Jop 42 - JAM DE NHIALIC 2011

Bëër de Jop

¹ Go Jop wël ke Bɛ̈nydït bɛ̈ɛ̈r, ku lueel an:

² “Aŋiɛc Bɛ̈nydït nɔn ee Yïn ril, ku Yïn duëër këriëëc ëbɛ̈n kɔɔr ë Yïpiɔ̈u looi.

³ Yïn ë yɛn thiëëc an, ‘Yeŋa, kë yïn pɛlënɔmdï luɔp në kuöc jam? Ë yic, yɛn ë jam në ka kɛ̈n ke yökiic, kadït gɛ̈iyë cä ke duëër lëu në ŋïc.

⁴ Yïn cï ya yɔ̈ɔ̈k bä piŋ të jiɛɛm Yïn, ku bä ka cï thiëc ɛn aa puk nïïm.

⁵ Në run cï tëëk, yɛn aa ŋic ka cï kɔc kök ke lɛ̈k ɛn në biäkdu, ku ënɔɔnë Yïn cä tïŋ në nyïïnkï.

⁶ Ka ënɔɔnë yɛn cï guöp riɔ̈ɔ̈c në ka cä ke lueel kedhie, ka yɛn bï rɔt daal në abuui yic ku ŋeth yic nyooth puŋdepiɔ̈ndï.

Thök de Jam

⁷ Wën cïï Bɛ̈nydït thök ë jam ke Jop, go lɛ̈k Eliapath an, “Yɛn cï gɔ̈th wo yïn wekë määthku kaarou në biäk kën wek jam në biäkdï në yith cït kueer ë jiɛɛm ë lïmdiën Jop.

⁸ Ë nɔɔnë, nöm miöör kadhorou, ku nyök amɛ̈l kadhorou, yiɛ̈n ë ke Jop bï ke lɔ gam ke ke ye miɔ̈c näk, ku lɛ̈ŋ në biäkdun, ku Yɛn bï lɔ̈ŋde piŋ, ku wek cä bï yɔ̈ɔ̈r gup në ayär röŋ ke week. Wek kën jam në yith në biäkdï cït man ë yen.”

⁹ Yï Eliapath, kekë Bildad ku Dhopar acïk kë cïï Bɛ̈nydït lɛ̈k keek bɛ̈n looi, ku Bɛ̈nydït ë lɔ̈ŋde Jop bɛ̈n piŋ.

¹⁰ Ëtɛ̈ɛ̈n wën cï Jop lɔ̈ŋ në biäk de määthke kadiäk, go Bɛ̈nydït nyɔk ë gëm yen en kajuëc wär ka wään kɔn tɔ̈u në yen.

¹¹ Wɛ̈ɛ̈tëkɔcken ku nyïïrëkɔcken ku jɔ ya määthkɛn thɛɛr acïk en bɛ̈n neem, ku ciëmkï në yen ku nyuthkï luɔi kɔ̈ɔ̈c kek në yen, ku dutkï piɔ̈u paande, në riäŋ cï Bɛ̈nydït yiɛ̈n en, ku keek kedhie aa ye raan tök gäm wëu, ku adhääp.

¹² Ku Bɛ̈nydït acï runke pïïr Jop wään ciëën ë thieei yiic, awär athiɛɛi tueŋ, aa de nɔm aguum kathiëër ku ŋuan 14,000 ke thök amɛ̈l, ku aguum kadhetem 6000 ke thɔ̈rɔ̈ɔ̈l, ku aguum kaarou ke 2,000 ɣɔ̈k, ku agum töŋ de mul.

¹³ Yen aye wun wäthii kadhorou ku duet kadiäk.

¹⁴ Nyan kɛ̈ide acɔl Jemiima, ku nyan lɔ në yecök acɔl Kedhia, ku nyanthiinë acɔl Keeren Ɣapuc.

¹⁵ Aa cïn duet ë läk cït duet ke Jop ee pinyë ëbɛ̈n. Acïï wuönden ke bɛ̈n tɔ lak käŋ në mïthëkɔcken ëtök.

¹⁶ Ku në ee kakë cök ëbɛ̈n Jop acï bɛ̈n bɛ rëër në run kabɔt ku thiërŋuan 140 abïï mïth ke mïthke tïŋ, ku mïth ke mïth ke mïthke.

¹⁷ Ku jɔ bɛ̈n thou ke runke ke ke cï juëc në piny nɔm.