Jop 5 - JAM DE NHIALIC 2011

¹ Jop cöt da, na de raan bï këdu tɔ bëërë? Ku ee tunynhial ɣeric ou bï yïn yïnyin wɛ̈lë?

² Kɛc ë piɔ̈u kekë tiɛɛl ayek dhɔ̈n nɔ̈k.

³ Yɛn cï dhɔ̈n tïŋ ke cï yecök wɛc piny, ë tëthiinë ke ya go ɣönde tïŋ ke cï cieen,

⁴ mïthke acïk mɛc në kë gël keek, tiam ë göönyic, ku cïn raan töŋ kony keek.

⁵ Ku jɔ rɛɛp cï tem ayï ka cï rɔk në kuɔɔth ëbɛ̈n cam në kɔc nɛ̈k cɔk, ku thöl röördït piɔ̈ɔ̈th kajuëcke.

⁶ Guöm acie bɛ̈n baaŋ, cït man cïï nuan ee cil piny abuui yic,

⁷ raan yen ee rɔt yiɛ̈n nuan yetök, cït man ye mac teny ke lɔ nhial.

⁸ Ku na ë ya ye yïn, adï cä Nhialic kɔɔr gɔ̈ɔ̈ny ë Yenɔm

⁹ Yen Raan ee ka gɛ̈iyë ke looi, ka cïï duëërë lëu në yöŋë yic, ku kapiɛth gɛ̈iyë ke cuku ke duëër lëu në kuɛ̈n.

¹⁰ Ee deŋ tɔ tuëny piny nɔm, ku tɔ pïïu lɔ në duumiic,

¹¹ Yen ee kɔc rɛ̈ɛ̈r abuui yic jat nhial, ku leer kɔc tɔ̈u ë dhiëëuwic tëde miɛt ë piɔ̈u.

¹² Ku riëëk kïït ë kɔc ee kɔc math, ke kë cïk lueel an loikï cïï bï tiam

¹³ Yen ee kɔc ee rɔt tɔ ye ka pel nïïm dɔm në dɛ̈pdenic, ke kïïtdɛn ë ruëëny bïï dap tɔ kääc.

¹⁴ Ayek kɔ̈th ë mɔ̈ɔ̈thic aköl, ku jɔkï lɔ päthpäth të kɛ̈ɛ̈c akɔ̈l cil cït wakɔ̈u.

¹⁵ Ee kɔc luäk bei në kɔc moth liëp, ku kony kɔc kuanynyïïn në kɔc ril.

¹⁶ Ago aŋäth aa këde kɔc kuanynyïïn ku ye kɔc ke luɔi rac thook lɔ lik.

¹⁷ Yeka, athiɛɛi ee këde raan cïï Nhialic looi nɔm, në biäk ee kënë du ee jaai të ye Nhialic Awärjäŋ yï rïc.

¹⁸ Ee raan luöi tëtöök ku deer ke nyïïn ee raan yup ku aye tɔ dem.

¹⁹ Abï yï luäk bei në nuanic ëbɛ̈n, dhetem ayï dhorou abï ciën kë jak yï guöp.

²⁰ Abï yï kony në thon ë cɔk, ku gël yïn në thon de abätäu në tɔŋic.

²¹ Abï yïn aa gël në liëp ke kɔc, ku na cï riääk bɛ̈n ke yïn cïï bï riɔ̈ɔ̈c.

²² Na cak riääk bɛ̈n kekë cɔk, ke yïn bï dɔl, ku yïn cïï bï riɔ̈ɔ̈c në läi roor.

²³ Domduön ee puur abï yic aa ciën kɔi ku läi roor acïk yï bï aa gëëm.

²⁴ Yen abï yïn e jɔ ŋic nɔn rëër yïn ë dïu baaidu, kaku abä ke aa kuëën nyïïn ku acïn kë bï aa liu,

²⁵ Ku abä jɔ ŋic ayadäŋ nɔn bï kuatdu juëc, ku abïk ciët wäl cï roor thiɔ̈ɔ̈ŋic ëbɛ̈n.

²⁶ Yïn bï run ke dhiɔɔpdu cuööp ku jɔ bɛ̈n jäl, cït man ye rap bɛ̈n ë yiɛɛuwic.

²⁷ Jop tïŋ, ka cuk ke cätiic apiɛthë ku ŋicku ke ayek yith, ka yïn piŋ keek ënɔɔnë ku gam ke.