Jop 9 - JAM DE NHIALIC 2011

Bëër ë Jop

¹ Go Jop bɛ̈ɛ̈r, lueel an:

² “Ɣɛɛ, ë yic aŋiɛc yen täu de ka, de raan duëër Nhialic jɔ̈ɔ̈ny ku gëm rɔt yic në Nhialic nɔm?

³ Duëër raan teer ke Yen adï? Acïn thiëc töŋ duɛ̈ɛ̈rë lëu në puŋë nɔm në aguum ke thiëciic.

⁴ Nhialic apel nɔm ku aril, eeŋa bï mëën ke Yen, ku tiɛɛm?

⁵ Ee kur tuök thäär nhial në agönhde, ku nyɛɛi ke tëden ke cïn kë ŋickï.

⁶ Raan ee mëën ke piny lath abï piny tieŋ ku wuuk tëde.

⁷ Aduëër akɔ̈l pɛ̈n bɛ̈n ë thok ku cïï kuɛl tɔ ruel.

⁸ Ciinde Yetök yen aa thieth nhial, ku kɛ̈c apiöŋ de wɛ̈ɛ̈r në Yecök.

⁹ Aa nök kuɛl ayok nhial biäk cam, yï kuɛl ayɔ̈ɔ̈l, ku amatnɔm de kuɛl nu nhial ya, yï kuɛl lɔyok, ku ciëër ë run ë piny, ku amatnɔm de kuɛl nu nhial biäk lɔ wöuwic.

¹⁰ Ee kadït gɛ̈ɛ̈iyë ke looi, ka cïï raan ke duëër yökiic, ku cïke lëu në kuën.

¹¹ Tïŋ ënɔɔnë, ee ya baar ku acä tïŋ, ee tëëk ku acä Ye ŋic.

¹² Ku tïŋ, ee nööm ku eeŋa duëër En dɔ̈m kɔ̈ɔ̈c? Acïn raan duëër En yɔ̈ɔ̈k an, “Eeŋö ë kë loiyë?”

¹³ Nhialic acïï agönhde ë pɔ̈lic, ayï kɔc ee ŋuäldïït wïïr cɔl Raɣap luööi, ayek kenïïm guöt piny ë Yecök.

¹⁴ Duɛ̈ɛ̈r bɛ̈ɛ̈r thok adï, ku lac wël bän teer wo Yen?

¹⁵ Yɛn cïï këde duëër bɛ̈ɛ̈r na cak nɔm dɛ yic, yɛn bï kokdepiɔ̈u lim tëde Raan gɔɔny ɛn.

¹⁶ Na cak a caal në göönyic, ku piŋ a thok, ka cä duëër gam nɔn bï Yen kë luɛɛl piŋ.

¹⁷ Ee yɛn tɔ witë amaŋ, ku miɔɔc a guöp në ɣään tök juëc ke cïn kë cä looi.

¹⁸ Acakaa kaam thiin ë wëi acie päl ɛn, ka pïïrdï kën kɛc?

¹⁹ Të yen biäk de raan ril? Ke Nhialic aril? Të yen guiëër ë löŋ? Eeŋa bï Ye lɛɛr në löŋ nɔm?

²⁰ Ëtɛ̈ɛ̈n, na cak guöp ciën awäc, ke kë bɔ̈ bei në yathok ee ya tɔ gäk, na cakaa raan lɔgɔk, ka Ye lueel an dɛ kë cä wööc.

²¹ Yɛn cïn guöp awäc ka yɛn cïï bï bɛ jam në rɔt, ayï pïïrdï acïn naamde.

²² Akït ëbɛ̈n, yen a luɛɛl ɛn en an, aye ke riɔ̈ɔ̈r nyïïn kedhie, kek kɔc cïn guup awɛ̈ɛ̈c ayï kɔc ee karɛc looi.

²³ Të cïï riääk kɔc tɔ thou ëthiäu, ke jɔ dɔl në kërɛɛc cï kɔc cïn kë cïk wööc yök.

²⁴ Piny nɔm acï tääu në kɔc rac cin. Ku kɔc ee löŋ guiir acï ke kum nyïïn. Na cie Yen ë loi ee kakë, ka eeŋa ë loi keek?

²⁵ Nïnkiën ke pïïr aciɛthkï aläl awärkï kɔc ŋic riŋ, acïn miɛtëpiɔ̈u nu në keyiic.

²⁶ Ayek dap riŋ cït thiɛɛk de aguöt kuɛɛth yom wïïr, ku cïtkï cuɔɔr bɛ̈k këciɛm.

^27-28 Na kaar bä nɔm määr në arɛɛmdï, abä ŋeek, ke yɛn ee riɔ̈ɔ̈c në nuɛɛndït bï yenɔm bɛ pɔ̈k ɛn, në biäk ŋiɛc ɛn en nɔn ŋoot ë Nhialic ke muk a guöp awäc.

²⁹ Yɛn bï yiɛ̈k yeth gääk, ka eeŋö bï raan rɔt nuan në ɣɔ̈ric?

³⁰ Të cak ɛn rɔt waak në pïïu lɔ kïr ku waak a cin ëbɛ̈n apiɛth,

³¹ ke Yen, abï ŋoot ke jiëp a piny në pul nhianyic, ka lupɔɔkï abïk ɛn rɛɛc në biäk ayäär.

³² Në luɔi cïï Yen ee raan cït man ë yɛn, adï cä yɔ̈ɔ̈k buk lɔ në gööny nɔm ëtök.

³³ Acïn raan tɔ̈u ë kaamda bï löŋ guiir, raan bï wo kuum waarou.

³⁴ Tɔ nyiɛɛi ë thienydɛnë në yaguöp, ku du yɛn tɔ lɛth ë riɔ̈ɔ̈cdɛn Yen a riääcë.

³⁵ Yɛn bï jam ke cïn kë riääc ɛn tëde Yen, në biäk ŋiɛc ɛn a piɔ̈u.