Jop 7 - JAM DE NHIALIC 2011

¹ Akööl ke mɛnh ë raan ë piny nɔm cïkï yiic ril cït luɔi de rem de tɔŋ, cïkï ril cït akööl ke raan lui ariöp ë kööl tök,

² ku cïkï cït lïm kɔɔr atiëpic, cïkï cït raan tit ariöpdɛn ë luɔi ë kööl tök?

³ Yɛn cï tɔ thöl pɛɛiyë ku pɛɛiyë ke cïn kë ee nɔm ɛn, ku thɔ̈l wɛ̈ɛ̈rë ku wɛ̈ɛ̈rë ke ya nuan.

⁴ Të cän tɔ̈c, yɛn ee rɔt thiëëc ee nɛn bïï piny ruu ke ya bï rɔt jɔt? Wakɔ̈u ee bɛ̈ɛ̈r ku yɛn ee ruu ke ya dëŋ abï piny ɣɛɛr.

⁵ Dɛ̈ldï ë toŋ ë yaguöp ku ee rɔt kɔ̈k, ruöi kekë abuui agɔlkï röt ë yanɔm alek guööt ë yacök piny,

⁶ Nïnkï ariŋkï aläl awärkï alanh kɔɔcë lupɔ, alekkï ke ke thök të cïn aŋäth.

⁷ Nhialic, du nɔm mär nɔn cït ë pïïrdï wëi, ku acïn këpiɛth bï nyïïnkï bɛ tïŋ.

⁸ Nyïïn ke raan woi ɛn ënɔɔnë acïkï yɛn bï bɛ nyɔk ë tïŋ ananden, Yïn bï ya kɔɔr ke ya liu.

⁹ Raan të cï yen lɔ paan ë thuɔɔu, acïï yenɔm ee bɛ dɔ̈k nhial, ee riäär cït man ë luät.

¹⁰ Acie bɛ bɛ̈n ɣönde, ku kɔc ŋic en ayek nïïm määr në yen.

¹¹ Ku në biäkdï, yɛn cïï yathok bï bɛ muk, yɛn bï jam në dhiën ë piɔ̈ndï, ku në tuöc de yɛn piɔ̈u abï yɛn tɔ gööny.

¹² Ya wɛ̈ɛ̈r ku nɔn a ŋuäldït kë jɔ Yïn a gël në ee gëldïïtë?

¹³ Të tääc ɛn në biöŋdï nɔm ke ya kɔɔr lɔ̈ŋ,

¹⁴ ke Yï gëm a nyuöth rac, riëëc ɛn.

¹⁵ Guɔ thon ë dec ŋuöön në pïïrdï wokë guöm de ee guöpë.

¹⁶ Yɛn ë bäp, yɛn cï ee pïïrë maan. Nyääŋë ya piny yatök, acï döŋ ke ye wëi lik ku ja thou.

¹⁷ Eeŋö ye tak ë raan? Raan eeŋö, kë yen yic riɛl tëde Yïn?

¹⁸ Yïn ee raan tiit të ruu ë piny ku aye them ë thaar thok ëbɛ̈n.

¹⁹ Agut cï nɛn bï Yïn a döt guöp, cakaa të thiin liɛk ɛn luɛɛth ke Yï cïï Yïnyin wel wei?

²⁰ Ee kënou cä wööc, kë cä looi, kë cän Yïn riɔ̈ɔ̈k piɔ̈u, Yïn Raan ee kɔc döt gup? Eeŋö tɔ Yïn ɛn e këduön jɔ kɔɔr guöp? Eeŋö jan rɔt tɔ ye kë thieek dït ɣääcë?

²¹ Eeŋö jiɛi Yïn luɔi pɛ̈l Yïn ɛn awɛ̈ɛ̈ckï ku nyaaiyë karɛckï? Ku ënɔɔnë yɛn bï tɔ̈c abuui yic, Yïn bï ya kɔɔr ku Yïn cïï ya bï bɛ yök.