⁵ Ee kööl rɛɛc cït ŋö! Në baŋ cï kööl ë Bɛ̈nydït thiɔ̈k. Abï ya kööl ë riääk ë bɔ̈ tëde Nhialic Awärjäŋ.

¹⁶ Rap ariɔ̈k keek në wo nyïïn ke cïn kony. Acïn miɛtëpiɔ̈u nu Luaŋdïït de Nhialicda.

¹⁷ Kɔ̈th acïk bul piny. Arɔɔth acïk riääk, ku adhɛn acï keek thuöör piny në biäk cïï ë rap yom.

¹⁸ Ɣɔ̈k atɔɔrkï në cɔk, ku luuny acïk thiëi piny, në luɔi cïn en wal nyuäthkï. Ayï luuny ke thök ayadäŋ acïk mam.

¹⁹ Yïn läŋ, Bɛ̈nydït, në biäk cïï ë ɣään ke nyuäth nu ë jɔ̈ɔ̈ric dëp, ku tiim ke duum acïï lɔ̈k ë mac ke nyop kedhie.

²⁰ Ayï läi roor aläŋkï yïn, në biäk cï nyïïn ke pïïu dëu, ku cïï mac ɣään ke nyuäth nu ë jɔ̈ɔ̈ric nyop.