Jop 6 - JAM DE NHIALIC 2011

Bëër ë Jop

¹ Go Jop puk nɔm an:

² “Na ë riäŋdï kekë kɛc ë piɔ̈ndï cï them në kë ye them!

³ Adï cïk liɛɛt ë wɛ̈ɛ̈r wuöör në thiɛk, yen kë tɔ ya dhuŋ bei ka wo wël rac.

⁴ Nhialic ë tɔŋdɛn cï kiëët wël nɔm ɛn. Nhialic Awärjäŋ acï a juaany guöp në wiɛth cïï wurïïden thiëi në yaguöp ëbɛ̈n (Wiɛth ke Awärjäŋ de thook wurïï acïk a juaany guöp, ka cïk thiëi në ya guöp ëbɛ̈n, Nhialic ë tɔŋdɛn cï kiëët wɛ̈l nɔm ɛn.)

⁵ Duëër mul roor ku nɔn yen thɔn kïïu të nu wal?

⁶ Kuïn lir cïnic amilɔ, de raan ee ye cam? Ku de miɛt ee yök në kë ɣeer nu mään ë tuɔŋ kɔ̈u?

⁷ Jam cït ee kënë acä kɔɔr, acït kuïn cïï mit ee raan gäm juäi.

⁸ Adï jɔ Nhialic a piëŋ kë cä thiëc En? Adï jɔ lɔ̈ŋdï puk nɔm?

⁹ Adï jɔ nu në Yepiɔ̈u bïï wëi nhiëc bei ë yaguöp, teem ke yiëëc raantök,

¹⁰ ke yen aduëër a muŋ de piɔ̈ndï ku kaac nhial në miɛtëpiɔ̈u, na cak dɛk arɛɛmdït, Aŋiɛc Bɛ̈nydït aɣeric, yɛn kɛ̈n jamde kɔn dhɔ̈ŋic.

¹¹ Yɛn cïn riɛl bän bɛ tïït ke ya pïïr, bä ŋö tiit ke ya cïn aŋäth?

¹² Riɛldï cït kuur ku ë ya loi në maläŋ?

¹³ Acïn riɛl tɔ̈u ke yɛn, yɛn cï döŋ ke ya kuany nyin, ku cïn të wɛl ɛn a nɔm thïn.

¹⁴ Kɔc cïï nhiëër ee nyuöth määthken, ayadäŋ kek acïï nhiëër ee nyuöth Nhialic Awärjäŋ,

¹⁵ ku week määthkï, wek cï ya math cït man ë nyïïn cï dëu.

¹⁶ Të cï ruël bɛ̈n, ke nyïïn ayek thiäŋ, abïk nïïm määr në pïïu,

¹⁷ ku mɔ̈i të cïï piny tuöc, nyïïn ayek liu.

¹⁸ Kɔc kuëth ayek piny kɔɔr ë jɔ̈ɔ̈ric, ku acïn pïïu yökkï, gokï yiɛɛl wei.

¹⁹ Kɔc ee käŋ ɣaac cath ë thɔ̈rɔ̈ɔ̈l ee jäl të cɔl Tema ku të cɔl Ceba, aake ye pïïu kɔɔr ë jɔ̈ɔ̈ric, ayek ŋɔ̈ɔ̈th an bïk pïïu yök,

²⁰ na wën, aa cïk ɣet ëtɛ̈ɛ̈n, acïk nïïm bɛ̈n mum, në luɔi kën kek aŋäthden yök.

²¹ Wek cït nyïïn cï dëu tëde yɛn, wek ee riääk tïŋ, guɔkï riɔ̈ɔ̈c ku lak ciëën ë wekɔ̈ɔ̈th.

²² De të cän e lɛ̈k week an, ‘Bäkï, gämkï yɛn këdäŋ,’ ku nɔn de kumthok cä thiëc week në këdï?

²³ Ku nɔn cä we thiëc kuɔɔny në biäk ë raan de aterdï, ku nɔn ee wëër bä wek a wɛ̈ɛ̈r bei ë raan ril yɔŋ ɛn ciin?

²⁴ Ee kënou cä wööc? Nyuöthkï yɛn, ke ya bï lɔ lik ku piɛŋ këdun.

²⁵ Yic aril anande, ku teerduön tɛɛr wek a thokë, acie yic.

²⁶ Yak tak bäk kuɛɛrkï kiɛm piny, ke we ye wël ke raan dhiau piɔ̈u woi ke ke cïn naamden?

²⁷ Wek cï ɣet tëmec abäk gɛk dɛɛny në biäk de mɛnh abaar, ku tɛɛrkï bäk määthdun giim kɔ̈u.

²⁸ Woikï a nyin apiɛth määthkï, wek cä töör lueth

²⁹ Pɔ̈kkï wepiɔ̈ɔ̈th, duökï ya bï dhööl, acïn awänydiën cä looi.

³⁰ Ku de luenh nu në yathok? Cak an nuö në riääkic ka cïn kë cä wööc.